ຕ້ອງລະວັງ ! ພຶດຕິກຳ ການກິນ 5 ຢ່າງ ທຳລາຍພູມຕ້ານທານໃຫ້ອ່ອນແອ ແລະ ປ່ວຍງ່າຍ

ນອກຈາກການກິນອາຫານທີ່ບໍ່ມີປະໂຫຍດຈະສົ່ງຜົນເສຍຕໍ່ຮ່າງກາຍແລ້ວ ການກິນອາຫານແບບຜິດໆ ໂດຍບໍ່ສະເລ່ຍສານອາຫານໃຫ້ເໝາະສົມກໍສາມາດທຳລາຍລະບົບພູມຕ້ານທານໄດ້ຄືກັນ ບາງຄົນອາດມີພຶດຕິກຳການກິນທີ່ຫວານຫລາຍ, ເຜັດຫລາຍ, ເຄັມຫລາຍ ຫລື ບໍ່ກໍຫລຸດຈຳນວນຜັກລົງມາເກືອບຈະບໍ່ເຫັນສີຜັກໃນຈານເລີຍ. ມື້ນີ້ພວກເຮົາຂໍແນະນຳ 5 ພຶດຕິກຳການກິນທີ່ຫລາຍຄົນມັກຖືເບົາ ສົ່ງຜົນຕໍ່ລະບົບພູມຕ້ານທານໃນຮ່າງກາຍມາແບ່ງປັນໃຫ້ທຸກທ່ານໄດ້ຮູ້ກັນ ມາເບິ່ງວ່າມີພຶດຕິກຳຫຍັງແດ່ ດັ່ງນີ້ :

1. ກິນອາຫານຫວານຫລາຍ : ເຂົ້າໃຈວ່າບາງເທື່ອຮ່າງກາຍກໍຮຽກຮ້ອງລົດຊາດຫວານຫລາຍໆ ຫລື ມີພຶດຕິກຳການກິນຂອງຫວານເປັນປະຈຳຈົນເກີນໄປ ກໍສາມາດທຳລາຍລະບົບພູມຕ້ານທານພາຍໃນຮ່າງກາຍໄດ້. ໃນຂະນະທີ່ການກິນຫວານໃນປະລິມານທີ່ບໍ່ຫລາຍ ຊຳ້ພັດເປັນການຊ່ວຍເສີມສ້າງລະບົບພູມຕ້ານທານໃຫ້ແກ່ຮ່າງກາຍແທນ. ສຳລັບໃຜທີ່ມັກກິນຫວານຫລາຍ ຂໍແນະນຳໃຫ້ກິນບໍ່ເກີນ 6 – 9 ບ່ວງຊາຕໍ່ມື້ ຈຶ່ງຈະຖືວ່າເໝາະສົມ.
2. ກິນລົດຊາດເຄັມຈົນຕິດເປັນນິໄສ : ສຳລັບບາງທ່ານທີ່ຮັກການກິນອາຫານລົດຊາດເຄັມ ກໍຂໍໃຫ້ໄດ້ໃສ່ເກືອ ຫລື ນຳ້ປາໃຫ້ເຕັມທີ່ໄວ້ກ່ອນ ຂໍບອກເລີຍວ່າການທີ່ຮ່າງກາຍໄດ້ຮັບປະລິມານໂຊດຽມຫລາຍເກີນໄປ ຈະສົ່ງຜົນເຮັດໃຫ້ລະບົບພູມຕ້ານທານຕໍ່າລົງ ຈົນເຮັດໃຫ້ບໍ່ສາມາດຕໍ່ສູ້ກັບເຊື້ອແບັກທີເຣຍໂຕຮ້າຍໄດ້. ດັ່ງນັ້ນ, ແນະນຳໃຫ້ກິນໂຊດຽມມື້ລະບໍ່ເກີນ 2.300 ມິນລີກຣາມ ຫລື ປະມານ 1 ບ່ວງແກງແທນການກິນອາຫານລົດຊາດເຄັມຈະດີກ່ວາ.
3. ດື່ມອານກໍຮໍຫລາຍເກີນໄປ : ເຖິງຈະມີງານລ້ຽງສັງສັນຫລາຍເທື່ອປານໃດ ກໍຄວນຄຳນຶງເຖິງສຸຂະພາບຮ່າງກາຍໄວ້ກ່ອນ ດັ່ງນັ້ນ ທຸກເທື່ອທີ່ອອກໄປພົບປະໝູ່ເພື່ອນ ຫລື ໄປງານລ້ຽງສັງສັນ ກໍຄວນດື່ມອານກໍຮໍໃນປະລິມານທີ່ພໍດີພໍງາມ ບໍ່ຄວນດື່ມຫລາຍເກີນໄປ ເພາະອານກໍຮໍຈະເຂົ້າໄປທຳລາຍປະສິດທິພາບການເຮັດວຽກຂອງລະບົບພູມຕ້ານທານພາຍໃນຮ່າງກາຍ ຫາກມັກດື່ມກໍຄວນດື່ມບໍ່ເກີນ 8 – 15 ຈອກຕໍ່ອາທິດ.
4. ດື່ມຊາ – ກາເຟທຸກມື້ : ການດື່ມຊາ, ກາເຟ ຫລື ເຄື່ອງດື່ມຕ່າງໆທີ່ມີສານກາເຟອີນ ຄວນດື່ມໃນປະລິມານທີ່ພໍດີພໍງາມ ເພື່ອໃຫ້ຮ່າງກາຍຮູ້ສຶກສົດຊື່ນຫ້າວຫັນ ບໍ່ຄວນດື່ມຫລາຍ ຫລື ດື່ມເປັນປະຈຳຈົນເກີນໄປ ຈົນມື້ໃດທີ່ບໍ່ໄດ້ດື່ມຈະຮູ້ສຶກຄືຂາດບໍ່ໄດ້ ເພາະການທີ່ຮ່າງກາຍໄດ້ຮັບກາເຟອີນໃນປະລິມານຫລາຍ ຈະຫລຸດປະສິດທິພາບໃນການເຮັດວຽກຂອງລະບົບພູມຕ້ານທານພາຍໃນຮ່າງກາຍໄດ້. ສິ່ງສຳຄັນ ຄວນຫລີກເວັ້ນການດື່ມຊາ, ກາເຟ ປະມານ 6 ຊົ່ວໂມງກ່ອນເຂົ້ານອນ ເພາະອາດສົ່ງຜົນຕໍ່ການນອນໄດ້.
5. ກິນອາຫານປະເພດໄຟເບີໜ້ອຍ : ຖາມວ່າໄຟເບີມີຄວາມສຳຄັນແນວໃດຕໍ່ຮ່າງກາຍ ? ຄຳຕອບກໍຄື ຈະຊ່ວຍໃນເລື່ອງຂອງລະບົບຍ່ອຍອາຫານໄດ້ດີ ແລະ ສິ່ງສຳຄັນ ໄຟເບີມີສ່ວນຊ່ວຍໃຫ້ການເຮັດວຽກຂອງລະບົບພູມຕ້ານທານເຮັດວຽກໄດ້ຢ່າງມີປະສິດທິພາບຫລາຍຂຶ້ນ ທັງຍັງມີສ່ວນຊ່ວຍປ້ອງກັນເຊື້ອໄວຣັສ ແລະ ເຮັດໃຫ້ນອນຫລັບໄດ້ງ່າຍ. ການກິນໄຟເບີບໍ່ວ່າຈະເປັນການເລືອກກິນຜັກ – ໝາກໄມ້ ຫລື ທັນຍາພືດກໍຄວນກິນໃຫ້ຮ່າງກາຍໄດ້ຮັບໃນປະລິມານ 25 – 38 ກຣາມຕໍ່ມື້ ຖືເປັນການດີທີ່ສຸດ.

• ອາຫານບາງຊະນິດມີສ່ວນຊ່ວຍເສີມສ້າງລະບົບພູມຕ້ານທານ. ໃນຂະນະທີ່ອາຫານບາງຊະນິດກໍພ້ອມທີ່ຈະທຳລາຍລະບົບພູມຕ້ານທານໃຫ້ເສື່ອມລົງໄດ້ຄືກັນ ດັ່ງນັ້ນ ເຮົາຈຶ່ງຕ້ອງເລືອກກິນແຕ່ອາຫານທີ່ມີປະໂຫຫຍດ ໂດຍສະເພາະຜັກ – ໝາກໄມ້ທີ່ໃຫ້ຄຸນຄ່າທາງໂພຊະນາການສູງ ດີກ່ວາການກິນອາຫານກາລໍຣີສູງ ຫລື ອາຫານໄຮ້ປະໂຫຍດຕ່າງໆ.