ມະຫາວິທະຍາໄລແຫ່ງຊາດເປີດຂາຍຟອມສອບເສັງມື້ທຳອິດມີນັກສຶກສາຫລັ່ງໄຫລໄປຊື້ເປັນຈຳນວນຫລາຍ

ພາຍຫລັງມີແຈ້ງການໃຫ້ເປີດຂາຍແບບຟອມ ສອບເສັງເຂົ້າຮຽນຢູ່ ມະຫາວິທະຍາໄລແຫ່ງຊາດ (ມຊ) ສົກປີ 2017-2018 ແລະ ໄດ້ເລີ່ມເປີດ ຂາຍມື້ທຳອິດ ໃນວັນທີ 26 ມິຖຸນາ ນີ້, ເຫັນວ່າມີນັກຮຽນ-ນັກສຶກສາມາຊື້ເປັນຈຳນວນຫລາຍ, ຂະນະທີ່ສົກປີນີ້ຈະຮັບເອົານັກຮຽນພຽງແຕ່ 6 ພັນກວ່າຄົນເທົ່ານັ້ນ.

ທ່ານ ຄຳຜົງ ນາມມະວົງມີໄຊ ຫົວໜ້າຫ້ອງການວິຊາການ ມະຫາວິທະຍາໄລແຫ່ງຊາດ ໃຫ້ສຳພາດຕໍ່ນັກຂ່າວໜັງສືພິມລາວພັດທະນາ ວ່າ: ຕາມແຈ້ງການຂອງອະທິການບໍດີມະຫາວິທະຍາໄລແຫ່ງຊາດ ກ່ຽວກັບການຈັດຕັ້ງສອບເສັງຄັດເລືອກເອົານັກຮຽນຢູ່ ມະຫາວິທະຍາໄລແຫ່ງຊາດ ເລີ່ມເປີດຂາຍຄຳຮ້ອງວັນທີ 26 ມິຖຸນາ ຫາ ວັນທີ 19 ກໍລະກົດ 2017, ສ່ວນມື້ ຮັບຄຳຮ້ອງ ແລະ ລົງທະບຽນສອບເສັງເລີ່ມວັນທີ 28 ມິຖຸນາ ຫາ ວັນທີ 19 ກໍລະກົດ 2017. ຊຶ່ງການສອບເສັງແບ່ງອອກເປັນ 3 ສາຍຄື: ສາຍວິທະຍາສາດທຳມະຊາດ, ສາຍວິທະຍາສາດສັງຄົມ ແລະ ເຄິ່ງວິທະຍາສາດທຳມະຊາ ແລະ ເຄິ່ງວິທະຍາສາດສັງຄົມ ແລະ ເພື່ອຮັບປະກັນຄວາມເປັນລະບຽບຮຽບຮ້ອຍ ແລະ ຄວາມໂປ່ງໃສ ທາງມະຫາວິທະຍາໄລແຫ່ງຊາດໄດ້ຈັດຕັ້ງຫລາຍຄະນະກຳມະການ ເປັນຕົ້ນແມ່ນ ຄະນະກຳມະການຄວບຄຸມຂໍ້ສອບເສັງ, ຄະນະກຳມະການຍາມຫ້ອງເສັງ ແລະ ຄະນະກຳມະການນຳສົ່ງ ແລະ ແຈກຢາຍຫົວບົດສອບເສັງ, ພິເສດ ໃນປີ ນີ້, ມະຫາວິທະຍາໄລແຫ່ງຊາດໄດ້ນຳໃຊ້ຄອມພິວເຕີ ໃນການກວດຂໍ້ສອບເສັງ ແລະ ຍັງໃຊ້ເຈ້ຍຂໍ້ສອບສະເພາະ ເພື່ອປ້ອງກັນບໍ່ໃຫ້ນັກສຶກສາມີການລັກລອບ ກ່າຍ, ຫລື ປອມແປງ ຄຳຕອບໄດ້.

ທ່ານ ຄຳຜົງ ນາມມະວົງມີໄຊ ໃຫ້ຮູ້ວ່າ: ການສອບເສັງຄັດເລືອກເອົານັກສຶກສາ ຢູ່ ມະຫາວິທະຍາໄລແຫ່ງຊາດ ປີນີ້ ແມ່ນຈະມີຄວາມເຂັ້ມງວດເປັນພິເສດ, ໂດຍສະເພາະ ແມ່ນຫ້າມນັກສອບເສັງນຳເອົາເອກະສານ, ອຸປະກອນການສື່ສານເຂົ້າຫ້ອງສອບເສັງ, ເປັນຕົ້ນ: ຈັກຄິດໄລ່, ມືຖື , ຊຶ່ງຜ່ານມາກໍຍັງມີນັກສຶກສາບາງຄົນໄດ້ລັກລອບນຳເອົາເຄື່ອງມືເຂົ້າຫ້ອງເສັງ ແລະ ຖືກຄະນະກຳມະການຕັດສິດໃນການສອບເສັງມາແລ້ວ, ພ້ອມນີ້ ຍັງມີການກວດສອບລະອຽດຂອງຫ້ອງ ສອບເສັງໃຫ້ມີຄວາມພ້ອມໃຊ້ງານສະດວກ, ໂດຍສະຖານທີ່ສອບເສັງທາງມະຫາວິທະຍາໄລແຫ່ງຊາດຈັດຂື້ນມີ 1 ສູນ ໃຫຍ່ ຢູ່ ມະຫາວິທະຍາໄລແຫ່ງຊາດ ແລະ 17 ເຂດ ຢູ່ໃນແຕ່ລະຄະນະ ແລະ ທົ່ວພະແນກສຶກສາທິການ ນະຄອນຫລວງວຽງຈັນ.

ແນວໃດກໍດີ ຄາດວ່ານັກສຶກສາທີ່ຈະມາສອບເສັງ ຢູ່ມະຫາວິທະຍາໄລແຫ່ງຊາດໃນປີນີ້ ອາດມີສູງກ່ວາ 50 ພັນ ຄົນ, ແຕ່ຈະຮັບເອົານັກສຶກສາເຂົ້າຮຽນໃນສົກປີ 2017-2018 ພຽງແຕ່ 6 ພັນກ່ວາຄົນເທົ່ານັ້ນ, ໃນນີ້ລວມມີທຶນສຳລັບນັກສຶກສາພິເສດໃນແຜນ 2 ພັນກ່ວາຄົນ.