ອິນໂດເນເຊຍເຂັ້ມງວດ ລົງໂທດຜູ້ບໍ່ໃສ່ຜ້າປິດປາກ ຂຸດຂຸມຝັງສົບເຫຍື່ອໂຄວິດ-19
ອິນໂດເນເຊຍເຂັ້ມງວດລົງໂທດຜູ້ບໍ່ໃສ່ຜ້າປິດປາກ-ດັງ ຫລັງຕິດເຊື້ອສູງເປັນອັນດັບ 2 ຂອງອາຊຽນ.
CNN ລາຍງານຈາກຈາກາຕາ ປະເທດອິນໂດເນເຊຍ ໃນວັນທີ 18 ກັນຍາວ່າ: ຊາວອິນໂດເນເຊຍທີ່ບໍ່ໃສ່ຜ້າປິດປາກ-ດັງຖືກລົງໂທດໂດຍໜ່ວຍງານທ້ອງຖິ່ນໃນພື້ນທີ່ຊົນນະບົດ ໂດຍການຂຸດຂຸມຝັງສົບຂອງຜູ້ເສຍຊີວິດຈາກໂຄວິດ-19 ດ້ວຍຄວາມຫວັງວ່າຈະສາມາດຊັກຊວນໃຫ້ປະຊາຊົນຄົນອື່ນປ້ອງກັນຕົນເອງ ເພື່ອຢຸດການແຜ່ລະບາດຂອງໂຄວິດ-19 ໄດ້.
ເຖິງວ່າອິນໂດເນເຊຍຈະອອກກົດໃຫ້ປະຊາຊົນໃສ່ຜ້າປິດປາກ-ດັງໃນພື້ນທີ່ສາທາລະນະ ແຕ່ຍັງມີປະຊາກອນບາງສ່ວນບໍ່ໃຫ້ການຮ່ວມມືໃນການໃສ່ຜ້າປິດປາກ ແລະ ເວັ້ນໄລຍະຫ່າງທາງສັງຄົມ.
ຜູ້ຊ່ຽວຊານເປີດເຜີຍວ່າ: ການຂາດຄວາມລະມັດລະວັງຕໍ່ສາທາລະນະ ເຮັດໃຫ້ອິນໂດເນເຊຍຢັບຢັ້ງການແຜ່ກະຈາຍຂອງພະຍາດໂຄວິດ-19 ໄດ້ຍາກ ໂດຍຈາກການລາຍງານຂອງກະຊວງສາທາລະນະສຸກອິນໂດເນເຊຍ. ປັດຈຸບັນ ອິນໂດເນເຊຍມີຜູ້ຕິດເຊື້ອປະມານ 230.000 ຄົນ, ປິ່ນປົວຫາຍແລ້ວ 160.000 ຄົນ ແລະ ເສຍຊີວິດ 9.100 ກວ່າຄົນ.
ໃນເດືອນກໍລະກົດ ລັດຖະບານອິນໂດເນເຊຍໄດ້ອອກກົດໃຫ້ປະຊາຊົນໃສ່ຜ້າປິດປາກ-ດັງໃນບ່ອນສາທາລະນະ ແລະ ໃຫ້ເຈົ້າໜ້າທີ່ທ້ອງຖິ່ນເປັນຜູ້ກຳນົດບົດລົງໂທດສຳລັບຜູ້ທີ່ບໍ່ປະຕິບັດຕາມ ໂດຍມີການກຳນົດໂທດສຳລັບຜູ້ທີ່ບໍ່ໃສ່ຜ້າປິດປາກ-ດັງວ່າ: ຕ້ອງຈ່າຍຄ່າປັບໄມ 150.000 ຣູປີ ຫລື ຮັບບົດລົງໂທດທາງສັງຄົມ.
