ລົງຮາກຖານພັດທະນາຊົນນະບົດຊ່ວຍເຫລືອປະຊາຊົນ
ໂດຍ: ທິດກໍ່າ
ອີງຕາມຂໍ້ມູນຈາກກອງທຶນຫລຸດຜ່ອນຄວາມທຸກຍາກ (ທລຍ) ກະຊວງກະສິກຳ ແລະ ປ່າໄມ້ ໃຫ້ຮູ້ວ່າ: ໄດ້ມີການຝຶກອົບຮົມບຸກຄະລາກອນຈຳນວນ 100 ຄົນໃຫ້ກາຍເປັນນັກພັດທະນາລົງໄປພັດທະນາບ້ານທຸກຍາກຊ່ວຍເຫລືອປະຊາຊົນໃນຈຳນວນ 248 ບ້ານ ເພື່ອພັດທະນາຄອບຄົວ ແລະ ໂພຊະນາການ ເຊິ່ງບັນດາບ້ານເຫລົ່ານີ້ມີອັດຕາຄວາມທຸກຍາກສູງ ນອນຢູ່ໃນ 12 ເມືອງທີ່ເປັນບູລິມະສິດຂອງລັດ ຢູ່ 4 ແຂວງພາກເໜືອຄື: ແຂວງຜົ້ງສາລີ, ຊຽງຂວາງ, ຫົວພັນ ແລະ ອຸດົມໄຊ. ແຜນການຈັດຕັ້ງປະຕິບັດໂຄງການນີ້ຈະດຳເນີນໄປຮອດປີ 2024 ຈຶ່ງມາສະຫລຸບກັນວ່າຜົນໄດ້ຮັບມັນຈະເປັນໄປຕາມການຄາດໝາຍ ຫລື ບໍ່ ?. ແຫລ່ງຂ່າວຍັງບອກຕື່ມວ່າ: ບຸກຄະລາກອນທີ່ໄດ້ເຂົ້າມາຝຶກອົບຮົມຄັ້ງນີ້ເປັນຜູ້ໜຸ່ມແໜ້ນຮຽນວິຊາຊີບໃໝ່ໆຈົບຊັ້ນສູງ ແລະ ຊັ້ນປະລິນຍາ ໂດຍໄດ້ຄັດເລືອກຈາກບ້ານເປົ້າໝາຍ ເພື່ອມາຝຶກອົບຮົມຄວາມຮູ້, ຄວາມສາມາດຮອບດ້ານຕາມແນວທາງຂອງພັກ ແລະ ລັດຖະບານ ແຕ່ບໍ່ໄດ້ບັນຈຸເຂົ້າເປັນລັດຖະກອນ. ໃນຈຳນວນນັກພັດທະນາທີ່ກ່າວມານີ້ ຫລັງຈາກສຳເລັດບັ້ນຝຶກອົບຮົມແລ້ວ ຕ້ອງໄດ້ສົ່ງໄປປະຕິບັດໜ້າທີ່ຕາມບ້ານເປົ້າໝາຍ ເຊິ່ງທາງ ທລຍ ຍັງຕ້ອງຊອກເງື່ອນໄຂ ແລະ ຈັດຫາວັດຖຸອຸປະກອນ ເພື່ອສະດວກໃນການເຮັດວຽກ ເປັນຕົ້ນປະກອບລົດຈັກໃຫ້, ເຄື່ອງຄອມພິວເຕີພົກພາ, ເງິນເດືອນ ແລະ ສິ່ງຂອງທີ່ຈຳເປັນໃຫ້. ສ່ວນວ່າວຽກທີ່ຕ້ອງໄດ້ເຮັດຕົວຈິງນັ້ນ ແມ່ນເພື່ອກໍ່ສ້າງຮາກຖານ, ຊ່ວຍເຫລືອ ແລະ ນຳພາປະຊາຊົນສ້າງລາຍຮັບດ້ວຍການປູກຝັງ-ລ້ຽງສັດ ແລະ ຈັດຫາຕະຫລາດ ເພື່ອສົ່ງອອກຂາຍ, ຫລີກລ່ຽງການເພິ່ງພາທຳມະຊາດທີ່ມີລາຍຮັບບໍ່ແນ່ນອນ ແລະ ໃຫ້ໄປຕາມທິດພັດທະນາແບບຍືນຍົງຂອງລັດ.
ແນວໃດກໍດີ, ເວົ້າເຖິງການຫັນລົງຮາກຖານຂອງນັກພັດທະນາ ນັບທັງພະນັກງານທະຫານ-ຕຳຫລວດ ພວກເຮົາເຄີຍຈັດຕັ້ງປະຕິບັດກັນມາແຕ່ດົນນານແລ້ວ ຄືນັບແຕ່ສະໄໝການຕໍ່ສູ້ປົດປ່ອຍຊາດຈົນມາຮອດປັດຈຸບັນ ກໍຍັງສືບຕໍ່ເຮັດກັນມາໂດຍບໍ່ໄດ້ຂາດ. ຕົວຢ່າງສູນກາງລົງແຂວງ, ແຂວງລົງເມືອງ, ເມືອງລົງບ້ານ ຫລື ທາງສູນກາງລົງໄປສົມທົບທ້ອງຖິ່ນ ເພື່ອກໍ່ສ້າງຮາກຖານຢູ່ຂັ້ນບ້ານ, ກຸ່ມບ້ານໃຫ້ມີການພັດທະນາຢ່າງວ່ອງໄວ ຈົນມາດເຖິງປັດຈຸບັນ ພວກເຮົາກໍຍັງເຮັດກັນມາບໍ່ໄດ້ຂາດ ເພາະການຫັນລົງຮາກຖານເພື່ອໃກ້ຊິດຕິດແທດປະຊາຊົນນຳພາສ້າງສາໃຫ້ເຂົາເຈົ້າຢູ່ດີກິນດີນັ້ນເປັນຍຸດທະສາດ ທັງເປັນຄວາມມຸ້ງຫວັງຂອງພັກ ແລະ ລັດຖະບານເຮົາ.
ແຕ່ກໍໜ້າເສຍດາຍ ແລະ ເປັນຫ່ວງໃນການລົງຮາກຖານຂອງພະນັກງານ, ທະຫານ, ຕຳຫລວດນັ້ນ ຢູ່ບາງເມືອງ ຊາທິດກໍ່າໄດ້ໄປເຫັນຕົວຈິງ ແລະ ໄດ້ຟັງປະຊາຊົນເຂົາພາກັນຈົ່ມວ່າ ແທນທີ່ຈະລົງໄປຊ່ວຍເຫລືອນຳພາປະຊາຊົນ ແມ່ນໄປສ້າງຄວາມລຳບາກກາກກຳໃຫ້ເຂົາ, ໄປມ້າງເພຄວາມສະຫງົບສຸກ ແລະ ຄວາມສາມັກຄີ ເປັນຕົ້ນເຂົາຂາຍງົວຂາຍຄວາຍ ເພິ່ນກໍໄປເກັບຄ່າທຳນຽມເປັນໂຕລະ, ປະຊາຊົນເຂົາໄປຕັດເອົາໄມ້ຕາມຫົວໄຮ່ປາຍນາເຂົາເອງມາເຮັດເຮືອນເຮັດຊານ ຫລື ເຜົາຖ່ານຂາຍກໍເກັບຄ່າທຳນຽມເປົາລະ, ປະຊາຊົນເຂົາເອົາຈັກຕັດໄມ້ຖາງປ່າເພື່ອບຸກເບີກດິນດອນຕອນຫຍ້າຂອງເຂົາເອງເພື່ອທຳການຜະລິດປູກຢາງພາລາ, ເຮັດເປັນບ່ອນປູກຝັງລ້ຽງສັດກໍຕ້ອງໄດ້ເສຍຄ່າທຳນຽມຄັ້ງລະ, ຕອນລະ ທັງໆທີ່ເຂົາບໍ່ມີຢູ່ມີກິນ, ຕ້ອງດິ້ນລົນເພື່ອໃຫ້ກຸ້ມປາກກຸ້ມທ້ອງ. ນອກຈາກນັ້ນ ຍັງມີຫລາຍຢ່າງຫລາຍແນວເພິ່ນໄປຫາເລາະປັບໄໝຈົນປະຊາຊົນເຂົາເບື່ອ ແລະ ທັງຈົ່ມວ່າພະນັກງານລົງຮາກຖານແບບນີ້, ແທນທີ່ຈະມານຳພາສ້າງສາໃຫ້ປະຊາຊົນມີຢູ່ມີກິນ ພັດມາຫາເລາະປັບໄໝເອົາເງິນເຂົ້າຖົງຕົນເອງ. ການປັບໄໝອັນໃດຄວນອັນໃດບໍ່ຄວນກໍຕ້ອງໄດ້ໄຕ່ຕອງຕາມກົດໝາຍ, ແຕ່ອັນນີ້ພັດມາຂູດຮີດປະຊາຊົນຕື່ມ. ຍິ່ງໄປກວ່ານັ້ນ ກະໂຕພະນັກງານກໍ່ສ້າງຮາກຖານເພິ່ນພັດພາກັນໄປເຮັດເອງ, ຍັງບໍ່ເປັນຕົວແບບ, ຫ້າມປະຊາຊົນເຮັດ ແຕ່ຕົນເອງພັດພາກັນເຮັດ ເປັນຕົ້ນໄປຫາເລາະຕັດໄມ້ຄ້າໄມ້ກັບພວກເຄືອຂ່າຍຫາກິນນຳໄມ້ຢູ່ທ້ອງຖິ່ນຊົນນະບົດ, ໄປຫາເລາະຊອດເອົາປາມາກິນເຫລືອກິນເອົາໄປຂາຍ ແລະ ບັນຫາອື່ນໆທີ່ຍັງມີການຂັດແຍ່ງກັບປະຊາຊົນທາງດ້ານຜົນປະໂຫຍດໃຫ້ຕົນເອງ.
ຈາກພຶດຕິກຳຂອງພະນັກງານກໍ່ສ້າງຮາກຖານຄືແນວນີ້ ມັນກົງກັບຄຳເຫັນຂອງທ່ານນາຍົກລັດຖະມົນຕີ ທອງລຸນ ສີສຸລິດ ວ່າ: ກ່ຽວກັບເລື່ອງເຈົ້າໜ້າທີ່ ຫລື ພະນັກງານທີ່ມີການຕັ້ງດ່ານກວດກາໄມ້ຕາມເຂດບ້ານເມືອງຕ່າງໆພາຍໃນແຂວງຈຳປາສັກໃນຜ່ານມາ ໄດ້ມີມະຕິສັ່ງຫ້າມຕັດໄມ້ທຳລາຍປ່າ ແລະ ສົ່ງອອກຕ່າງປະເທດກໍຈິງ, ແຕ່ກໍເປັນການຫ້າມສະເພາະໄມ້ໃຫຍ່ທີ່ມີນາຍທຶນເຂົ້າມາຊື້ ຫລື ມີນາຍໜ້ານຳພາຕັດຂາຍກັນແບບລັກລອບ ຫລື ໄດ້ຮັບອະນຸມັດຈາກຂັ້ນເມືອງ ແລະ ແຂວງນັ້ນ, ອັນນີ້ແມ່ນຫ້າມເດັດຂາດ ແລະ ຫ້າມຝ່າຝືນ. ສ່ວນປະຊາຊົນທີ່ເຂົາຕັດເລື່ອຍໄປເຮັດປຸກສ້າງແທ້ໆນັ້ນແມ່ນນະໂຍບາຍເຂົາ, ຢ່າໄປຍຶດຂອງເຂົາ, ຕ້ອງສົ່ງເສີມໃຫ້ເຂົາເຮັດເຂົາສ້າງ, ປະຊາຊົນຮັ່ງມີ, ມີເຮືອນງາມ, ຢູ່ດີກິນດີ ຈຶ່ງເອີ້ນວ່າ ປະເທດຊາດຈະເລີນຮັ່ງມີ. ມີບາງເມືອງ ພະນັກງານຂັ້ນກຸ່ມທີ່ຖືກແຕ່ງຕັ້ງຈາກເມືອງລົງສູ່ຮາກຖານ ໄດ້ອອກລາດຕະເວນພົບເຫັນປະຊາຊົນຂົນໄມ້ຊິເອົາໄປເຮັດເຮືອນພັດໄປຍຶດເອົາຂອງເຂົາ, ປັບໄໝເຂົາ. ອັນນີ້ບໍ່ສົມຄວນເຮັດ ເພາະມັນເປັນການຂູດຮີດປະຊາຊົນ. ລັດຕ້ອງເບິ່ງແຍງດູແລປະຊາຊົນ, ຕ້ອງຊ່ວຍເຫລືອນຳພາປະຊາຊົນສ້າງສາພັດທະນາ ບໍ່ແມ່ນໄປຢູ່ນຳປະຊາຊົນຫາຈ້ອງແຕ່ຈັບຜິດ. ເປັນພະນັກງານຂອງລັດຕ້ອງມີຈັນຍາບັນ ແລະ ເບິ່ງແຍງປະຊາຊົນ. ເລື່ອງການຖາງປ່າເຮັດສວນກໍຄືກັນ ບໍ່ຄວນໄປຫ້າມເຂົາ, ເຂົາຮູ້ຈັກເຮັດຮູ້ຈັກປູກມັນດີແລ້ວ ເພາະເຂົາບໍ່ມີເງິນເດືອນກິນ, ເຂົາເປັນຄົນທຸກຈົນ, ເຂົາກໍເຮັດໄປຕາມທຳມະຊາດຂອງເຂົາ ຊິໄປຫ້າມເຂົາເຮັດຫຍັງ. ມີພະນັກງານບາງຄົນຫ້າມເຂົາ ແຕ່ຕົນເອງພັດໄປຈັບຈ່ອງແທນ ອັນນີ້ໝາຍຄວາມວ່າແນວໃດ. ຫ້າມເຂົາບໍ່ໃຫ້ເຂົາເຮັດເຂົາຊິກິນຫຍັງ, ແຕ່ພໍມີນາຍທຶນຊາວຕ່າງຊາດຈີນ, ຫວຽດເຂົ້າມາສຳປະທານ ພັດອະນຸມັດໃຫ້ເຂົາຢ່າງໄວ ໂດຍທີ່ລັດຖະບານບໍ່ຮູ້ນຳກໍມີ ອັນນີ້ບໍ່ສົມຄວນເຮັດ. ເລື່ອງການສຳປະທານທີ່ດິນພາຍໃນແຂວງຈຳປາສັກ ຫລາຍກວ່າໝູ່ແມ່ນເມືອງມູນລະປະໂມກ, ມີຫລາຍໂຄງການເຮັດແບບຫລວງຫລາຍ, ແບບຈອງດິນໄວ້ຂາຍຕໍ່ກໍແມ່ນເຮັດບໍ່ໄປບໍ່ມາ, ພໍແຕ່ຕົວະເອົາເງິນຈາກຂັ້ນເທິງເສຍລ້າ… ນີ້ຄືບັນດາປາກົດການຫຍໍ້ທໍ້ທີ່ມັນຍັງຝັງເລິກຢູ່ນຳພະນັກງານກໍ່ສ້າງຮາກຖານຢູ່ຂັ້ນບ້ານ, ກຸ່ມບ້ານ, ມັນມີສາຍໄຍລາມພະລາມຈົວຢູ່ໃນຫລາຍບ້ານ, ຫລາຍເມືອງ ແລະ ທ້ອງຖິ່ນໃນແຕ່ລະແຂວງທີ່ຕ້ອງໄດ້ພ້ອມກັນປົດແກ້ມັນ ບໍ່ສະເພາະແຕ່ບາງເມືອງໃນແຂວງຈຳປາສັກເທົ່ານັ້ນ.
