ຍ້ອນຫຍັງ ນະຄອນຫລວງວຽງຈັນຈຶ່ງປັບຂຶ້ນລາຄາຊີ້ນໝູ
ເມື່ອມີຂ່າວນີ້ອອກມາ ສັງຄົມຕ່າງກໍໃຫ້ຄວາມສົນໃຈຫລາຍວ່າ ເປັນຍ້ອນຫຍັງ ພະແນກອຸດສາຫະກຳ ແລະ ການຄ້ານະຄອນຫລວງວຽງຈັນຈຶ່ງປັບຂຶ້ນລາຄາຊີ້ນໝູຕື່ມອີກ, ໃນຂະນະທີ່ຄ່າຄອງຊີບຂອງປະຊາຊົນຍັງປະສົບຄວາມຫຍຸ້ງຍາກຫລາຍຈາກວິກິດຂອງພະຍາດໂຄວິດ-19.
ຕໍ່ບັນຫາດັ່ງກ່າວ, ຫົວໜ້າພະແນກອຸດສາຫະກຳ-ການຄ້ານະຄອນຫລວງ ໄດ້ໃຫ້ສຳພາດໜັງສືພິມວຽງຈັນໃໝ່ວ່າ: ຍ້ອນຕົ້ນທຶນຂອງການລ້ຽງໝູສູງ ເພາະໄດ້ນຳເຂົ້າໝູນ້ອຍ ແລະ ອາຫານສັດສູງຂຶ້ນເຖິງ 40%. ດັ່ງນັ້ນ ເພື່ອໃຫ້ຜູ້ປະກອບການລ້ຽງໝູຢູ່ລອດ ທາງພະແນກກ່ຽວຂ້ອງຈຶ່ງໄດ້ນຳເອົາບັນຫານີ້ເຂົ້າປຶກສາຫາລືໃນກອງປະຊຸມອົງການປົກຄອງນະຄອນຫລວງ ແລະ ໄດ້ຕົກລົງເຫັນດີໃຫ້ປັບຂຶ້ນລາຄາຊີ້ນໝູຕື່ມອີກ ນັບແຕ່ຂອດຜູ້ປະກອບການທຸລະກິດດ້ານນີ້ສົ່ງຂາຍໃຫ້ຕະຫລາດແມ່ນບໍ່ໃຫ້ເກີນ 26.000 ກີບຕໍ່ກິໂລ ຮອດລູກຂຽງແມ່ນໃຫ້ຂາຍກິໂລລະ 31.000 ກີບ ແລະ ລູກຂຽງຂາຍຕໍ່ໃຫ້ຜູ້ບໍລິໂພກທົ່ວໄປ ຊີ້ນໝູປະເພດໜຶ່ງແມ່ນໃຫ້ຂາຍກິໂລລະ 44.000 ກີບ, ປະເພດສອງ 41.000 ກີບຕໍ່ກິໂລ ແລະ ລາຄາໃໝ່ນີ້ແມ່ນໃຫ້ປະຕິບັດນັບແຕ່ວັນທີ 15 ກັນຍານີ້ເປັນຕົ້ນໄປ. ຖ້າໃຜລະເມີດແມ່ນຈະຖືກປັບໄໝຕາມລະບຽບກົດໝາຍ, ພ້ອມນັ້ນ ເບື້ອງເຈົ້າໜ້າທີ່ຮັບຜິດຊອບກໍມີແຜນຈະລົງຕິດຕາມກວດກາ ນັບແຕ່ໂຮງງານຂ້າສັດໄປຮອດຂອດຜູ້ຈຳໜ່າຍຊີ້ນໝູຕາມທ້ອງຕະຫລາດຕ່າງໆໃຫ້ເຂັ້ມງວດ ເພື່ອຫລີກລ່ຽງການສວຍໂອກາດຂຶ້ນລາຄາໂດຍລຳພັງ.
