ອິນເດຍສັ່ງ “ສະຖາບັນເຊຣຸ່ມ” ເດີນໜ້າທົດລອງວັກຊີນ ໂຄວິດ-19 ຫລັງເຄີຍຢຸດ ຫລັງພົບອາການຜິດປົກກະຕິ
ວັນທີ 16 ກັນຍາ, ສື່ທ້ອງຖິ່ນອິນເດຍລາຍງານວ່າ: ອົງການຄວບຄຸມຢາອິນເດຍ (DCGl) ໄດ້ສັ່ງໃຫ້ສະຖາບັນເຊຣຸ່ມອິນເດຍ (SII) ກັບມາດຳເນີນການທົດລອງທາງຄລີນິກໄລຍະທີ 2 ແລະ ໄລຍະທີ 3 ສຳລັບວັກຊີນໂຄວິຊີລ (Covishield) ຂອງມະຫາວິທະຍາໄລອອກຟອດ ຮ່ວມກັບບໍລິສັດການຢາລາຍໃຫຍ່ ແອສຕຣາເຊເນກາ (AstraZeneca).
ທ່ານ ວີຈີ ໂຊມານີ ຈາກອົງການຄວບຄຸມຢາອິນເດຍ ລະບຸໃນຈົດໝາຍເຖິງສະຖາບັນເຊຣຸ່ມອິນເດຍ ໃນວັນທີ 15 ກັນຍາວ່າ: ຄຳຊີ້ແຈງຂອງສະຖາບັນເຊຣຸ່ມອິນເດຍນັ້ນໄດ້ຮັບການ “ກວດສອບຢ່າງຮອບຄອບ” ໂດຍໄດ້ຮັບຄຳແນະນຳຈາກຄະນະກຳມະການກວດສອບຄວາມປອດໄພຂອງຂໍ້ມູນ (DSMB) ໃນອິນເດຍ ແລະ ສະຫະຣາຊະອານາຈັກ.
ໃນອາທິດຜ່ານມາ, ອົງການຄວບຄຸມຢາອິນເດຍໄດ້ສັ່ງຢຸດການທົດລອງດັ່ງກ່າວ ຫລັງແອສຕຣາເຊເນກາສັ່ງຢຸດການທົດລອງທາງຄລີນິກໃນປະເທດອື່ນໆຊົ່ວຄາວ ເນື່ອງຈາກມີຜູ້ເຂົ້າຮ່ວມທົດລອງຄົນໜຶ່ງມີ “ອາການເຈັບເປັນທີ່ບໍ່ສາມາດອະທິບາຍໄດ້”.
ລາຍງານລະບຸວ່າ: ສະຖາບັນເຊຣຸ່ມອິນເດຍໄດ້ສົ່ງລາຍງານສະຫລຸບກ່ຽວກັບການຕິດຕາມຄວາມປອດໄພ 7 ວັນຫລັງສັກວັກຊີນຄັ້ງທຳອິດ ໂດຍລະບຸວ່າບໍ່ມີອາການຮ້າຍແຮງໃດໆເກີດຂຶ້ນຕໍ່ຜູ້ເຂົ້າຮ່ວມທົດລອງ. ຂະນະທີ່ອາການບໍ່ເພິ່ງປະສົງທີ່ມີການລາຍງານນັ້ນຢູ່ໃນລະດັບບໍ່ຮຸນແຮງ, ເຊົາເອງໄດ້ ແລະ ບໍ່ມີຜົນກະທົບໃດໆ.
ສ່ວນແອສຕຣາເຊເນກາ ໄດ້ກັບມາເດີນໜ້າທົດລອງວັກຊີນດັ່ງກ່າວຢູ່ສະຫະຣາຊະອານາຈັກແລ້ວ.
ທັງນີ້ອິນເດຍເກີດການລະບາດຂອງໂຄວິດ-19 ຢ່າງໜັກເປັນອັນດັບ 2 ຂອງໂລກ ໂດຍມີຜູ້ຕິດເຊື້ອເພີ່ມສູງຂຶ້ນທຸກມື້ ໂດຍວັນທີ 16 ກັນຍາ ອິນເດຍລາຍງານຜູ້ຕິດເຊື້ອສະສົມຂອງປະເທດເຖິງ 5 ລ້ານຄົນ ຫລັງພົບຜູ້ຕິດເຊື້ອໃໝ່ 90.123 ຄົນ ແລະ ມີລາຍງານຜູ້ເສຍຊີວິດເພີ່ມ 1.290 ຄົນ.
