ເອກອັກຄະລັດຖະທູດວິສາມັນຜູ້ມີອຳນາດເຕັມຂອງສະຫະລັດປະຈຳຢູ່ ສປ ຈີນ ລາອອກຢ່າງກະທັນຫັນ

ຕາມແຫຼ່ງຂ່າວຈາກ vnexpress, ວັນທີ 14 ກັນຍາ ລາຍງານວ່າ: ເອກອັກຄະລັດຖະທູດວິສາມັນຜູ້ມີອຳນາດເຕັມຂອງສະຫະລັດ ປະຈຳຢູ່ ສປ ຈີນ ລາອອກຢ່າງກະທັນຫັນ, ໃນທ່າມກາງການພົວພັນຂອງສອງປະເທດຢູ່ໃນຄວາມເຄັ່ງຕຶງສຸດໆ.

ລາຍງານຂ່າວວັນທີ 14 ກັນຍາລາຍງານວ່າ: ທ່ານທູດ erry Branstad ມີແຜນຈະອອກຈາກປັກກິງກ່ອນການເລືອກຕັ້ງປະທານາທິບໍດີສະຫະລັດໃນເດືອນພະຈິກທີ່ຈະມາເຖິງ.

ລັດຖະມົນຕີການຕ່າງປະເທດສະຫະລັດ Mike Pompeo ໄດ້ສະແດງຄວາມຂອບໃຈນຳທ່ານທູດທີ່ໄດ້ອອກແຮງເພື່ອປະຊາຊົນອາເມລິກາ ໃນນາມເປັນທູດຄົນໜຶ່ງປະຈຳຢູ່ ຈີນ. ທ່ານຂຽນວ່າ: “ປະທານາທິບໍດີ ໂດນັລທຣຳ ໄດ້ເລືອກເອົາ erry Branstad ໄປເປັນທູດຢູ່ປັກກິງກໍເພາະວ່າ ເຂົາມີບົດຮຽນປະສົບການເປັນເວລາຫຼາຍປີຜ່ານມາກັບຈີນ ຈຶ່ງເຫັນວ່າເປັນຜູ້ທີ່ມີຄວາມເໝາະສົມທີ່ສຸດຈະຕາງໜ້າໃຫ້ລັດຖະບານ ເພື່ອປົກປ້ອງສິດຜົນປະໂຫຍດຂອງປະເທດຊາດ, ເພື່ອອຸດົມການຂອງສະຫະລັດໃນການພົວພັນທີ່ສຳຄັນນີ້”.

ທ່ານ Mike Pompeo ບໍ່ໄດ້ໃຫ້ຮູ້ເຫດຜົນຂອງການລາອອກ ແລະ ກໍບໍ່ບອກໃຫ້ຮູ້ວ່າແມ່ນໃຜຈະໄປປ່ຽນແທນທ່ານ erry Branstad.

ຂ່າວຈາກ People’s Daily ໃຫ້ຮູ້ວ່າ: ສຳນັກຂ່າວສານຂອງພັກຄອມມຸຍນິດຈີນ ອອກຂ່າວເມື່ອວັນທີ 9 ກັນຍາໃຫ້ຮູ້ວ່າ: ຈີນປະຕິເສດການລົງໜ້າໜັງສືພິມບົດຂຽນຂອງທ່ານ Branstad ທີ່ກ່າວຫາຈີນ ສວຍໃຊ້ ການເປີດໃຈຂອງສະຫະລັດໃນຫຼາຍທົດສະວັດທີ່ຜ່ານມາ, ໂດຍອ້າງເຫດຜົນວ່າ: ບໍ່ຖືກກັບຄວາມເປັນຈິງ. People’s Daily ໃຫ້ຮູ້ເພີ່ມເຕີມວ່າ: ຖ້າທ່ານຢາກລົງໃນໜ້າໜັງສືພິມ ກໍຕ້ອງມີການດັດແປງເນື້ອໃນບາງຢ່າງ ບົນພື້ນຖານມີຄວາມສະເໝີພາບ ແລະ ເຄົາລົບຊຶ່ງກັນ ແລະ ກັນ.

ຂ່າວ: ລູກເມືອງພວນ.