ຈີນ ເຜີຍວ່າປະເທດກຸ່ມລຸ່ມແມ່ນຳ້ຂອງຈະໄດ້ກ່ອນ ຫາກວັກແຊັງໂຄວິດ-19 ພັດທະນາສຳເລັດ

ຕາມການລາຍງານເມື່ອເດືອນທີ່ຜ່ານມາ ສະຫາຍ ຫລີ່ເຄີ່ສຽງ ນາຍົກລັດຖະມົນຕີຈີນ ເປີດເຜີຍວ່າ : ຈີນຈະໃຫ້ຄວາມສຳຄັນກັບການຈັດສັນວັກແຊັງປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ – 19) ແກ່ກຸ່ມປະເທດລຸ່ມແມ່ນຳ້ຂອງກ່ອນ ເມື່ອວັກແຊັງໄດ້ຮັບການພັດທະນາສຳເລັດ ແລະ ຖືກນຳໄປໃຊ້ຈິງ.

ໂດຍທ່ານນາຍົກລັດຖະມົນຕີຈີນກ່າວຂະນະເຂົ້າຮ່ວມກອງປະຊຸມຜູ້ນຳຄວາມຮ່ວມມືແມ່ນຳ້ລ້ານຊ້າງ – ແມ່ນຳ້ຂອງ (LMC) ຄັ້ງທີ 3 ຜ່ານລະບົບວີດີໂອ ໂດຍລະບຸວ່າ : ຈີນຈະຈັດຕັ້ງກອງທຶນພິເສດເພື່ອສົ່ງເສີມພາກສາທາລະນະສຸກພາຍໃຕ້ຄວາມຮ່ວມມືຂອງກອງທຶນພິເສດແມ່ນຳ້ລ້ານຊ້າງ – ແມ່ນຳ້ຂອງ (LMC Special Fund) ແລະ ຈະສືບຕໍ່ຈັດສັນອຸປະກອນປ້ອງກັນພະຍາດລະບາດ ແລະ ການສະໜັບສະໜູນທາງເຕັກນິກແກ່ກຸ່ມປະເທດລຸ່ມແມ່ນຳ້ຂອງຕໍ່ໄປ.

ນອກຈາກນັ້ນ ທ່ານນາຍົກລັດຖະມົນຕີຍັງເນັ້ນຕື່ມເຖິງຄວາມສຳຄັນຂອງຄວາມເປັນນຳໜຶ່ງໃຈດຽວກັນ ແລະ ຄວາມຮ່ວມມືໃນການຕໍ່ສູ້ກັບການລະບາດໃຫຍ່ທົ່ວໂລກ ພ້ອມເສີມວ່າ ຈີນຍິນດີດຳເນີນງານຮ່ວມກັບກຸ່ມປະເທດລຸ່ມແມ່ນຳ້ຂອງ ເພື່ອສະໜັບສະໜູນການເຮັດວຽກຂອງອົງການອະນາໄມໂລກນຳອີກ.