ໄທ-ມຽນມາ-ກຳປູເຈຍ ຈູດທຳລາຍຢາເສບຕິດ ມູນຄ່າເກືອບ 1.000 ລ້ານໂດລາ
ທາງການໄທ, ມຽນມາ ແລະ ກຳປູເຈຍ ຈັດພິທີຈູດທຳລາຍຢາເສບຕິດທີ່ຍຶດໄດ້ມູນຄ່າລວມກັນເກືອບ 1.000 ລ້ານໂດລາສະຫະລັດ ເນື່ອງໃນໂອກາດວັນສາກົນຕ້ານຢາເສບຕິດ ຂອງອົງການສະຫະປະຊາຊາດ, ແຕ່ຢາເສບຕິດທີ່ຍຶດໄດ້ເປັນພຽງສ່ວນນ້ອຍໆຂອງບັນຫາຢາເສບຕິດໃນພາກພື້ນທີ່ກຳລັງຂະຫຍາຍຕົວຕາມປະລິມານຄວາມຕ້ອງການຢາເສບຕິດທີ່ເພີ່ມຂຶ້ນຢ່າງຕໍ່ເນື່ອງ.
ພິທີຈູດທຳລາຍຢາເສບຕິດໃນວັນທີ 26 ມິຖຸນານີ້ ຈັດຂຶ້ນຫລາຍແຫ່ງໃນປະເທດໄທ, ມຽນມາ ແລະ ກຳປູເຈຍ ໂດຍຢູ່ໄທມີການຈັດພິທີຈູດທຳລາຍຢາເສບຕິດຢູ່ເຂດນິຄົມອຸດສາຫະກຳບາງປະອິນ ແຂວງພະນະຄອນສີອະຍຸດທະຍາ ໂດຍຢາເສບຕິດທີ່ຖືກຈູດທຳລາຍມີທັງຢາບ້າກວ່າ 7.800 ກິໂລ ແລະ ຢາໄອສ 1.185 ກິໂລ ຄິດເປັນມູນຄ່າປະມານ 589 ລ້ານໂດລາສະຫະລັດ.
ຂະນະທີ່ທາງການມຽນມາໄດ້ຈັດພິທີຈູດທຳລາຍຢາເສບຕິດຂຶ້ນ 3 ແຫ່ງທົ່ວປະເທດ ໂດຍຕຳຫລວດລະດັບສູງທ່ານໜຶ່ງຢູ່ນະຄອນຫລວງເນປີດໍ ເປີດເຜີຍວ່າ: ພິທີໃນເທື່ອນີ້ຖືເປັນການຈູດທຳລາຍຢາເສບຕິດຄັ້ງໃຫຍ່ທີ່ສຸດເປັນປະຫວັດສາດ ຄິດເປັນມູນຄ່າປະມານ 385 ລ້ານໂດລາສະຫະລັດ ເນື່ອງຈາກຕຳຫລວດຍຶດຢາເສບຕິດໄດ້ເພີ່ມຂຶ້ນໃນໄລຍະຫລາຍປີຜ່ານມາ ໂດຍພິທີຈູດທຳລາຍໃຫຍ່ທີ່ສຸດຈັດຂຶ້ນຢູ່ນະຄອນຢາງກຸ້ງ ເຊິ່ງເປັນການຈູດຝິ່ນ, ເຮໂຣອິນ, ໂຄເຄນ ແລະ ຢາບ້າ ມູນຄ່າເກືອບ 230 ລ້ານໂດລາສະຫະລັດ.
ເຖິງວ່າການຍຶດຢາເສບຕິດໄດ້ເປັນຈຳນວນຫລາຍຈະເປັນສິ່ງທີ່ສະແດງໃຫ້ເຫັນວ່າປະເທດຕ່າງໆກຳລັງດຳເນີນຄວາມພະຍາຍາມໃນການປາບປາມການຄ້າຢາເສບຕິດໃນພາກພື້ນ, ແຕ່ເຈົ້າໜ້າທີ່ດ້ານກົດໝາຍຊີ້ວ່າ: ຈຳນວນຢາເສບຕິດທີ່ຍຶດໄດ້ ແລະ ນຳມາຈູດທຳລາຍເທື່ອນີ້ເປັນພຽງສ່ວນນ້ອຍໆຂອງຢາເສບຕິດໃນອາຊີຕາເວັນອອກສຽງໃຕ້ທີ່ບັນດາຜູ້ຜະລິດເລັ່ງເພີ່ມກຳລັງການຜະລິດເພື່ອຕອບສະໜອງກັບຄວາມຕ້ອງການຢາເສບຕິດທີ່ກຳລັງເພີ່ມຂຶ້ນໃນພາກພື້ນ ລວມທັງຢູ່ບັງກະລາເທດ ແລະ ອິນເດຍ. ນອກຈາກນີ້ ບັນດາລາຊາຢາເສບຕິດບໍລິເວນສາມຫລ່ຽມຄຳມັກບໍ່ຄ່ອຍຖືກຈັບ ຫລື ຄາດຕະກຳຄືລາຊາຢາເສບຕິດຢູ່ເຂດອາເມລິກາລາຕິນ.
