ທ່ານຮອງນາຍົກ ສອນໄຊ ສີພັນດອນ ລົງເຄື່ອນໄຫວຊຸກຍູ້ການພັດທະນາ ເສດຖະກິດ-ສັງຄົມທີ່ແຂວງເຊກອງ
ເມື່ອທ້າຍອາທິດຜ່ານມາ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແລະ ຄະນະໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງໂດຍມີທ່ານ ຄຳເຜີຍ ບຸດດາວຽງ ເຈົ້າແຂວງເຊກອງພ້ອມດ້ວຍຄະນະນຳແຂວງ ແລະ ພະແນກການທີ່ກ່ຽວຂ້ອງໃຫ້ການຕ້ອນຮັບຢ່າງອົບອຸ່ນ ແລະ ພາຍຫລັງໄດ້ຮັບຟັງລາຍງານສະພາບການ ພັດທະນາເສດຖະກິດ- ສັງຄົມ ຈາກທ່ານເຈົ້າແຂວງແລ້ວທ່ານ ຮອງນາຍົກລັດຖະມົນຕີກໍໄດ້ສະ ແດງຄວາມຍ້ອງຍໍຊົມເຊີຍຕໍ່ບັນດາຜົນງານທີ່ອຳນາດການປົກ ຄອງ ແລະ ປະຊາຊົນແຂວງເຊ ກອງຍາດມາໄດ້ ໃນໄລຍະຜ່ານ ມາ. ພ້ອມທັງເນັ້ນໃຫ້ເອົາໃຈໃສ່ ບາງບັນຫາສຳຄັນເປັນຕົ້ນເກັບ ລາຍຮັບງົບປະມານໃຫ້ໄດ້ຕາມ ຄາດໝາຍທີ່ສະພາແຫ່ງຊາດໄດ້ຮັບຮອງ, ກວດກາຄືນຖານລາຍຮັບ ຕົວຈິງໃຫ້ມີຄວາມໂປ່ງໃສ ແລະ ອັດຕັນບໍ່ໃຫ້ມີການຮົ່ວໄຫລ, ເອົາໃຈໃສ່ຊຸກຍູ້ການຜະລິດລະດູຝົນ, ໂດຍສະເພາະການເຝົ້າລະວັງໄພພິບັດ ແລະ ການລະບາດຕາມລະດູການເພື່ອປ້ອງ ກັນຜົນກະທົບທີ່ຈະເກີດຂຶ້ນ, ພ້ອມກັນຄົ້ນຄວ້າຕື່ມດ້ານການພັດທະນາເສດຖະກິດທັງໃນເຂດຕົວເມືອງ ແລະ ເຂດຊົນນະບົດ, ບັນດາທ່າແຮງບົ່ມຊ້ອນ ແລະ ຕະຫລາດຮອງຮັບເພື່ອ ເປັນຍູ້ການຜະລິດເປັນສິນຄ້າໃຫ້ມີຄວາມເຂັ້ມແຂງສ້າງລາຍຮັບຕົວຈິງແກ່ປະຊາຊົນ ແລະ ສຸມໃສ່ການຈັດຕັ້ງປະຕິ ບັນເປົ້າໝາຍການພັດທະນາຍືນຍົງ (SDGs) ໃຫ້ປະກົດຜົນ ເປັນຈິງ.
+ ຮອງນາຍົກລັດຖະມົນຕີ ສອນໄຊ ສີພັນດອນ ໄຫວຢ້ຽມຢາມແຂວງຈຳປາສັກ
ໃນໂອກາດນີ້, ທ່ານ ຄຳເຜີຍ ບຸດດາວຽງ ໄດ້ລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2017, ເຊິ່ງເຫັນວ່າແຂວງເຊກອງສືບຕໍ່ມີ ສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ-ມີຄວາມ ເປັນລະບຽບຮຽບຮ້ອຍ, ເສດຖະກິດມີການຫຍາຍຕົວຢ່າງຕໍ່ເນື່ອງໃນລະດັບ 9,1%, ລວມຍອດ ຜະລິດຕະພັນ (GDP) ບັນລຸ 1.500 ກວ່າຕື້ກີບ, ສະ ເລ່ຍລາຍຮັບ 13,2 ລ້ານກີບຕໍ່ຄົນຕໍ່ປີ, ສາມາດເກັບລາຍຮັບເຂົ້າງົບປະມານ ໃນພູດຂອງ ແຂວງບັນລຸ 22,2 ກວ່າຕື້ກີບ ເທົ່າກັບ 32,2% ຂອງແຜນການທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 6,35%; ດ້ານການລົງທຶນມີ ທັງໝົດ 286 ໂຄງການປະຕິບັດສຳເລັດ 100% ມີ 118 ໂຄງ ການ; ສຳລັບການປູກ- ການລ້ຽງ ແລະ ການຜະລິດກະສິກຳເປັນສິນຄ້າແມ່ນມີລັກສະນະຂະຫຍາຍຕົວຢ່າງກວ້າງຂວາງ ແລະ ເພີ່ມຂຶ້ນພົ້ນເດັ່ນແມ່ນການປູກໜໍ່ໄມ້ ແລະ ກ້ວຍ ຢູ່ເມືອງລະມາມ, ທ່າແຕງ ແລະ ເມືອງກະລຶມ ໃນເນື້ອທີ່ 100 ກວ່າເຮັກຕາ ແລະຈະຂະຫຍາຍໃຫ້ໄດ້ອີກ 200 ເຮັກຕາໂດຍການເຮັດສັນຍາກັບກຸ່ມບໍລິສັດພອນສັກ; ດ້ານການພັດທະນາ ຊົນນະບົດ ແມ່ນມີຄາດໝາຍ ສູ້ຊົນເຮັດໃຫ້ອັດຕາຄອບຄົວທຸກຍາກຫລຸດລົງເຫລືອ 9% ໂດຍສຸມໃສ່ປະຕິບັດ 4 ແຜນງານໃຫຍ່ທີ່ເປັນບູລິມະສິດຄື: ແຜນງານພັດທະນາຊົນນະບົດ ແລະ ແກ້ໄຂຄວາມທຸກຍາກ, ແຜນງານຍົກສະມັດຕະພາບ, ຄຸນນະພາບການຜະລິດຕິດພັນກັບການຜະລິດເປັນສິນຄ້າ, ແຜນງານສົ່ງເສີມ ແລະ ພັດທະນາທ່ອງທ່ຽວ ແລະ ແຜນງານ ປັບປຸງ-ພັດທະນາພື້ນຖານ ໂຄງລ່າງອັນຈຳເປັນໃຫ້ດີຂຶ້ນເທື່ອລະກ້າວ.
