ລາວເລັ່ງພັດທະນາກິລາຣັກບີ້
ພິທີເຊັນສັນຍາຮ່ວມມືພັດທະນາກິລາຣັກບີ້ລາວ ກໍຄືທີມນັກກິລາບ້ານ SOS ລະຫວ່າງທ່ານ ສຸມາຕາ ແດງຈໍາປາ ຜູ້ອໍານວຍການໂຄງການບ້ານຊ່ວຍເຫລືອເດັກ ເອັສໂອເອັສ ລາວ ແລະ ທ່ານ ກິລິຍາ ບັນຈົງພັກດີ ເລຂາທິການສະຫະພັນຣັກບີ້ແຫ່ງຊາດລາວ ໄດ້ມີຂຶ້ນໃນວັນທີ 14 ກັນຍານີ້ ທີ່ນະຄອນຫລວງວຽງຈັນ ເພື່ອແນໃສ່ຜັນຂະຫຍາຍແຜນຍຸດທະສາດຂອງສະຫະພັນຣັກບີ້ແຫ່ງຊາດລາວໃຫ້ເຂົ້າກັບແຜນພັດທະນາກິລາຂອງລັດຖະບານ ກໍຄືກະຊວງສຶກສາທິການ ແລະ ກິລາວາງອອກ ເພື່ອສ້າງນັກກິລາລາວໃຫ້ດີ ແລະ ເກັ່ງ ເພື່ອຈະກາຍເປັນຕົວແທນໄປແຂ່ງຂັນຢູ່ຕ່າງປະເທດ. ສະນັ້ນ, ບ້ານຊ່ວຍເຫລືອເດັກ SOS ຈະສະໜອງນັກກິລາທັງໝົດ 4 ທີມຄື: ທີມຊາຍ-ຍິງ ປະເພດລະ 2 ທີມ, ຈາກບ້ານຊ່ວຍເຫລືອເດັກ SOS ຢູ່ນະຄອນຫລວງວຽງຈັນ ແລະ ແຂວງຊຽງຂວາງ. ສ່ວນສະຫະພັນຣັກບີ້ແຫ່ງຊາດ ຈະຮັບຜິດຊອບການສະໜອງອຸປະກອນ ແລະ ຝຶກສອນທາງດ້ານເຕັກນິກກິລາດັ່ງກ່າວໃຫ້ອາທິດລະ 1-2 ຄັ້ງ, ພ້ອມທັງຮັບຜິດຊອບຄ່າໃຊ້ຈ່າຍຕ່າງໆ ໃນເວລາໄປຮ່ວມການແຂ່ງຂັນທັງຢູ່ໃນລະດັບຢູ່ພາຍໃນ ຫລື ຢູ່ຕ່າງປະເທດອີກດ້ວຍ.
ທ່ານ ສຸມາຕາ ແດງຈໍາປາ ໄດ້ກ່າວວ່າ: ໂຄງການບ້ານຊ່ວຍເຫລືອເດັກ SOS ສາກົນສ້າງຕັ້ງຂຶ້ນໃນປີ 1949 ມີ 135 ປະເທດທົ່ວໂລກ. ສໍາລັບຢູ່ ສປປ ລາວເຮົາ ໄດ້ສ້າງຂຶ້ນໃນປີ 1993 ເປັນອັນດັບ 124 ຂອງໂລກ, ມີ 6 ແຫ່ງ, ປັດຈຸບັນມີເດັກນ້ອຍຢູ່ພາຍໃຕ້ການຄຸ້ມຄອງຂອງບ້ານຊ່ວຍເຫລືອເດັກ SOS ຫລາຍກວ່າ 900 ຄົນ. ນອກນີ້, ຍັງມີໂຮງຮຽນ SOS ອີກ 5 ແຫ່ງ ຢູ່ໃນປະເທດເຮົານໍາອີກ.
ບ້ານ SOS ແມ່ນສະຖານທີ່ລ້ຽງດູ-ເບິ່ງແຍ່ງເດັກກໍາພ້າ-ກໍາພອຍ ແລະ ດ້ອຍໂອກາດ, ເດັກທີ່ມີຄວາມສ່ຽງສູນເສຍພໍ່ແມ່ ຫລື ຄອບຄົວ ໂດຍເຮັດໜ້າທີ່ເບິ່ງແຍງ, ໃຫ້ຄວາມຮັກແພງເດັກນ້ອຍທຸກຄົນຢູ່ພາຍໃນບ້ານໃຫ້ມີຄວາມອົບອຸ່ນ ເຊິ່ງຖືເປັນວຽກງານສົງເຄາະໜຶ່ງທີ່ລັດຖະບານເຮົາໄດ້ໃຫ້ຄວາມສໍາຄັນ ແລະ ການຮ່ວມມືຄັ້ງນີ້ຖືເປັນໂອກາດທີ່ດີເພື່ອສ້າງນັກກິລາແຕ່ເຍົາໄວໃຫ້ກາຍເປັນນັກກິລາດີເດັ່ນໃນອານາຄົດ.
