ລັດຖະມົນຕີກະຊວງ ຖວທ ແນະນຳໃຫ້ຫລວງພະບາງເອົາໃຈໃສ່ ພັດທະນາການທ່ອງທ່ຽວ ແລະ ປົກປັກຮັກສາວັດທະນະທຳໃຫ້ໂດດເດັ່ນ
ໂອກາດຢ້ຽມຢາມຫລວງພະບາງໃນວັນທີ 9 ກັນຍານີ້ ທ່ານ ກິແກ້ວ ໄຂຄໍາພິທູນ ລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ລົງພົບປະໂອ້ລົມພະນັກງານ-ລັດຖະກອນພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງຫລວງພະບາງ ໂດຍໄດ້ແນະນຳໃຫ້ແຂວງເອົາໃຈໃສ່ພັດທະນາພື້ນຖານໂຄງລ່າງດ້ານການທ່ອງທ່ຽວຂອງແຂວງໃຫ້ມີຄວາມຍືນຍົງ ແລະ ສາມາດດຶງດູດນັກທ່ອງທ່ຽວເຂົ້າມາທ່ອງທ່ຽວໃຫ້ຫລາຍຂຶ້ນ.
ໃນໂອກາດນີ້, ຫົວໜ້າພະແນກ ຖວທ ແຂວງ ໄດ້ລາຍງານສະພາບການພັດທະນາ ແລະ ການອານຸລັກຮັກສາ ແລະ ຂະຫຍາຍວັດທະນະທໍາໃຫ້ມີລັກສະນະຊາດ, ລັກສະນະປະຊາຊົນ ແລະ ລັກສະນະກ້າວໜ້າ ໂດຍໄດ້ສຸມໃສ່ຄຸ້ມຄອງປົກປັກຮັກສາມໍລະດົກໂລກໃຫ້ຍືນຍົງຄົງຄຸນຄ່າທຳມະຊາດ, ວັດທະນະທຳ ແລະ ປະຫວັດສາດ, ຮັກສາໄດ້ມູນເຊື້ອທີ່ເປັນເອກະລັກ ແລະ ເສີມຂະຫຍາຍພູມປັນຍາທ້ອງຖິ່ນຕະຫລອດມາ ບົນຈິດໃຈແນໃສ່ສ້າງຫລວງພະບາງໃຫ້ກາຍເປັນອຸດສາຫະກຳການທ່ອງທ່ຽວທີ່ຍືນຍົງ, ທັນສະໄໝ ແລະ ມີຄຸນນະພາບ, ທັງເປັນການສົ່ງເສີມການທ່ອງທ່ຽວໂດຍການມີສ່ວນຮ່ວມຂອງປະຊາຊົນ ແລະ ເຮັດໃຫ້ເສດຖະກິດຂອງແຂວງຂະຫຍາຍຕົວຢ່າງຕໍ່ເນື່ອງ.
ໃນໂອກາດດຽວກັນນີ້, ທ່ານລັດຖະມົນຕີ ໄດ້ມີຄຳເຫັນສະແດງຄວາມຊົມເຊີຍຕໍ່ຜົນສຳເລັດທີ່ພະແນກ ຖວທ ແຂວງຍາດມາໄດ້ໃນໄລຍະຜ່ານມາ ໂດຍສະເພາະການພັດທະນາພື້ນຖານໂຄງລ່າງດ້ານການທ່ອງທ່ຽວ, ພ້ອມທັງຮຽກຮ້ອງໃຫ້ພະນັກງານ-ລັດຖະກອນພາຍໃນພະແນກກຳແໜ້ນແນວທາງນະໂຍບາຍຂອງພັກ-ລັດ, ກຳແໜ້ນເນື້ອໃນ, ວຽກງານວິຊາສະເພາະຂອງຕົນເອງໃຫ້ລະອຽດ ແນໃສ່ເຮັດໃຫ້ວຽກງານຂະແໜງຖະແຫລງຂ່າວ ກໍຄືການໂຄສະນາເຜີຍແຜ່ຂໍ້ມູນຂ່າວສານຕ່າງໆ ໃຫ້ມີຄວາມຖືກຕ້ອງຊັດເຈນ, ພ້ອມທັງໃຫ້ປ່ຽນວິຖີການເຮັດວຽກ, ວິຖີການດຳລົງຊີວິດແບບໃໝ່, ຕ້ອງມີຄວາມຮັບຜິດຊອບໃນການນໍາສະເໜີຂ່າວ, ເອົາຫາງສຽງຂອງສັງຄົມ ກໍຄືສຽງຈົ່ມວ່າຂອງປະຊາຊົນໄປຄົ້ນຄິດ, ໄປປຶກສາຫາລືກັນເພື່ອປັບປຸງແກ້ໄຂໃຫ້ມັນຖືກຕ້ອງສອດຄ່ອງ, ພ້ອມທັງໃຫ້ຮັກສາວັດທະນະທຳ ຮີດຄອງປະເພນີອັນດີງາມຂອງທ້ອງຖິ່ນ ກໍຄືຂອງຊາດໄວ້ໃຫ້ຍືນນານ.
ພ້ອມດຽວກັນນັ້ນ, ໃຫ້ຄະນະພັກ, ຄະນະນຳ, ພະນັກງານຫລັກແຫລ່ງກຳແໜ້ນແນວທາງນະໂຍບາຍຂອງພັກ, ລັດ, ເຮັດໜ້າທີ່ການເມືອງຂອງຕົນໃຫ້ສຳເລັດຜົນຕາມການມອບໝາຍ, ຄຽງຄູ່ກັນນັ້ນ ຕ້ອງຮັດແໜ້ນຄວາມສາມັກຄີເປັນປຶກແຜນ, ມີແບບແຜນນຳພາຕົວຈິງ, ຍົກສູງຄວາມເປັນແບບຢ່າງ, ມີນ້ຳໃຈເສຍສະຫລະ, ເອົາໃຈໃສ່ປັບປຸງກົນໄກການປະສານງານ ລະຫວ່າງສູນກາງກັບທ້ອງຖິ່ນ, ລະຫວ່າງແຂວງກັບເມືອງ, ເມືອງກັບບ້ານໃຫ້ມີຄວາມກົມກຽວກັນ.
