ຢູນີເຊບ ມອບລົດ ແລະ ເຄື່ອງຊ່ວຍເຫລືອໃຫ້ສະຫະພັນແມ່ຍິງລາວ

ໃນວັນທີ 10 ກັນຍານີ້, ທ່ານ ນາງ ເພຍ ບຣິດໂຕ ຜູ້ຕາງໜ້າອົງການຢູນີເຊບ (UNICEF) ປະຈໍາລາວ ໄດ້ມອບເຄື່ອງຊ່ວຍເຫລືອໃຫ້ສູນກາງສະຫະພັນແມ່ຍິງລາວ ເພື່ອນຳໃຊ້ເຂົ້າໃນວຽກງານຕ້ານການຄ້າມະນຸດ ແລະ ໃຊ້ຄວາມຮຸນແຮງຕໍ່ແມ່ ແລະ ເດັກນ້ອຍໃນໄລຍະການລະບາດຂອງພະຍາດໂຄວິດ-19, ເຊິ່ງ ປະກອບມີ: ລົດຕູ້ 1 ຄັນ, ຄອມພິວເຕີ 12 ໜ່ວຍ, ເຄື່ອງພິມ 6 ເຄື່ອງ, ເຄື່ອງສາຍພາບ (ໂປຣເຈັກເຕີ) 3 ຊຸດ, ອຸປະກອນສຸຂະອະນາໄມທີ່ຈໍາເປັນ ແລະ ເຄື່ອງຫລິ້ນຂອງເດັກ ເພື່ອການຮຽນຮູ້ ລວມມູນຄ່າຫລາຍກວ່າ 48.500 ໂດລາສະຫະລັດ, ເຊິ່ງຮັບໂດຍ ທ່ານ ນາງ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງດັ່ງກ່າວ.

ທ່ານ ນາງ ເພຍ ບຣິດໂຕ ໄດ້ມີຄໍາເຫັນວ່າ: ເຄື່ອງຊ່ວຍເຫລືອດັ່ງກ່າວ, ແມ່ນໄດ້ຮັບການສະໜັບສະໜູນ ຈາກລັດຖະບານຍີ່ປຸ່ນ, ອົງການກອຍກາ (KOICA), ອຸຍນີເຊບອົດສະຕຣາລີ ແລະ ອົງການພັດທະນາສາກົນອາເມລິກາ (USAID) ເພື່ອໃຫ້ສະຫະພັນແມ່ຍິງໄດ້ນຳໄປແຈກຢາຍໃຫ້ພາກສ່ວນຕ່າງໆ ຕາມຄວາມເໝາະສົມ ແລະ ໃນໄລຍະການລະບາດຂອງພະຍາດໂຄວິດ-19 ນີ້, ສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ ໄດ້ໃຫ້ບໍລິການແກ່ແມ່ຍິງ ແລະ ເດັກນ້ອຍຫລາຍກວ່າ 387 ຄົນ, ເພື່ອຊ່ວຍໃຫ້ພວກເຂົາຮູ້ສຶກປອດໄພ ໃນໄລຍະເວລາທີ່ຫຍຸ້ງຍາກນີ້.