ອັງກິດກຽມຫ້າມການພົບປະທາງສັງຄົມເກີນ 6 ຄົນ ທັງຢູ່ໃນເຮືອນ ແລະ ນອກເຮືອນ ເພື່ອຄວບຄຸມໂຄວິດ-19
ລັດຖະບານອັງກິດປະກາດມາດຕະການຫ້າມລວມຕົວ ຫລື ພົບປະທາງສັງຄົມເກີນ 6 ຄົນ ນັບແຕ່ວັນທີ 14 ກັນຍາເປັນຕົ້ນໄປ ເພື່ອຄວບຄຸມການແຜ່ລະບາດຂອງໂຄວິດ-19 ຫລັງຕົວເລກຜູ້ຕິດເຊື້ອຢູ່ສະຫະຣາຊະອານາຈັກຍັງເພີ່ມຂຶ້ນຢ່າງຕໍ່ເນື່ອງ.
ທາງການເປີດເຜີຍວ່າ: ການແກ້ໄຂກົດໝາຍຈະສົ່ງຜົນໃຫ້ການພົບປະກັນທາງສັງຄົມຂອງຄົນກຸ່ມໃຫຍ່ ບໍ່ວ່າຈະຢູ່ເຮືອນ ຫລື ກາງແຈ້ງເປັນເລື່ອງທີ່ຜິດກົດໝາຍ ໂດຍບັງຄັບໃຊ້ກັບເຮືອນສ່ວນຕົວ, ສະຖານທີ່ໃນຮົ່ມ ແລະ ກາງແຈ້ງ ລວມທັງຮ້ານບັນເທີງ, ສວນສາທາລະນະ ແຕ່ບໍ່ບັງຄັບໃຊ້ກັບໂຮງຮຽນ, ສະຖານທີ່ເຮັດວຽກ ລວມທັງງານແຕ່ງດອງ, ງານສົບ ຫລື ການແຂ່ງຂັນກິລາປະເພດທີມທີ່ມີມາດຕະການປ້ອງກັນໂຄວິດ-19.
ສຳລັບຜູ້ທີ່ຝ່າຝືນຈະຖືກປັບໄໝ 100 ປອນ (ປະມານ 1.000.000 ກວ່າກີບ ຂໍ້ມູນອັດຕາແລກປ່ຽນວັນທີ 9 ກັນຍາ 1 GBP = 11.539 ກີບ) ແລະ ຈະມີໂທດປັບໄໝເພີ່ມຂຶ້ນສຳລັບການກະທຳຜິດແຕ່ລະຄັ້ງ ສູງສຸດບໍ່ເກີນ 3.200 ປອນ.
ກ່ອນໜ້ານີ້ ອັງກິດອະນຸຍາດໃຫ້ປະຊາຊົນຈາກຫລາຍຄອບຄົວລວມຕົວພົບປະນອກເຮືອນໄດ້ສູງສຸດບໍ່ເກີນ 6 ຄົນ ຫລື ໃຫ້ຄົນຈາກສອງຄອບຄົວລວມຕົວຢູ່ເຮືອນ ຫລື ນອກເຮືອນໄດ້ ແຕ່ຮອດປັດຈຸບັນຕຳຫລວດຍັງບໍ່ມີອຳນາດໃນການຄວບຄຸມ ຫລື ຢຸດຢັ້ງການລວມຕົວ ຖ້າມີຈຳນວນບໍ່ເກີນ 30 ຄົນ.
ກ່ອນໜ້າການຖະແຫລງຂ່າວ, ນາຍົກລັດຖະມົນຕີ ບໍຣິສ ຈອນສັນ ລະບຸວ່າ: “ເຮົາຈຳເປັນຕ້ອງດຳເນີນດຽວນີ້ ເພື່ອຢຸດຢັ້ງໄວຣັສບໍ່ໃຫ້ລຸກລາມ. ດັ່ງນັ້ນ ເຮົາຈຶ່ງຫລຸດຄວາມສັບຊ້ອນ ແລະ ເພີ່ມຄວາມເຂັ້ມງວດຂອງກົດການຕິດຕໍ່ທາງສັງຄົມ ເພື່ອໃຫ້ເຂົ້າໃຈງ່າຍ ແລະ ຊ່ວຍໃຫ້ຕຳຫລວດບັງຄັບໃຊ້ກົດໝາຍໄດ້ງ່າຍຂຶ້ນ”.
