ສາທາແຂວງສະຫວັນນະເຂດສ້າງທັກຜູ້ໃຫ້ຄໍາປຶກສາເລື່ອງສຸຂະພາບແກ່ໄວໜຸ່ມ
ທ່ານ ແສງດາວ ສີດາໄລ ຫົວໜ້າພະແນກສາທາລະນະສຸກ ແຂວງສະຫວັນນະເຂດໃຫ້ຮູ້ວ່າ: ປັດຈຸບັນໄວໝຸ່ມເກນອາຍຸ 10-24 ປີ ສາມາດເຂົ້າເຖິງການບໍລິການທີ່ເປັນມິດແກ່ເຂົາເຈົ້າກວມເຖິງ 80%, ສໍາລັບສູນໃຫ້ຄໍາປຶກສາສຸຂະພາບໄວໝຸ່ມແມ່ນມີຢູ່ສຸກສາລາໃນ 14 ເມືອງ ແລະ ເທດສະບານແຂວງສະຫວັນນະເຂດ.
ບັນຫາສ່ວນໃຫຍ່ທີ່ເຍົາວະຊົນ ແລະ ໄວໜຸ່ມເກນອາຍຸ 10-24ປີ ຂໍຄໍາປຶກສາແມ່ນພະຍາດຕິດຕໍ່ທາງເພດສໍາພັນ, ຖືພາກ່ອນໄວອັນຄວນ, ການວາງແຜນຄອບຄົວ ແລະ ບັນຫາອື່ນໆ ເພາະໄວໜຸ່ມຍັງບໍ່ທັນເຂົ້າໃຈການປ້ອງກັນ. ພະແນກສາທາລະນະສຸກແຂວງສະຫວັນນະເຂດຮ່ວມກັບປິ່ນປົວ ແລະ ຟື້ນຟູ ໜ້າທີ່ການກະຊວງສາທາລະນະສຸກ ໂດຍການສະຫນັບສະຫນູນຈາກອົງການສະຫະປະຊາຊາດ ກອງທຶນສໍາລັບປະຊາກອນ ປະຈໍາລາວ ໄດ້ເອົາໃຈໃສ່ສືບຕໍ່ສ້າງທັກສະການບໍລິການທີ່ເປັນມິດກັບເຍົາວະຊົນ ແລະ ໄວໜຸ່ມໃຫ້ແກ່ຜູ້ໃຫ້ບໍລິການ ເພື່ອຈະຂະຫຍາຍລົງສູ່ສຸກສາລາ ຫລື ເຂດທີ່ຍັງບໍ່ທັນເຂົ້າເຖິງການບໍລິການໄດ້ສໍາເລັດໃນທ້າຍປີ 2020ນີ້.
ນອກນີ້, ຈະຂະຫຍາຍການໂຄສະນາສຸຂະສຶກສາ, ສະຖາບັນການສຶກສາ, ໂຮງຈັກໂຮງງານ ແລະ ອື່ນໆ, ຈັດກິດຈະກໍາເສື່ອມສານຮ່ວມກັບການສົ່ງເສີມສຸຂະພາບແມ່ ແລະ ເດັກ ໂດຍມີການໂຄສະນາການບໍລິການທີ່ເປັນມິດກັບເຍົາວະຊົນ ແລະ ໄວໜຸ່ມລົງສູ່ຊຸມຊົນ, ໂຮງຮຽນ, ໂຮງຈັກ ໂຮງງານ, ສະຖາບັນການສຶກອື່ນໆ ເພື່ອໃຫ້ໄວໝຸ່ມເຂົ້າເຖິງການບໍລິການທີ່ເປັນມິດໄດ້ຢ່າງສະດວກ.
