ວັກຊີນໂຄວິດຣັດເຊຍ ຊ່ວຍສ້າງພູມຄຸ້ມກັນໂຄໂຣນາໄວຣັສ
ຜົນການທົດລອງວັກຊີນ Covid-19 ຂອງຣັດເຊຍ ເຊິ່ງຈົດທະບຽນແລ້ວໃນເດືອນສິງຫາຜ່ານມາ ພົບສາມາດສ້າງພູມຄຸ້ມກັນໃນຮ່າງກາຍໄດ້ ທັງຍັງມີຜົນຂ້າງຄຽງໃນລະດັບຕໍ່າ.
ຜົນການທົດລອງວັກຊີນ Covid-19 ຊື່ Sputnik V ໃນໄລຍະທີ 1 ແລະ 2 ຂອງຣັດເຊຍ ເຊິ່ງລົງໃນວາລະສານທາງການແພດ The Lancet ພົບວ່າ: ວັກຊີນດັ່ງກ່າວສາມາດສ້າງພູມຄຸ້ມກັນໃນຮ່າງກາຍຂອງອາສາສະໝັກ 76 ຄົນ ໂດຍລະດັບພູມຄຸ້ມກັນຈາກວັກຊີນນີ້ໃກ້ຄຽງກັບພູມຄຸ້ມກັນທີ່ຮ່າງກາຍຂອງຜູ້ຕິດເຊື້ອສ້າງຂຶ້ນເອງຕາມທຳມະຊາດຫລັງຈາກຫາຍຈາກ Covid-19.
ນອກຈາກນີ້ ວັກຊີນຂອງຣັດເຊຍຍັງມີຜົນຂ້າງຄຽງເຊັ່ນ: ໄຂ້, ເຈັບຫົວ, ປວດຕາມຂໍ້ ບໍ່ຮຸນແຮງ ແຕ່ບໍ່ໄດ້ລະບຸວ່າຜົນຂ້າງຄຽງນີ້ຈະຢູ່ດົນຊໍ່າໃດ.
ເຖິງຢ່າງໃດກໍດີ, ບັນດານັກວິທະຍາສາດ ເຊິ່ງບໍ່ໄດ້ກ່ຽວຂ້ອງກັບການວິໄຈນີ້ລະບຸວ່າ: ເຖິງວ່າຜົນການທົດລອງຈະໜ້າເພິ່ງພໍໃຈ ແຕ່ການທົດລອງໄລຍະທີ 3 ເຊິ່ງທົດລອງກັບອາສາສະໝັກໃນວົງກວ້າງຈະເປັນຕົວຊີ້ວັດວ່າວັກຊີນ Sputnik V ມີປະສິດທິພາບ ຫລື ບໍ່.
ສ່ວນນັກວິໄຈຈາກສະຖາບັນວິໄຈພະຍາດລະບາດ ແລະ ຈຸລະຊີວະວິທະຍາແຫ່ງຊາດກາມາເລຢາຂອງຣັດເຊຍເປີດເຜີຍວ່າ: ວັກຊີນ Sputnik V ໄດ້ຮັບອະນຸຍາດໃຫ້ທົດລອງໃນໄລຍະທີ 3 ເມື່ອວັນທີ 26 ສິງຫາຜ່ານມາ ໂດຍຄາດວ່າຈະມີອາສາສະໝັກເຂົ້າທົດລອງປະມານ 40.000 ຄົນ ແລະ ຈະເລີ່ມທົດລອງໃນນະຄອນຫລວງມອສໂກໃນອາທິດໜ້າ.
