ຫວຽດນາມພິຈາລະນາຕໍ່ 6 ສາຍການບິນກັບສາກົນ
ຂ່າວວັນທີ 3 ກັນຍາຈາກ zingnews ໃຫ້ຮູ້ວ່າ: ກົມການບິນຂອງຫວຽດນາມ ໄດ້ພິຈາລະນາຕໍ່ 6 ສາຍການບິນກັບສາກົນຄືນໃໝ່, ໃນຈຳນວນນັ້ນລວມມີ: ຈີນ, ຍີ່ປຸ່ນ, ເກົາຫຼີໃຕ້, ໄຕ້ຫວັນ, ລາວ ແລະ ກຳປູເຈຍ ໃນວັນທີ 15 ກັນຍານີ້.
ກົມການບິນຂອງຫວຽດນາມ ໄດ້ຍື່ນແຜນການຟື້ນຟູສາຍການບິນສາກົນ ຕໍ່ກະຊວງຄົມມະນາຄົມ ແລະ ການຂົນສົ່ງແລ້ວ. ຜູ້ຕາງໜ້າກົມການບິນໃຫ້ຮູ້ວ່າ: 6 ສາຍການບິນສາກົນທີ່ນະສະເໜີນັ້ນຈະໄດ້ເປີດໃຫ້ການບໍລີການໃນວັນທີ 15 ກັນຍານີ້.
ສຳລັບສາຍການບິນກັບຈີນຈະເປີດສາຍການບິນລະຫວ່າງ ນະຄອນໂຮ່ຈິມິນ – ກວາງໂຈ 1 ຖ້ຽວ/ອາທິດ ໃຫ້ແຕ່ລະຝ່າຍ. ສຳລັບກັບຍີ່ປຸ່ນຈະເປີດສາຍການບິນ ຮ່າໂນ້ຍ – ໂຕກຽວ 1 ຖ້ຽວ/ອາທິດແຕ່ລະຝ່າຍ, ວັນອັງຄານຂອງທຸກໆອາທິດ. ກັບ ເກົາຫຼີໃຕ້ຈະເປີດສາຍການບິນ ຮ່າໂນ້ຍ – ໂຊນ 1 ຖ້ຽວ/ອາທິດ. ຕໍ່ກັບ ໄຕ້ຫວັນ ຈະເປີດສາຍການບິນ ນະຄອນໂຮ່ຈິມິນ – ໄຕ້ຫວັນ ແລະ ຮ່າໂນ້ຍ – ໄຕ້ຫວັນ. ສຳລັບລາວ ແລະ ກຳປູເຈຍ: 1 ຖ້ຽວ/ອາທິດ.
ຂ່າວ: ລູກເມືອງພວນ.
