ຕາດຊາຍແຫລ່ງທ່ອງທ່ຽວທໍາມະຊາດທີ່ສວຍງາມ
ໄລຍະນີ້ເຫັນວ່າສະພາບອາກາດມີລັກສະນະຮ້ອນເອົ້າ, ດັ່ງນັ້ນຄໍລໍາທ່ອງທ່ຽວພວກເຮົາມື້ ນີ້ຂໍແນະນໍາເພື່ອນຜູ້ອ່ານໄດ້ລອງໄປສໍາພັດກັບທິວທັດອັນສວຍ ງາມຂອງທິວທັດທໍາມະ ຊາດຕາດຊາຍ.
+ ທ່ຽວຫາດຊາຍລັບແລ Playa Del Amor ໃນແມັກຊີໂກ
ຕາດຊາຍຕັ້ງຢູ່ບ້ານຫາດ ໄຄ້, ເມືອງທ່າພະບາດ, ແຂວງ ບໍລິຄຳໄຊ ຫ່າງຈາກນະຄອນ ຫລວງວຽງຈັນໄປຕາມເສັ້ນ ທາງເລກ 13 ໃຕ້ປະມານ 100 ກວ່າກິໂລແມັດ, ທິດເໜືອຕິດກັບ ບ້ານ ຊາຍແບ່ງ, ທິດໃຕ້ຕິດກັບ ພູຊາຍ, ທິດຕາເວັນອອກຕິດ ກັບຕາດນ້ຳມັງ, ທິດຕາເວັນຕົກ ຕິດກັບບ້ານປາກແປກ.
ຕາມການບອກເລົ່າຂອງນາຍບ້ານຫາດໄຄ້ໃຫ້ຮູ້ວ່າ: ຕາດ ແຫ່ງນີ້ມີປະຫວັດຄວາມເປັນມາ ອັນໜ້າສົນໃຈ, ໂດຍສະເພາະຄໍາ ວ່າ “ຊາຍ” ນັ້ນ, ແມ່ນເກີດມາ ຈາກມີນາຍພານຄົນ ໜຶ່ງໄດ້ໄປ ຊອກຫາຍິງສັດ ແລ້ວໂຕ ສັດໄດ້ ໄປລີ້ຊ້ອນຕົວຢູ່ຕາມລືບຫີນໃນເຂດນັ້ນ, ຈຶ່ງກາຍເປັນຕໍານານເອີ້ນຂານກັນຕາມມາ ວ່າຕາດຊາຍນັ້ນເອງ, ໂດຍມີ ສາຍນໍ້າໄຫລລົງມາ ຈາກພູ ເຂົາຄວາຍຜ່ານພະລານຫີນ ເປັນຊັ້ນໆຄືຂັນໄດ. ນອກຈາກນີ້ ອ້ອມຮອບຕາດດັ່ງກ່າວກໍເຕັມໄປດ້ວຍພືກສາ ປ່າໄມ້ຂຽວສວຍງາມບວກກັບ ມີສຽງຮ້ອງຂອງນົກຊະນິດຕ່າງໆ ຢ່າງໜ້າສະອອນໃຈ.
ຕາດແຫ່ງນີ້ໄດ້ຮັບການ ພັດທະນາໃຫ້ເປັນແຫລ່ງທ່ອງ ທ່ຽວນັບແຕ່ປີ 2003 ເປັນຕົ້ນມາ ແລະ ເລີ່ມເປັນທີ່ຮູ້ຈັກຂອງບັນດານັກທ່ອງທ່ຽວທີ່ມັກຊື່ນຊົມກັບທິວທັດທໍາມະຊາດ ນັບມື້ຫລາຍ ຂຶ້ນ, ການຂັບຂີ່ລົດແຕ່ເສັ້ນທາງ 13 ໃຕ້ເຂົ້າໄປສູ່ຕາດດັ່ງກ່າວຍາມ ແລ້ງແມ່ນສະດວກດີ, ແຕ່ຊ່ວງໄລຍະລະດູຝົນແມ່ນຫຍຸ້ງຍາກສົມຄວນ.
