ຂັງລູກ 3 ຄົນໄວ້ໃນເຮືອນເປັນເວລາ 5 ເດືອນຍ້ອນຢ້ານ ໂຄວິດ-19
ຂ່າວຈາກ vnexpress, ວັນທີ 3 ກັນຍານີ້ ໃຫ້ຮູ້ວ່າ: ມີຜົວເມຍຄູ່ໜຶ່ງໃນ ປະເທດສະວີເດັນ ໄດ້ຂັງລູກຂອງພວກເຂົາໄວ້ໃນຫ້ອງເປັນເວລາ 5 ເດືອນ ຍ້ອນຢ້ານຕິດໂຄວິດ-19, ນັບແຕ່ເດືອນມີນາຫາເດືອນກໍລະກົດ.
ສານເມືອງ Jönköping, ໄປທາງທິດໃຕ້ຂອງສະວີເດັນ, ວັນທີ 2 ກັນຍາ ສານໄດ້ພິພາກສາໃຫ້ເດັກທັງ 3 ຄົນໄດ້ໄປຢູ່ທີ່ສູນດູແລເດັກ ແລະ ບໍ່ໃຫ້ກັບບ້ານ.
ເດັກທັງ 3 ຄົນທີ່ກ່າວມານັ້ນມີອາຍຸແຕ່ 10-17ປີ, ພໍ່-ແມ່ພວກເຂົາໄດ້ກັນຫ້າມບໍ່ໃຫ້ອອກຈາກເຮືອນໄປໃສ, ໃຫ້ຢູ່ແຕ່ໃນຫ້ອງ, ປະຕູຫ້ອງຂອງແຕ່ລະຄົນຈະຖືກຕອກດ້ວຍໄມ້ແປ້ນອັດໄວ້ຢ່າງແໜ້ນໜາ. ທ່ານ Mikael Svegfor ທະນາຍຄວາມຂອງພວກເດັກໃຫ້ຮູ້ວ່າ: ຄອບຄົວດັ່ງກ່າວບໍ່ຮູ້ພາສາສະວີເດັນ(ອາດເປັນຊົນເຜົ່າສ່ວນໜ້ອຍ-ຜູ້ຂຽນສົງໄສ) ແລະ ບໍ່ໄດ້ຕິດຕາມຂ່າວຄາວໂຄວິດ-19 ຈາກຊ່ອງໂທລະພາບທ້ອງຖິ່ນ ບ່ອນທີ່ຕົນອາໄສຢູ່, ຊຶ່ງມີມາດຕະການເຄັ່ງຄັດກ່ວາມາດຕະການຂອງລັດຖະບານກາງ. ທະນາຍຄວາມກ່າວວ່າ: “ການກະທຳດັ່ງກ່າວ ແມ່ນອອກມາຈາກຄວາມເຂົ້າໃຈຂອງແຕ່ລະເຜົ່າຊົນທີ່ແຕກຕ່າງກັນໃນໂລກ…ຊຶ່ງມີຄວາມຢ້ານກົວ ແຕກຕື່ນທີ່ແຕກຕ່າງກັນອອກໄປ”
ພໍ່ແມ່ຂອງເດັກໃຫ້ຮູ້ວ່າ: ພວກເດັກຮຽນດ້ວຍຕົນເອງຢູ່ໃນເຮືອນ ແລະ ປະຕິເສດວ່າບໍ່ໄດ້ກັກຂັງໜ່ວງໜ່ຽວພວກລູກແຕ່ຢ່າງໃດ, ພວກເຂົາກໍໄດ້ໄປມາຕາມໃຈ ຕາມທີ່ພວກເຂົາຕ້ອງການ. ສອງຜົວເມຍນັ້ນຈະຂໍອຸທອນເພື່ອໃຫ້ໄດ້ລູກກັບເມືອເຮືອນ.
ທະນາຍຄວາມຂອງພໍ່ແມ່ເດັກ Andreas Hannah ກ່າວຢູ່ໃນສານວ່າ: “ແລ້ວແຕ່ມຸມມອງທີ່ແຕກຕ່າງກັນ ແລະ ສ້າງພາບຂຶ້ນມາກໍແຕກຕ່າງກັນ”.
ຊື່ສຽງຮຽງນາມ, ທ້ອງຖິ່ນດິນນາຂອງສະມາຊິກໃນຄອບຄົວແມ່ນບໍ່ຖືກເປີດເຜີຍ.
ປັດຈຸບັນຢູ່ສະວີເດັນມີຜູ້ຕິດເຊື້ອສະສົມ 85.500, ເສຍຊີວິດ 5.820. ຖ້າຄິດໄລ່ຊັດສ່ວນການຕາຍຕໍ່ 1 ລ້ານຄົນ ແມ່ນສະວີເດັນມີອັດຕາການຕາຍສູງກ່ວາບັນດາປະເທດຢູ່ໃນເຂດເອີຣົບເໜືອ, ແຕ່ຕໍ່າກ່ວາບັນດາປະເທດອື່ນເຊັ່ນ: ອັງກິດ, ອີຕາລີ ແລະ ສະເປນ.
ຂ່າວ: ລູກເມືອງພວນ.
