ພິທີລົງນາມການຊ່ວຍເຫລືອວຽກງານສົ່ງເສີມສຸຂະພາບແມ່ ແລະ ເດັກຢູ່ລາວປະຈຳປີ 2017-2018 ໃນມູນຄ່າ 7,2 ລ້ານໂດລາສະຫະລັດລະຫວ່າງ ທ່ານນາງ ຫົງເວ ກາວ ຜູ້ຕາງໜ້າອົງການອຸຍນິເຊບປະຈຳລາວ ແລະ ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະສຸກ ໄດ້ມີຂຶ້ນໃນທ້າຍອາທິດຜ່ານມານີ້ ເພື່ອຮັບປະກັນການບໍລິການເຊື່ອມສານຂອງວຽກງານສຸຂະພາບແມ່ ແລະ ເດັກ, ການສັກຢາກັນພະຍາດ ແລະ ການບໍລິການດ້ານໂພຊະນາການ ໃຫ້ແກ່ປະຊາຊົນທີ່ມີຄວາມສ່ຽງສູງ ແລະ ຜູ້ທຸກຍາກຂາດເຂີນໃນຊຸມຊົນ ແລະ ສຸກສາລາເປົ້າໝາຍ, ຮັບປະກັນໄດ້ໃນການຮັກສາ ແລະ ການປິ່ນປົວການເຈັບເປັນຂອງເດັກ, ທັງໃຫ້ບັນລຸເປົ້າໝາຍການພັດທະນາແບບຍືນຍົງ.
ຜູ້ຕາງໜ້າອົງການອຸຍນີເຊບປະຈໍາລາວ ກ່າວວ່າ: ການຈັດຕັ້ງປະຕິບັດກິດຈະກຳຕ່າງໆກ່ຽວກັບວຽກງານສົ່ງເສີມສຸຂະພາບແມ່, ເດັກເກີດໃໝ່ ແລະ ເດັກນ້ອຍໃນລາວເຫັນວ່າໄດ້ຮັບການປັບປຸງຢ່າງແຂງແຮງ ແລະ ມີໝາກຜົນເປັນກ້າວໆ ແລະ ເຊື້ອໝັ້ນວ່າການຊ່ວຍເຫລືອຂອງອົງການອຸຍນີເຊບຈະປະກອບສ່ວນເຂົ້າໃນການບັນລຸເປົ້າໝາຍການພັດທະນາແບບຍຶນຍົງຂອງລາວໃນປີ 2030.
