ກະຊວງແຮງງານ ແລະ ສະຫວັດດີການສັງຄົມ ແລະ ອົງການຢູນີເຊັບ ຈະເພີ່ມຄວາມເອົາໃຈໃສ່ໃນການສ້າງຄວາມເຂັ້ມແຂງໃຫ້ລະບົບປົກປ້ອງເດັກ ໃນລາວ
ໃນວັນທີ 2 ກັນຍານີ້, ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ດຣ. ເພຍ ຣີແບນໂລ ບຣິດໂຕ (Dr Pia Rebello Britto) ຜູ້ຕາງໜ້າຂອງອົງການຢູນີເຊັບ (UNICEF) ຄົນໃໝ່ ປະຈຳ ສປປ ລາວ ທີ່ກະຊວງດັ່ງກ່າວ.
ໃນໂອກາດນີ້, ທ່ານ ຄຳແພງ ໄຊສົມແພງ ໄດ້ສະແດງຄວາມຍິນດີຕ້ອນຮັບອັນອົບອຸ່ນມາຍັງ ທ່ານຜູ້ຕາງໜ້າຂອງອົງການອຸຍນີເຊັບຄົນໃໝ່ປະຈຳ ສປປ ລາວ, ພ້ອມທັງສະແດງຄວາມຂອບໃຈຕໍ່ການຮ່ວມມື ແລະ ການຊ່ວຍເຫລືອຂອງອົງການອຸຍນີເຊັບຕໍ່ ສປປ ລາວ ໃນໄລຍະຜ່ານ ໂດຍສະເພາະວຽກງານປົກປ້ອງເດັກ. ທ່ານກ່າວວ່າ: “ການແຕ່ງງານກ່ອນໄວອັນຄວນ, ເດັກຊົນເຜົ່າບໍ່ເຂົ້າ ໃຈພາສາລາວ ແມ່ນສົ່ງຜົນກະທົບຕໍ່ການພັດທະນາເດັກ. ບັນຫາໄພພິບັດ ຕົວຢ່າງນໍ້າຖ້ວມຢູ່ເມືອງສະໜາມໄຊ ແຂວງອັດຕະປື ໃນປີ 2018 ແມ່ນເຮັດໃຫ້ເດັກພັດພາກຈາກຄອບຄົວ ແລະ ຂາດທີ່ຢູ່ອາໃສ. ການຄ້າມະນຸດກໍແມ່ນສິ່ງທ້າທາຍອັນໜຶ່ງທີ່ຕ້ອງຮີບຮ້ອນແກ້ໄຂ. ໃນໄລຍະການລະບາດຂອງພະ ຍາດໂຄວິດ-19 ເດັກນ້ອຍລາວແມ່ນໄດ້ຮັບຜົນກະທົບຫລາຍສົມຄວນ. ລັດຖະບານລາວ ໂດຍສະເພາະກະຊວງແຮງງານ ແລະ ສະຫວັດດີການສັງຄົມ ໄດ້ຮ່ວມກັບອົງການຈັດຕັ້ງສາກົນ ລວມທັງອົງການຢູນີເຊັບ ແກ້ໄຂສິ່ງທ້າທາຍດັ່ງກ່າວສຳເລັດໃນລະດັບໜ້າພໍໃຈ ແຕ່ກໍຍັງຕ້ອງສືບຕໍ່ຮ່ວມມືກັນຫລາຍຂຶ້ນໃນຕໍ່ໜ້າ. ຜ່ານມາອົງການຢູນີເຊັບ ໄດ້ຊ່ວຍເຫລືອລັດຖະບານຢ່າງຫລວງຫລາຍ ແລະ ຫວັງວ່າໃນຕໍ່ໜ້າຈະໄດ້ຮັບການຊ່ວຍເຫລືອເພີ່ມຕື່ມ.
ໃນໂອກາດດຽວກັນນີ້, ທ່ານ ດຣ.ເພຍ ຣີແບນໂລ ບຣິດໂຕ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງທ່ານລັດຖະມົນຕີກະຊວງແຮງງານສະຫວັດດີການ ແລະ ສັງຄົມ ແລະ ຢືນຢັນວ່າ “ອົງການອຸຍນີເຊັບຈະສືບຕໍ່ໃຫ້ການຮ່ວມມືຢ່າງເຕັມສ່ວນກັບລັດຖະບານລາວ ໂດຍສະເພາະກະຊວງແຮງງານ ແລະ ສະຫວັດດີການສັງຄົມ ໃນການຈັດຕັ້ງປະຕິບັດແຜນງານການຮ່ວມມືໃຫ້ໄດ້ຮັບໝາກຜົນສູງສຸດ”. ພ້ອມນີ້, ທ່ານຍັງເນັ້ນໜັກຕື່ມວ່າ: “ວຽກງງານປົກປ້ອງເດັກແມ່ນໜຶ່ງໃນບູລິມະສິດສໍາລັບການພັດທະນາເດັກ ເຊິ່ງອົງການຢູນີເຊັບຈະສືບຕໍ່ຮ່ວມມືກັບກະຊວງແຮງງານ ແລະ ສະຫວັດດີການສັງຄົມ ໃນການສ້າງຄວາມເຂັ້ມແຂງໃຫ້ແກ່ລະບົບປົກປ້ອງເດັກໃນ ສປປ ລາວ ໃຫ້ມີປະສິດຕິພາບຂຶ້ນ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດ.
