ເຊັນສັນຍາຮ່ວມພັດທະນາໂຄງການພະລັງງານໄຟຟ້າແສງຕາເວັນຢູ່ແຂວງພາກໃຕ້ຂອງລາວ

ພິທີເຊັນສັນຍາຮ່ວມພັດທະນາໂຄງການພະລັງງານໄຟຟ້າແສງຕາເວັນທີ່ເມືອງລະມາມ ແຂວງເຊກອງ, ເມືອງໂຂງ ແລະ ເມືອງປະທຸມພອນ ແຂວງຈຳປາສັກ ໄດ້ມີຂຶ້ນໃນວັນທີ 2 ກັນຍານີ້ ຢູ່ນະຄອນຫລວງວຽງຈັນ  ລະຫວ່າງທ່ານ ນາງ ໄຊທານີ ຈັນທະວົງສາ ຮອງປະທານບໍລິສັດ National Consulting Group Co.,Ltd (NCG), ທ່ານ ຄໍາປະສິດ ເທບວົງສາ ປະທານບໍລິສັດ Thepvongsa Power company Limited, ທ່ານ ວໍລະບຸດ ຣັດຕະນະໄຕຣ ອໍານວຍການບໍລິສັດ Wealth Power Group Vietnam (WPG) ປະຈໍາລາວ

ໂດຍການເຂົ້າຮ່ວມຂອງທ່ານ ລິນຄຳ ດວງສະຫວັນ ຮອງລັດຖະມົນຕີກະຊວງກະສິກຳ ແລະ ປ່າໄມ້, ທ່ານ ຄຳເຜີຍ ແກ້ວກິນນາລີ ຮອງປະທານຜູ້ປະຈຳການຄະນະຮ່ວມມືລາວ-ຫວຽດນາມ, ທ່ານ ຫຽມ ພົມມະຈັນ ອຳນວຍການບໍລິສັດດາວທຽມລາວ ແລະ ທ່ານ ສັງຄົມ ຈັນສຸກ ປະທານສະພາການຄ້າ ແລະ ອຸດສາຫະກຳນະຄອນຫລວງວຽງຈັນເຂົ້າຮ່ວມ.

ທ່ານ ວິເດດ ວິຊຸນນະລາດ ຜູ້ອໍານວຍການບໍລິສັດ NCG ກ່າວວ່າ: ເພື່ອເປັນສ່ວນໜຶ່ງໃນການພັດທະນາພະລັງງານທົດແທນທີ່ເປັນພະລັງງານສະອາດ ແລະ ເປັນມິດຕໍ່ສິ່ງແວດລ້ອມຢູ່ໃນລາວຂອງ 2 ໂຄງການດັ່ງກ່າວນີ້ຄື: ໂຄງການໄຟຟ້າພະລັງງານແສງຕາເວັນ ທີ່ເມືອງລະມາມ ແຂວງເຊກອງ ກວມເອົາເນື້ອທີ່ປະມານ 720 ເຮັກຕາ ຫ່າງຈາກແລວສາຍສົ່ງ 115 kV ປະມານ 2 ກິໂລແມັດ, ມີກໍາລັງຕິດຕັ້ງ 500 MW, ກໍາລັງການຜະລິດ 739 GWh/y, ຄາດວ່າຈະມີມູນຄ່າການກໍ່ສ້າງທັງໝົດ 332 ລ້ານກວ່າໂດລາສະຫະລັດ. ສ່ວນໂຄງການພະລັງງານໄຟຟ້າແສງຕາເວັນທີ່ ເມືອງໂຂງ ແມ່ນຕັ້ງຢູ່ບ້ານນາຝັງ ແລະ ບ້ານຫ້ວຍຍາງ ເມືອງປະທຸມພອນ ແຂວງຈຳປາສັກ, ກວມເນື້ອທີ່ປະມານ 93,1 ເຮັກຕາ, ຫ່າງຈາກສະຖານີໄຟຟ້າ 115/22 kV ຢູ່ບ້ານນາ ປະມານ 16,5 ກິໂລແມັດ ກໍາລັງຕິດຕັ້ງ 80 MW ກໍາລັງການຜະລິດ 123,68 GWh/y ຄາດວ່າຈະມີມູນຄ່າໂຄງການ 57,31 ລ້ານກວ່າໂດລາສະຫະລັດ ແລະ ຄາດວ່າຈະສໍາເລັດການກໍ່ສ້າງພາຍໃນ 2 ປີຕໍ່ໜ້ານີ້.

ໂອກາດນີ້, ທ່ານ ປະທານບໍລິສັດ Thepvongsa Power company Limited ໄດ້ກ່າວສະແດງຄວາມປິຕິຍິນດີ ແລະ ຂອບໃຈລັດຖະບານທີ່ເປີດໂອກາດໃຫ້ປະກອບສ່ວນສ້າງສາພັດທະນາປະເທດຊາດຕາມທິດສີຂຽວ ແລະ ຍືນຍົງຕາມຍຸດທະສາດການພັດທະນາພະລັງງານທົດແທນຂອງລາວ.