ເຮືອບັນທຸກຜູ້ໂດຍສານກວ່າ 150 ຄົນຂວ້ຳຢູ່ໂກລົມບີ
ມີຜູ້ເສຍຊີວິດແລ້ວຢ່າງໜ້ອຍ 9 ຄົນ ຈາກເຫດເຮືອໂດຍສານຂວ້ຳຢູ່ທະເລສາບເໜືອເຂື່ອນຂອງເມືອງກົວຕາເປ ໃນວັນທີ 25 ມິຖຸນາ ເຊິ່ງເປັນເມືອງທ່ອງທ່ຽວຢູ່ພູແອນດີສທາງຕາເວັນຕົກສຽງເໜືອຂອງປະເທດໂກລົມບີ.
ເຈົ້າໜ້າທີ່ຕຳຫລວດເປີດເຜີຍວ່າ: ຍັງມີຜູ້ສູນຫາຍອີກ 28 ຄົນ ຫລັງເຮືອໂດຍສານ 4 ຊັ້ນທີ່ບັນທຸກຜູ້ໂດຍສານຫລາຍກວ່າ 150 ຄົນ ເກີດຈົມລົງຢ່າງວ່ອງໄວໃນຂະນະໃກ້ເຂົ້າຈອດທຽບທ່າ. ຜູ້ເຫັນເຫດການບອກວ່າ: ເຮືອຈົມລົງພາຍໃນເວລາພຽງ 5 ນາທີ.
ເຮືອທ່ອງທ່ຽວທີ່ຢູ່ໃນບໍລິເວນໃກ້ຄຽງຫລາຍລຳ ໄດ້ເຂົ້າຊ່ວຍຜູ້ໂດຍສານຈຳນວນໜຶ່ງທີ່ຢູ່ເທິງດາດຟ້າເຮືອ ແລະ ໄດ້ຊ່ວຍນຳເອົາຜູ້ໂດຍສານທີ່ລອຍຢູ່ນ້ຳຂຶ້ນຈາກນ້ຳ. ທາງການໄດ້ສົ່ງໜ່ວຍກູ້ໄພພ້ອມເຮລິກົບແຕຂອງກອງທັບ ແລະ ນັກດຳນ້ຳໄປຈຸດເກີດເຫດແລ້ວ ແລະ ມີການນຳເອົາຜູ້ໄດ້ຮັບບາດເຈັບກວ່າ 20 ຄົນສົ່ງໂຮງໝໍ.
ເຈົ້າໜ້າທີ່ໜ່ວຍກູ້ໄພບອກກັບສຳນັກຂ່າວ AFP ວ່າ: ເຫດການທີ່ເກີດຂຶ້ນອ່າວຮ້າຍແຮງ, ແຕ່ຍັງບໍ່ຮູ້ເຖິງສາເຫດທີ່ເຮືອຈົມລົງວ່າເນື່ອງມາຈາກເຄື່ອງຈັກຂັດຂ້ອງ, ບັນທຸກນ້ຳໜັກເກີນ ຫລື ມາຈາກກະແສນ້ຳວົນ.
ທັງນີ້, ເມືອງກົວຕາເປຢູ່ຫ່າງຈາກເມືອງເມເດລິນ ເມືອງເອກຂອງລັດອັນຕິໂອເກຍໄປທາງຕາເວັນອອກປະມານ 40 ກິໂລແມັດ ເປັນເມືອງທ່ອງທ່ຽວສຳຄັນ ໂດຍມີທະເລສາບເໜືອເຂື່ອນແຫ່ງດັ່ງກ່າວເປັນຈຸດສູນກາງກິລາທາງນ້ຳຍອດນິຍົມ ແລະ ກິດຈະກຳພັກຜ່ອນອື່ນໆ ເຊິ່ງມີນັກທ່ອງທ່ຽວມາທ່ຽວເປັນຈຳນວນຫລາຍ.
