ອິນໂດເນເຊຍແຫ່ໂລງສົບອ້ອມເມືອງ ເຕືອນສະຕິຢ່າປະໝາດໂຄວິດ-19
ອິນໂດເນເຊຍຈັດຂະບວນແຫ່ໂລງສົບໄປອ້ອມເມືອງ ເພື່ອກະຕຸ້ນເຕືອນປະຊາຊົນຢ່າປະໝາດ ໃຫ້ຍັງຄົງເຝົ້າລະວັງພະຍາດໂຄວິດ-19 ຕໍ່ໄປ.
ທາງການອິນໂດເນເຊຍຫາແນວທາງປຸກລະດົມກະຕຸ້ນປະຊາຊົນເຝົ້າລະວັງໂຄວິດ-19 ຢ່າງຕໍ່ເນື່ອງ ຈາກທີ່ເຄີຍມີການຕັ້ງໂລງສົບໄວ້ຕາມຈຸດໄຟສັນຍານຈະລາຈອນ, ຫລ້າສຸດຈັດຂະບວນແຫ່ໂລງສົບໄປອ້ອມນະຄອນຫລວງຈາກາຕາ ພ້ອມເຈົ້າໜ້າທີ່ໃສ່ຊຸດປ້ອງກັນເຕັມທີ່ ແຫ່ຂະບວນໄປຕາມເຂດໃຈກາງເມືອງ ເພື່ອເນັ້ນເຕືອນປະຊາຊົນໃຫ້ຍັງຄົງເຝົ້າລະວັງໂຄວິດ-19 ຕໍ່ໄປ ເພາະສະຖານະການການລະບາດຢູ່ອາຊີຕາເວັນອອກສຽງໃຕ້ຍັງໜ້າເປັນຫ່ວງ.
ໂດຍປັດຈຸບັນ ອິນໂດເນເຊຍມີຜູ້ຕິດເຊື້ອຫລາຍກວ່າ 177.000 ຄົນ, ເສຍຊີວິດ 7.505 ຄົນ ຖືເປັນອັນດັບສອງຂອງປະເທດໃນອາຊີຕາເວັນອອກສຽງໃຕ້, ເປັນຮອງພຽງແຕ່ປະເທດຟີລິບປິນເທົ່ານັ້ນ ເຖິງວ່າຈະມີການປັບໄໝປະຊາຊົນທີ່ບໍ່ໃສ່ຜ້າປິດປາກ-ດັງ ແລະ ບໍ່ຍອມເວັ້ນໄລຍະຫ່າງ ແຕ່ຍັງບໍ່ພຽງພໍ.
ການເຄື່ອນໄຫວຄັ້ງນີ້ມີຂຶ້ນຫລັງຈາກອິນໂດເນເຊຍຍັງພົບຜູ້ຕິດເຊື້ອເພີ່ມ ແລະ ຫາກໍມີການເປີດເຜີຍວ່າ: ແພດຢູ່ອິນໂດເນເຊຍ ເຊິ່ງເປັນທັບໜ້າໃນການຕໍ່ສູ້ກັບໂຄວິດ-19 ເສຍຊີວິດຫລາຍກວ່າ 100 ຄົນ ແລະ ຍັງມີເດັກນ້ອຍເສຍຊີວິດຈາກພະຍາດນີ້ອີກຫລາຍຮ້ອຍຊີວິດ. ນອກຈາກນີ້ ຜູ້ຊ່ຽວຊານເຊື່ອວ່າ: ອັດຕາການກວດຫາເຊື້ອທີ່ຂ້ອນຂ້າງຕໍ່າ ເຮັດໃຫ້ຈຳນວນຜູ້ຕິດເຊື້ອຕໍ່າກວ່າຄວາມເປັນຈິງ.
ເຖິງຢ່າງໃດກໍຕາມ, ເຖິງວ່າຈະມີສຽງວິພາກວິຈານການຮັບມືພະຍາດລະບາດທີ່ໄຮ້ປະສິດທິພາບຂອງລັດຖະບານ, ແຕ່ທາງການອິນໂດເນເຊຍເລີ່ມຫລຸດຜ່ອນມາດຕະການເຂັ້ມງວດຕ່າງໆມາແຕ່ເດືອນກໍລະກົດແລ້ວ ເພື່ອຫວັງຈະຟື້ນຟູເສດຖະກິດຂອງປະເທດໃຫ້ກັບມາໂດຍໄວ.
