ໂຮງຮຽນໃນອູ່ຮັນກັບມາເປີດການຮຽນໃໝ່ ຫລັງສະຖານະການໂຄວິດ-19 ຢູ່ຈີນຫລຸດລົງ
ນີ້ຄືບັນຍາກາດການເປີດການຮຽນໃໝ່ຂອງບັນດາໂຮງຮຽນຢູ່ເມືອງອູ່ຮັນ ມົນທົນຫູເປີຍຂອງຈີນ ໃນວັນທີ 1 ກັນຍາ ເຊິ່ງຄັ້ງໜຶ່ງເຄີຍໄດ້ຮັບຜົນກະທົບຈາກການແຜ່ລະບາດຂອງໂຄວິດ-19 ຢ່າງຮຸນແຮງ ຈົນຕ້ອງມີຄຳສັ່ງລັອກດາວເມືອງອູ່ຮັນ ແລະ ໂຈະການຮຽນ-ການສອນຊົ່ວຄາວ ໂດຍມີນັກຮຽນທີ່ສຶກສາຢູ່ໂຮງຮຽນມັດທະຍົມສຶກສາຕອນຕົ້ນ, ໂຮງຮຽນປະຖົມສຶກສາ ແລະ ໂຮງຮຽນອະນຸບານເກືອບ 1,4 ລ້ານຄົນໃນສະຖານບັນການສຶກສາ 2.842 ແຫ່ງທົ່ວອູ່ຮັນ.
ເຖິງວ່າສະຖານະການການແຜ່ລະບາດຂອງໂຄວິດ-19 ຈະຫລຸດຜ່ອນລົງແລ້ວ ເມື່ອທຽບໃສ່ຫລາຍປະເທດ ເຊັ່ນຢູ່ອາເມລິກາ ແລະ ເບຣຊິນ, ແຕ່ທາງການຍັງແນະນຳໃຫ້ປະຊາຊົນປະຕິບັດຕາມຄຳແນະນຳຂອງສາທາລະນະສຸກ ເພື່ອຫລຸດໂອກາດການເກີດການແຜ່ລະບາດຮອບໃໝ່ ໂດຍອູ່ຮັນບໍ່ພົບລາຍງານຜູ້ຕິດເຊື້ອໂຄວິດ-19 ແລ້ວ. ປັດຈຸບັນຈີນມີຜູ້ຕິດເຊື້ອທີ່ຍັງປິ່ນປົວຢູ່ພຽງ 216 ຄົນທົ່ວປະເທດ.
