ກອງຂີ້ເຫຍື້ອອຸປະກອນການແພດໃນອິນໂດເນເຊຍ ເຈື່ອນລົງໃສ່ແມ່ນໍ້າ

ຂ່າວຈາກ vnexpress, ວັນທີ 1 ກັນຍາ, ໃຫ້ຮູ້ວ່າ: ຢູ່ທີ່ປະເທດ ອິນໂດເນເຊຍ, ປະຊາຊົນທີ່ດຳລົງຊີວິດຢູ່ລຽບຕາມລຳແມ່ນໍ້າ Cisadane ນັ້ນ ບໍ່ສະເພາະແຕ່ຕິດເຊື້ອນຳພະຍາດໂຄວິດ-19 ເທົ່ານັ້ນ, ແຕ່ມັນຫາກຍັງມານຳກັບເຂັມສັກຢາ, ຜ້າອັດປາກ-ດັງ, ຊຸດນຸ່ງປ້ອງກັນພະຍາດ ແລະ ອື່ນໆ ທີ່ໄຫຼມາຕາມລຳແມ່ນໍ້າຕື່ມອີກ.

ນອກຈາກທີ່ປະຊາຊົນດຳລົງຊີວິດຢູ່ຕາມແມ່ນໍ້າສາຍດັ່ງກ່າວຈະຖືກຂົ່ມຂູ່ເປັນແຕ່ລະວັນຈາກເສດຂີ້ເຫຍື້ອອຸປະກອນການແພດທີ່ໄຫຼມາຕາມແມ່ນໍ້າແລ້ວ ອີນໂດເນເຊຍຍັງເປັນປະເທດໜຶ່ງທີ່ມີຄົນຕາຍຫຼາຍກ່ວາໝູ່ໃນບັນດາປະເທດອາຊີຕາເວັນອອກສ່ຽງໃຕ້ຈາກພະຍາດໂຄວິດ-19.

ໃນຂະນະທີ່ພະຍາດໂຄວິດ-19 ກຳລັງແຜ່ລະບາດຢູ່ນີ້, ເສດຂີ້ເຫຍື້ອອຸປະກອນການແພດຢູ່ Cipeucang, ເມືອງ Tangerang, ແຂວງ Banten ນັບມື້ນັບສູງຂຶ້ນຈົນກາຍເປັນພູ ແລະ ເຈື່ອນລົງໃສ່ແມ່ນໍ້າ Cisadane ໃນລະຫວ່າງເດືອນພຶດສະພາທີ່ຜ່ານມາ.

ນາງ Eka Purwanti, ອາຍຸ 36 ປີ, ຜູ້ຍິງຄົນໜຶ່ງໃນທ້ອງຖິ່ນເຂດນັ້ນທີ່ກຳລັງຊັກເຄື່ອງຢູ່ເລົ່າສູ່ຟັງວ່າ: “ຂ້ອຍຮູ້ດີວ່າມີຄວາມສ່ຽງ, ແຕ່ກໍຈຳເປັນຕ້ອງໄດ້ໃຊ້ນໍ້າຢູ່ນີ້, ແນວໃດກໍຕາມ ຂ້ອຍຫວັງວ່າຈະບໍ່ມີຫຍັງເກີດຂຶ້ນ, ຮູ້ຢູ່ວ່າອັນນັ້ນແມ່ນພະຍາດຂ້າຄົນ”.

ໃນຫຼາຍເດືອນທີ່ຜ່ານມາ, ກອງຂີ້ເຫຍື້ອໄດ້ເຈື່ອນລົງໃສ່ແມ່ນໍ້າເປັນຈຳນວນຫຼວງຫຼາຍ. ທ່ານ Ade Yunus ຜູ້ສ້າງຕັ້ງທະນາຄານຂີ້ເຫຍື້ອຂອງແມ່ນໍ້າ Cisadane ໄດ້ພະຍາຍາມທຳຄວາມສະອາດແມ່ນໍ້າລຳດັ່ງກ່າວຢູ່ເປັນປະຈຳ.

ກະຊວງສາທາລະນະສຸກ ອີນໂດເນເຊຍ ໃຫ້ຮູ້ວ່າ: ນັບແຕ່ເດືອນີນາຫາເດືອນມີຖຸນາເປັນຕົ້ນມາ, ກອງຂີ້ເຫຍື້ອອຸປະກອນການແພດໄດ້ລຸກລາມໄປທົ່ວປະເທດ. ອົງການດັ່ງກ່າວຍອມຮັບວ່າ ອິນໂດເນເຊຍ ຂາດພື້ນຖານການກຳຈັດຂີ້ເຫຍື້ອທີ່ດີ ແຕ່ກໍມີຄວາມພະຍາຍາມຫາວິທີການແກ້ໄຂຢູ່.

ຂ່າວ: ລູກເມືອງພວນ.