ໃຜຈະເປັນຜູ້ປ່ຽນແທນ ຊິນໂຊອາເບະ ເປັນນາຍົກຍີ່ປຸ່ນ?

ແຫຼ່ງຂ່າວຈາກ vnnet, ວັນທີ 31 ສິງຫານີ້ ໃຫ້ຮູ້ວ່າ: ໃນກອງປະຊຸມຄັ້ງວັນທີ 28 ສິງຫາ, ທ່ານ ອາເບະ ໄດ້ຕັດສິນໃຈປະກາດລາຕຳແໜ່ງ, ທັງໆ ຍັງອີກ ໜຶ່ງປີຈຶ່ງໝົດສະໄໝຂອງທ່ານ, ແຕ່ເນື່ອງຈາກບັນຫາສຸຂະພາບ, ທ່ານຈຶ່ງໄດ້ລາອອກຢ່າງກະທັນຫັນ, ແຕ່ທ່ານຢືນຢັນວ່າ ຍັງຈະສືບຕໍ່ຊີ້ນຳນຳພາພາພັກຂອງທ່ານໄປຈົນກ່ວາພັກຈະເລືອກໄດ້ຜູ້ປ່ຽນແທນທ່ານ.

ແຫຼ່ງຂ່າວຕ່າງໆ ໃຫ້ຮູ້ວ່າ: ພັກ LDP ໄດ້ຕັດສິນໃຈຈະຈັດຕັ້ງການປ່ອນບັດເລືອກເອົາປະທານພັກຄົນໃໝ່ແທນທ່ານ ອາເບະ ໃນວັນທີ 1 ກັນຍານີ້.

ວາລະສານ Tokyo Weekender ໃຫ້ຮູ້ວ່າ: ປັດຈຸບັນມີຫຼາຍຊື່ທີ່ຈະເຂົ້າຊີງຕຳແໜ່ງປ່ຽນແທນທ່ານ ອາເບະ ເຊັ່ນ: ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ Taro Aso, ອາຍຸ 79 ປີ ເປັນຜູ້ຊີງທີ່ມີນໍ້າໜັກກ່ວາໝູ່. ຊຶ່ງເປັນຫຼານຊາຍຂອງອະດີນາຍົກລັດຖະມົນຕີຍີ່ປຸ່ນຄົນໜຶ່ງ ແລະ ຕົວທ່ານເອງກໍເຄີຍແບກຫາບພາລະກິດໃນລັດຖະບານຍີ່ປຸ່ນສະໄໝປີ 2008-2009 ມາແລ້ວ, ແຕ່ທ່ານ Aso ໄດ້ໝົດວາລະລົງດ້ວຍການນຳພາພັກ LDP ປະລາໄຊໃຫ້ແກ່ພັກ ປະຊາທິປັດຍີ່ປຸ່ນໃນບັ້ນເລືອກຕັ້ງນາຍົກລັດຖະມົນຕີປີ 2009 ຢ່າງອັບອາຍຂາຍໜ້າທີ່ສຸດທີ່ບໍ່ເຄີຍມີມາກ່ອນຂອງພັກ.

ເຖິງຢ່າງໃດກໍຕາມ, ທ່ານ  Aso ຍັງເຊື່ອວ່າຈະມີໂອກາດບືນຕົວຂຶ້ນສູ່ຍອດສູງສຸດໄດ້ ໃນເມື່ອເຂົາມີບົດບາດເປັນເສົາຄໍ້າຕົ້ນຕໍໃນລັດຖະບານຂອງ ອາເບະ.

ຂ່າວ: ລູກເມືອງພວນ.