ການຮ່ວມສຳພັນສູ້ຮົບລາວ-ຫວຽດນາມ

ໂດຍ: ລູກເມືອງພວນ.

ລາວ ແລະ ຫວຽດນາມເປັນບ້ານໃກ້ເຮືອນຄຽງມີແຜ່ນດິນຕິດຈອດກັນ, ດື່ມນໍ້າຮ່ວມສາຍ, ຊົມໃຊ້ຊັບພະຍາກອນທຳມະຊາດຮ່ວມກັນ, ປະຊາຊົນສອງຊາຍເຄີຍໄປມາຫາສູ່ແລກປ່ຽນສິນຄ້ານຳກັນມາແຕ່ດຶກດຳບັນ, ເຄີຍເປັນແກ່ວເປັນດອງກັນ, ໄປພຸ້ນກິນປາ, ມາພີ້ກິນເຂົ້າ.

ໃນສະໄໝສົງຄາມຕ້ານຈັກກະພັດຜູ້ຮຸກຮານ, ລາວ ແລະ ຫວຽດນາມເຄີຍຮ່ວມຂຸມຄອງສູ້ຮົບອັນດຽວກັນ, ໃຫ້ການຊ່ວຍເຫຼືອຊຶ່ງກັນ ແລະ ກັນ “ເຂົ້າເມັດຫັກຜັກເສັ້ນໜຶ່ງກໍບິແບ່ງກັນກິນ”, ພ້ອມກັນສູ້ຮົບບໍ່ຍອມຈຳນົນ, ຈັກກະພັດຝຼັ່ງຈຳຕ້ອງຍອມເຊັນສັນຍາເຊີແນວຮັບຮູ້ເອກກະລາດຂອງສອງປະເທດຄື: ຢູ່ຫວຽດນາມວັນທີ 2 ກັນຍາ 1945 ແລະ ລາວວັນທີ 12 ຕຸລາ 1945.

ຫຼັງຈານັ້ນມາສອງຊາດລາວ-ຫວຽດນາມກໍໄດ້ພ້ອມກັນດຳເນີນການຕໍ່ສູ້ຕ້ານຈັກກະພັດລ່າເມືອງຂຶ້ນແບບໃໝ່ ເປັນເວລາເຄິ່ງສະຕະວັດ ແລະ ໃນທີ່ສຸດລາວ ແລະ ຫວຽດນາມກໍໄດ້ພ້ອມກັນປົດປ່ອຍປະເທດຊາດຢ່າງສົມບູນໃນປີດຽວກັນຄື: ຫວຽດນາມແມ່ນວັນທີ 30 ເມສາ 1975 ແລະ ຢູ່ລາວແມ່ນວັນທີ 2 ທັນວາ 1975.

ລາວ ແລະ ຫວຽດນາມໄດ້ກາຍເປັນຕົວແບບແຫ່ງຄວາມສາມັກຄີແບບພິເສດທີ່ຫາຍາກໃນໂລກ. ປະຊາຊົນລາວ ແລະ ຫວຽດນາມເຄີຍຮ່ວມຊະຕາກຳອັນດຽວກັນຕະຫຼອດມາ, ທຸກກໍພ້ອມກັນທຸກ, ສຸກກໍພ້ອມກັນສຸກ. ໃນເງື່ອນໄຂທາງດ້ານພູມມີສາດທຳມະຊາດ ແລະ ຊະຕາກຳທາງດ້ານປະຫວັດສາດດັ່ງກ່າວສອງຊາດຈຶ່ງປຽບເໝືອນສອງອ້າຍນ້ອງຮ່ວມທ້ອງພໍ່ແມ່ດຽວກັນ ແລະ ຄວາມສຳພັນດັ່ງກ່າວໄດ້ກາຍເປັນແວ່ນແຍງທີ່ໃສແຈ້ງໃຫ້ແກ່ບັນດາປະເທດໃນໂລກ. ໂດຍຄວາມສຳພັນ, ຄວາມສາມັກຄີແບບພິເສດນັ້ນປະທານ ໂຮ່ຈິມິນ ໄດ້ພັນລະນາໄວ້ວ່າ:

ຮັກຫອມກັນໝາຍໝັ້ນ           ຫຼາຍສັນພູກໍປິ່ນໄຕ່

ຫຼາຍນໍ້າໃຫ່ຍ ແລະ ໂຄກຄ້ອຍ    ຂວາງຂັ້ນກໍດຸ່ງໄປ

ສອງຊາດລາວຫວຽດໄດ້          ຝັງຄວາມຮັກຢູ່ໃນໃຈ

ຮົ່ງຮ່າທັງແມ່ຂອງ                 ບໍ່ເລິກປູນປານໄດ້

ປະທານສຸພານຸວົງ ຜູ້ນຳທີ່ແສນເຄົາລົບຮັກຂອງປະຊາຊົນລາວກໍເຄີຍເວົ້າວ່າ: “ຄວາມສາມັກຄີແບບພິເສດລາວ-ຫວຽດນາມ ໃສແຈ້ງກວ່າເດືອນວັນເພັງ ຫອມຫວນກ່ວາດອກໄມ້ທີ່ຫອມຫວນທີ່ສຸດ”

ເນື່ອງໃນໂອກາດວັນຊາດທີ 2 ກັນຍາຂອງຫວຽດນາມໝູນວຽນບັນຈົບຄົບຮອບ 75 ປິນີ້( 2/09/1945 – 2/09/2020), ປະຊາຊົນລາວຂໍສະແດງຂຳນັບຊົມເຊີຍ ແລະ ເບີກບານມ່ວນຊື່ນຮ່ວມກັບປະຊາຊົນຫວຽດນາມອ້າຍນ້ອງຢ່າງສຸດໃຈ, ອວຍພອນໃຫ້ປະຊາຊົນຫວຽດນາມອ້າຍນ້ອງຈົ່ງປະສົບຜົນສຳເລັດບົນເສັ້ນທາງປົກປັກຮັກສາ ແລະ ພັດທະນາປະເທດຊາດຢ່າງມີໄຊ, ອວຍພອນໃຫ້ຄວາມສາມັກຄີພິເສດ, ສາຍສຳພັນມິດຕະພາບລາວ-ຫວຽດນາມຈົ່ງໝັ້ນຄົງຂະໜົງແກ່ນຕະຫຼອດຊົ່ວຟ້າດິນສະຫຼາຍ.