ປື້ມ “ແມງໄມ້ຢູ່ທຸກແຫ່ງ”

ປື້ມ “ແມງໄມ້ຢູ່ທຸກແຫ່ງ” ຂຽນ ແລະບັນທຶກພາບໂດຍທ່ານ ຈອນ ຈີ ເອສ ເບີຕັນ ແລະທ່ານ ເກຣກໍຣີ ອາຣ ບອລເມີ ທັງສອງເປັນຜູ້ຊ່ຽວຊານທາງດ້ານແມງໄມ້, ທັງເປັນອາສາສະໝັກ ເພື່ອລົບລ້າງແມງໄມ້ ແລະເປັນຜູ້ທີ່ໃຊ້ຊີວິດທ່ອງທ່ຽວເດີນທາງໄປຫຼາຍໆທ້ອງຖິ່ນໃນລາວ ຕະຫຼອດຫຼາຍປີຜ່ານ ເພື່ອຖ່າຍທອດຂໍ້ມູນ ກ່ຽວກັບຄວາມຮັ່ງມີທາງດ້ານຊີວະນານາພັນຂອງປະເທດລາວ. ຮູບພາບທີ່ສວຍງາມຂອງແມງໄມ້ນານາຊະນິດ ແລະບົດເລື່ອງແບບງ່າຍໆຂອງເດັກນ້ອຍ ຈະກະຕຸກໃຫ້ເດັກນ້ອຍ ແລະຊາວໜຸ່ມລາວ ມີຄວາມສົນໃຈໃນການອ່ານຕື່ມອີກ. ປື້ມ “ແມງໄມ້ຢູ່ທຸກແຫ່ງ” ຍັງໃຫ້ໂອກາດຊາວໜຸ່ມລາວ ໃນການເຝິກການອ່ານເປັນພາສາອັງກິດໄປພ້ອມ ຊຶ່ງແມ່ນທັກສະຈໍາເປັນອີກອັນໜຶ່ງ ທີ່ຊາວໜຸ່ມຕ້ອງໄດ້ພັດທະນາ ເພາະວ່າ ຍິ່ງຮູ້ຫຼາຍພາສາກໍຍິ່ງມີໂອກາດຫຼາຍຂຶ້ນ ໃນການຮັບເອົາຄວາມຮູ້ໃຫມ່ໆໃຫ້ຕົນເອງ.

ປື້ມ “ແມງໄມ້ຢູ່ທຸກແຫ່ງ” ເຫຼັ້ມນີ້ໃຊ້ເວລາ 5 ປີ ໃນການເກັບກໍາຂໍ້ມູນ, ຂຽນ ແລະພິມອອກມາໃນປີ 2016, ພິມຄັ້ງທີ 1 ຈໍານວນ 5,000 ຫົວ, ຂາຍໃນລາຄາ 45.000 ກີບຕໍ່ໜຶ່ງຫົວ ແລະສາມາດຫາຊື້ໄດ້ຕາມຮ້ານຂາຍປື້ມທົ່ວໄປ ແລະສາມາດສັ່ງຊື້ໄດ້ທີ່ຮ້ານຂາຍປື້ມດອກເກດ.