ເລຂາຄະນະພັກ ສູນກາງສະຫະພັນກຳມະບານລາວ ເນັ້ນໃຫ້ເພີ່ມທະວີສຶກສາອົບຮົມການເມືອງ-ແນວຄິດ ໃຫ້ມີຄວາມໜັກແໜ້ນ

ໃນໂອກາດຈັດກອງປະຊຸມໃຫຍ່ ຄັ້ງທີ XIV ຂຶ້ນ ເພື່ອສະຫລຸບການຈັດຕັ້ງປະຕິບັດວຽກງານຂອງ ສູນກາງສະຫະພັນກຳມະບານລາວ ໃນໄລຍະຜ່ານມາ ແລະ ວາງທິດທາງແຜນການໃນຕໍ່ໜ້າ ເມື່ອບໍ່ດົນມານີ້, ທ່ານ ປ້ານ ນ້ອຍມະນີ ກໍາມະການສູນກາງພັກ, ເລຂາຄະນະພັກ ສູນກາງສະຫະພັນກຳມະບານລາວ ໄດ້ເນັ້ນໃຫ້ຄະນະສະຫະພັນກຳ ມະບານ ຈົ່ງເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກກຳມະບານ ໃຫ້ມີຄວາມໜັກແໜ້ນ ແລະ ເຂັ້ມແຂງ, ປັບປຸງການຈັດຕັ້ງ ແລະ ການນຳພາ ໃນການປະຕິບັດໜ້າທີ່ວຽກງານໃຫ້ມີຄວາມເໝາະສົມ ແລະ ມີຜົນສຳເລັດຍິ່ງໃຫຍ່ກວ່າເກົ່າ.

ພ້ອມນີ້, ທ່ານຍັງເນັ້ນໃຫ້ເອົາໃຈໃສ່ກໍ່ສ້າງ ແລະ ຍົກລະດັບຄວາມຮູ້ຄວາມສາມາດໃຫ້ແກ່ສະມາຊິກກຳມະບານ ໃຫ້ມີຄວາມກ້າວໜ້າ ແລະ ທັນຍຸກທັນສະໄໝ, ນຳພາການ ຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ໃຫ້ເປັນຂະບວນຟົດຟື້ນ ແລະ ກວ້າງຂວາງ, ທັງຮັບປະກັນປະລິມານ ແລະ ຄຸນນະພາບ; ເພີ່ມທະວີການຈັດຕັ້ງປະຕິບັດແຜນການ ແລະ ຄາດໝາຍສູ້ຊົນທີ່ວາງໄວ້ໃຫ້ໄດ້ຮັບປະສິດທິຜົນ, ຍົກສູງແບບແຜນການນຳພາ, ເຕົ້າໂຮມຄວາມສາມັກຄີເປັນປຶກແຜ່ນ, ມີຄວາມສະດຸ້ງໄວ, ຊຸກຍູ້ສົ່ງເສີມສະມາຊິກກຳມະບານ ໃຫ້ເປັນມະຫາຊົນທີ່ກ້າວໜ້າ ແລະ ດີເດັ່ນ ພ້ອມທັງເສີມຂະຫຍາຍການພົວພັນຮ່ວມມືກັບພາກພື້ນ ແລະ ສາກົນ ເພື່ອພັດທະນາສະຫະພັນກຳມະບານ ສຳນັກງານສູນກາງສະຫະພັນກຳມະບານລາວ ໃຫ້ມີບາດກ້າວຂະຫຍາຍຕົວຂຶ້ນຢ່າງບໍ່ຢຸດຢັ້ງ.

ໃນໂອກາດດຽວກັນ, ຍັງໄດ້ມີການປະດັບຫລຽນກາກຳມະບານ ແລະ ທຸງໄຊ, ຫລຽນກາກຳມະບານ, ໃບຍ້ອງຍໍ ແລະ ໃບຊົມເຊີຍ ໃຫ້ແກ່ສະຫະພັນກຳມະບານ ສຳນັກ ງານສູນກາງສະຫະພັນກຳມະບານລາວ ແລະ ຜູ້ທີ່ມີຜົນງານດີເດັ່ນ ຕື່ມອີກ.