ໂຮງຮຽນ ປາດຖະໜາສະຫຼຸບສົກຮຽນ 2016-2017

ໃນວັນທີ 24 ມິຖຸນາ ນີ້, ໂຮງຮຽນ ປາດຖະໜາ ໄດ້ຈັດພິທີສະຫຼຸບ ສົກຮຽນປີ 2016-2017 ຢູ່ຫໍປະຊຸມແຫ່ງຊາດ, ໂດຍການເຂົ້າຮ່ວມຂອງທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະກິລາ ນະຄອນຫຼວງ, ມີບັນດາຄູອາຈານ, ຜູ້ປົກຄອງ ແລະນັກຮຽນເຂົ້າຮ່ວມຈໍານວນຫຼວງຫຼາຍ.

ທ່ານ ບຸນຕີ ສິດທິນົນທອງ ອໍານວຍການໂຮງຮຽນ ດັ່ງກ່າວໃຫ້ຮູ້ວ່າ: ສົກຮຽນ 2016-2017 ນີ້ ມີນັກຮຽນທັງໝົດ 1.353 ຄົນ, ຍິງ 708 ຄົນ. ຊັ້ນອະນຸບານ 417 ຄົນ, ຍິງ 208 ຄົນ, ຊັ້ນປະຖົມສຶກສາ 591 ຄົນ, ຍິງ 321 ຄົນ, ຊັ້ນມັດທະຍົມຕົ້ນ 345 ຄົນ, ຍິງ 179 ຄົນ,  ມີຄູອາຈານ ແລະພະນັກງານທັງໝົດ 70 ຄົນ, ແລະໃນສົກຮຽນນີ້ ໄດ້ສົ່ງນັກຮຽນເຂົ້າສອບເສັງນັກຮຽນເກັ່ງຊັ້ນ ປ 5 ຮອບຄັດເລືອກ 9 ຄົນ ໃນ 3 ວິຊາ, ວິຊາລະ 3 ຄົນ ແລະສາມາດສອບເສັງໄດ້ນັກຮຽນເກັ່ງຂັ້ນເມືອງ 6 ຄົນ, ຍິງ 6 ຄົນ. ຜ່ານເຂົ້າໄປເສັງຂັ້ນນະຄອນຫຼວງ ໄດ້ທີ 2  ຂັ້ນນະຄອນຫຼວງ 1 ຄົນ ເປັນຍິງ ໃນວິຊາພາສາລາວ ແລະໄດ້ລາງວັນຊົມເຊີມ 4 ຄົນ ເປັນຍິງໝົດ; ສ່ວນຊັ້ນມັດທະຍົມສຶກສາ ມ 4 ໄດ້ສົ່ງເຂົ້າສອບເສັງຄັດເລືອກນັກຮຽນເກັ່ງຂັ້ນເມືອງ 10 ຄົນ ໃນ 4 ວິຊາ. ໃນນັ້ນເສັງໄດ້ 7, ຍິງ 6 ຄົນ. ສອບເສັງໄດ້ນັກຮຽນເກັ່ງຂັ້ນນະຄອນຫຼວງມີຄື: ນາງ ດາວສະຫວັນ ເຫງົ້າພາສີ ໄດ້ຄະແນນອັນດັບ 1 ວິຊາ ເຄມີສາດ ແລະໄດ້ຕາງໜ້າໃຫ້ນະຄອນຫຼວງເຂົ້າສອບເສັງນັກຮຽນເກັ່ງລະດັບຊາດ ແລະສາມາດສອບເສັງໄດ້ທີ 1 ລະດັບຊາດ.

ໃນໂອກາດດັ່ງກ່າວ ໂຮງຮຽນຍັງໄດ້ມອບທຶນການສຶກສາ ແລະໃບຍ້ອງຍໍໃຫ້ນັກຮຽນເກັ່ງແຕ່ລະຊັ້ນ ແລະມອບໃບຍ້ອງຍໍຊົມເຊີຍໃຫ້ຜູ້ປົກຄອງ ແລະຄູອາຈານພາຍໃນໂຮງຮຽນອີກດ້ອຍ.