ກະຊວງການເງິນລົງຊຸກຍູ້ການຈັດເກັບລາຍຮັບງົບປະມານຢູ່ແຂວງສະຫວັນນະເຂດ

ໃນວັນທີ 26 ສິງຫານີ້, ຄະນະຊຸກຍູ້ການຈັດເກັບລາຍຮັບຂອງກະຊວງການເງິນ, ຊຶ່ງນຳໂດຍທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງດັ່ງກ່າວ ໄດ້ລົງເຄື່ອນໄຫວຊຸກຍູ້ການຈັດເກັບລາຍຮັບງົບປະມານຢູ່ແຂວງສະຫວັນນະເຂດ ແລະ ໄດ້ຮັບຟັງລາຍງານຈາກຫົວໜ້າພະແນກການເງິນແຂວງ ກ່ຽວກັບການຈັດເກັບລາຍຮັບງົບປະມານ 7 ເດືອນຜ່ານມາ ທົ່ວແຂວງປະຕິບັດໄດ້ 741 ກວ່າຕື້ກີບເທົ່າກັບ 45,81% ຂອງແຜນການປີ, ຖ້າທຽບໃສ່ໄລຍະດຽວຂອງປີຜ່ານມາຫຼຸດລົງ 1,75% ໃນນີ້, ລາຍຮັບພູດຂອງສູນກາງປະຕິບັດໄດ້ 434,37 ຕື້ກີບເທົ່າກັບ 50,85 % ຂອງແຜນການປີ, ຖ້າທຽບໃສ່ໄລຍະດຽວກັນເພີ່ມຂຶ້ນ 7,52% ໂດຍລວມແລ້ວ ແມ່ນສາມາດປະຕິບັດຕາມການຊີ້ນຳຂອງຂັ້ນເທິງຢ່າງເປັນປົກກະຕິ.

ແຕ່ຄຽງຄູ່ກັນນີ້ການປະຕິບັດແຜນລາຍຮັບ-ລາຍຈ່າຍຍັງໄດ້ຮັບຜົນກະທົບຈາກບັນຫາຕ່າງໆເປັນຕົ້ນ: ກະຊວງການເງິນໄດ້ມີການປັບປຸງ 3 ກົດໝາຍກ່ຽວກັບວຽກງານສ່ວຍສາອາກອນ ຈຶ່ງມີຜົນກະທົບເບື້ອງຕົ້ນຕໍ່ການຈັດເກັບລາຍຮັບຂອງແຂວງ, ພະຍາດໂຄວິດ-19 ບາດໄດ້ສົ່ງຜົນກະທົບໂດຍກົງຕໍ່ການນໍາເຂົ້າ-ສົ່ງອອກສິນຄ້າ, ການຜະລິດຂອງບັນດາໂຮງຈັກ-ໂຮງງານ ແລະ ຫົວໜ່ວຍທຸລະກິດຕ່າງໆ.

ໃນໂອກາດນີ້, ທ່ານຮອງລັດຖະມົນຕີ ໄດ້ມີທິດຊີ້ນຳໃນການປະຕິບັດວຽກງານຕ່າງໆໃຫ້ມີຄວາມສະດວກ ແລະ ສອດຄ່ອງກັບສະພາບຕົວຈິງ, ພ້ອມເພີ່ມທະວີການປະສານງານກັນລະຫວ່າງຂະແໜງການໃຫ້ໄປທາງດຽວເປັນຕົ້ນ: ຕ້ອງໄດ້ຊອກຖານຂໍ້ມູນໃນການສ້າງແຜນການຈັດເກັບລາຍຮັບໃນແຕ່ລະຂະ  ແໜງການຕ້ອງມີຈຸດສຸມໃນການຈັດຕັ້ງການຈັດເກັບລາຍຮັບເຂົ້າງົບປະມານໃຫ້ໄດ້ຕາມລະດັບຄາດໝາຍ.