ລັດເຊຍຈະມີວັກຊີນທີ 2 ໃນເດືອນກັນຍານີ້.
ປະທານາທິບໍດີ ວະລາດີເມຍປູຕິນ ລັດເຊຍ, ວັນທີ 27 ສິງຫານີ້ ປະກາດວ່າ ວັກຊີນທີ 2 ຂອງລັດເຊຍຈະອອກມາໃນເດືອນກັນຍາທີ່ຈະມາເຖິງ. ໂດຍແມ່ນສະຖາບັນ Vector ເປັນຜຸ້ພັດທະນາຂຶ້ນມາ.
ວັກຊີນປ້ອງກັນໂຄວິດ-19 ຕົວທຳອິດຂອງລັດເຊຍ ຖືກພັດທະນາຂຶ້ນມາໂດຍສະຖາບັນລະບາດວິທະຍາ ແລະ ຈຸລິນຊີ Gamaleya ແລະ ໃສ່ຊື່ວ່າ Sputnik V, ໄດ້ຈົດທະບຽນໃນຕົ້ນເດືອນສິງຫານີ້. ວັກຊີນທີ 2 ນີ້ມີພູມຄຸ້ມກັນເຊື້ອໄວຣັດໄດ້ເປັນເວລາ 2 ປີ.
ທ່ານ ປູຕີນເວົ້າວ່າ: “ພວກເຮົາເຮັດທຸກສິ່ງທຸກຢ່າງເພື່ອໃຫ້ວັກຊີນທີ 2 ໄດ້ຈົດທະບຽນບົນພື້ນຖານເງື່ອນໄຂການຄົ້ນຄ້ວາທີ່ເລິກເຊິ່ງ ແລະ ການທົດລອງທີ່ກ້ວາງຂວາງ. ພວກເຮົາຈະປະຕິບັດຕາມທຸກຂັ້ນຕອນຂອງການຄົ້ນຄ້ວາຂອງລັດເຊຍ”.
ແຫຼ່ງຂ່າວຈາກ RIA ວັນທີ 21 ສິງຫາ ໃຫ້ຮູ້ວ່າ: ວັກຊີນປ້ອງກັນໂຄວິດ-19 ທີ 2 ຂອງລັດເຊຍ ໄດ້ທຳການທົດລອງໃນເບື້ອງຕົ້ນກັບ 6 ຄົນ. ຜູ້ທີ່ຖືກສັກວັກຊີນ ຮູ້ສຶກເຈັບບ່ອນຮອຍເຂັມສັກ ຫຼັງຈາກນັ້ນສອງສາມວັນກໍຫາຍດີ.
ຂ່າວ: ລູກເມືອງພວນ(ແຫຼ່ງຂ່າວ zingnews) .
