ນະຄອນຫລວງ ກຽມຈັດກິດຈະກຳບໍລິຈາກເລືອດ ຊົມເຊີຍວັນຍຶດອຳນາດ 23 ສິງຫາ
August 27, 2020 - 5:51 PM
ອົງການກາແດງ, ສູນເລືອດແຫ່ງຊາດ ຮ່ວມກັບນະຄອນຫລວງວຽງຈັນ ກຽມຈັດກິດຈະກໍາບໍລິຈາກເລືອດຊ່ວຍເຫລືອສັງຄົມ ເພື່ອລະນຶກວັນຍຶດອໍານາດ 23 ສິງຫາ (23/08/1975-23/08/2020) ເຊິ່ງຈະຈັດຂຶ້ນໃນວັນທີ 28 ສິງຫານີ້ ຢູ່ຫ້ອງວ່າການປົກຄອງນະຄອນຫລວງວຽງຈັນ ເພື່ອຊ່ວຍເຫລືອສັງຄົມ.
ເຊິ່ງການບໍລິຈາກເລືອດ, ນອກຈາກເປັນການຊ່ວຍເຫລືອເພື່ອນມະນຸດດ້ວຍກັນແລ້ວ ມັນຍັງສົ່ງຜົນດີຕໍ່ສຸຂະພາບເຮົາອີກດ້ວຍ ຄື ເຮັດໃຫ້ລະບົບການໝູນວຽນຂອງເລືອດດີຂຶ້ນ ຫລື ຊ່ວຍກະຕຸ້ນເລືອດໃໝ່ຂຶ້ນມາ, ຫລຸດຜ່ອນຄວາມສ່ຽງຈາກພະຍາດຕ່າງໆ, ເຮັດໃຫ້ໜ້າຕາຜິວພັນສົດໃສຂຶ້ນ.
ສະນັ້ນ, ອົງການກາແດງລາວ, ສູນບໍລິຈາກເລືອດແຫ່ງຊາດ ຈຶ່ງຂໍແຈ້ງມາຍັງທ່ານຜູ້ທີ່ມີໃຈເອື້ອເຟື້ອເພື່ອແຜ່ ຢາກຮ່ວມທໍາບຸນຊ່ວຍເຫລືອສັງຄົມ ກໍເຊີນເຂົ້າຮ່ວມໄດ້ຢູ່ຫ້ອງປະຊຸມໃຫຍ່ຊັ້ນ 4 ເລີ່ມແຕ່ໃນເວລາ 08:30 ຫາ 15:30 ໂມງ.
