ການຕອບໂຕ້ເຊື້ອເຮສໄອວີ ຢູ່ ສປປ ລາວ ຍັງມີສິ່ງທ້າທາຍຫລາຍດ້ານ
ເຊິ່ງແຕ່ລະປີຢູ່ລາວເຮົາຍັງມີຜູ້ຕິດເຊື້ອຫລາຍ, ຜູ້ຊາຍທີ່ມີເພດສຳພັນກັບຊາຍແມ່ນມີຄວາມສ່ຽງສູງ, ການສົ່ງເຊື້ອຈາກແມ່ຫາລູກກໍເຫັນວ່າມີທ່າອ່ຽງສູງຂຶ້ນ, ຜູ້ຕິດເຊື້ອເຮສໄອວີ ແລະ ຜູ້ເປັນພະຍາດເອດ ຍັງຂາດການຕິດຕາມຫລາຍ ແລະ ການກິນຢາກໍບໍ່ທັນຕໍ່ເນື່ອງ ແລະ ເປັນປົກກະຕິ, ຍ້ອນມີຂໍ້ຫຍຸ້ງຍາກໃນໄລຍະພະຍາດໂຄວິດ-19 ລະບາດ ແລະ ຂາດງົບປະ ມານມາຮັບການບໍລິການກວດສຸຂະພາບ ແລະ ມາຮັບຢາ, ເຊິ່ງເຮັດໃຫ້ແຕ່ລະປີມີຜູ້ຕ້ອງການປິ່ນປົວດ້ວຍຢາ ARV (ຢາປົວເຊື້ອເຮສໄອວີ) ມີຈຳນວນເພີ່ມຂຶ້ນ.
ນອກຈາກນີ້, ການເຂົ້າເຖິງກຸ່ມທີ່ມີຄວາມສ່ຽງມີຄວາມຫຍຸ້ງຍາກ, ຄວາມຮູ້ຄວາມເຂົ້າໃຈກ່ຽວກັບເຊື້ອເຮສໄອວີ ແລະ ພະຍາດເອດຂອງສັງຄົມ, ຊຸມຊົນ ແລະ ບຸກຄົນຍັງບໍ່ທັນສູງ, ການມີສ່ວນຮ່ວມຂອງພາກສ່ວນທີ່ກ່ຽວຂ້ອງຍັງບໍ່ທັນສູງ. ພ້ອມນີ້, ການຈໍາແນກ, ລັງກຽດຜູ້ຕິດເຊື້ອດັ່ງກ່າວ ຍັງມີຢູ່ໃນສັງຄົມ.
ຈຳນວນສະສົມຜູ້ຕິດເຊື້ອເຮສໄອວີ ແລະ ເປັນພະຍາດເອດ ໃນທົ່ວປະເທດແຕ່ປີ 1990 ເຖິງເດືອນມິຖຸນາ 2020 ມີທັງໝົດ 20.372 ຄົນ, ໃນນີ້ຜູ້ຕິດເຊື້ອເຮສໄອວີ ມີ 14.460 ຄົນ, ຜູ້ເປັນພະຍາດເອດ 5.912 ຄົນ ແລະ ເສຍຊີວິດແລ້ວ 4.760 ຄົນ, ຜູ້ຕິດເຊື້ອສ່ວນຫລາຍແມ່ນອາຊີບເປັນກຳມະກອນ, ແມ່ເຮືອນ, ກຸ່ມເຄື່ອນຍ້າຍ, ຄ້າຂາຍ ແລະ ອື່ນໆ, ເຊິ່ງຢູ່ໃນເກນອາຍຸລະຫວ່າງ 20-50 ປີ ແລະ ແຂວງທີ່ມີຈໍານວນຜູ້ຕິດເຊື້ອຫລາຍກວ່າໝູ່ແມ່ນ ນະຄອນຫລວງວຽງຈັນ, ໄຊສົມບູນ ແລະ ແຂວງ ຫົວພັນ.
ຂໍ້ມູນດັ່ງກ່າວ, ລາຍງານໂດຍ ທ່ານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາ ທາລະນະສຸກ, ທັງເປັນປະທານຄະນະກໍາມະການແຫ່ງຊາດຕ້ານເອດ ຕໍ່ກອງປະຊຸມຄົບຄະນະ ຂອງຄະນະກຳມະການແຫ່ງຊາດຕ້ານເອດ, ເຊິ່ງໄດ້ຈັດຂຶ້ນໃນວັນທີ 27 ສິງຫານີ້ ທີ່ນະຄອນຫລວງວຽງຈັນ, ມີຈຸດປະສົງເພື່ອທົບທວນຄືນຄວາມຄືບໜ້າ ໃນການຈັດຕັ້ງປະຕິບັດວຽກງານສະກັດກັ້ນ ແລະ ຕ້ານເຊື້ອເຮສໄອວີ/ພະຍາດເອດ 2020 ຄົ້ນຄວ້າຮ່າງແຜນຍຸດທະສາດແຫ່ງຊາດ ຕ້ານເອດ 10 ປີ ຕໍ່ (2021-2030) ແລະ ແຜນ 5 ປີ (2021-2025).
