ເກີດອຸປະຕິເຫດລົດສິບລໍ້ປະທະລົດຈັກ ເຮັດໃຫ້ມີຜູ້ເສຍຊີວິດຄາທີ່ 5 ຄົນ

ອຸປະຕິເຫດສະຫຍອງຂວັນລົດສິບລໍ້ແກ່ຊາຍຕຳກັບລົດຈັກຢ່າງແຮງເຮັດໃຫ້ມີຜູ້ເສຍຊີວິດຄາທີ່ 5 ຄົນ, ເຊິ່ງເຫດດັ່ງກ່າວ ໄດ້ເກີດຂຶ້ນຢູ່ບໍລິເວນພູຫ້ວຍພໍ່ ເມືອງນອງ ແຂວງສະຫວັນນະເຂດ ໃນເວລາປະມານ 10:35 ນາທີ ຂອງວັນທີ 26 ສິງຫານີ້.

ເຈົ້າໜ້າທີ່ຈະລາຈອນໃຫ້ຮູ້ວ່າ: ທ້າວ ອຸດົມໄຊ ສົມເພັດ ອາຍຸ 40 ປີ, ຢູ່ບ້ານດົງນາຄຳ ນະຄອນໄກສອນ ພົມວິຫານ ແຂວງສະຫວັນນະເຂດ ເປັນຄົນຂັບຂີ່ລົດບັນທຸກ 10 ລໍ້ດັ່ງກ່າວ ໝາຍເລກທະບຽນ ບກ 7756, ສ່ວນຄູ່ກໍລະນີ ແມ່ນຂັບຂີ່ລົດຈັກຊ້ອນກັນມາ 5 ຄົນ ເຊິ່ງຜູ້ຂັບລົດມີຊື່ວ່າ: ທ້າວ ບຸນທຳ ອາຍຸ 27 ປີ, ປະຊາຊົນ ບ້ານນາລົງໃໝ່ ພ້ອມລູກ 1 ຄົນຄື: ທ້າວ ຕະເລ ອາຍຸ 3 ປີ ແລະ ຫຼານອີກ 2 ຄົນຊື່ທ້າວ ອາເບີ ອາຍຸ 5 ປີ, ທ້າວ ເຊ ອາຍຸ 6 ປີ ພ້ອມດ້ວຍນາງ ອາເລິ໋ຍ ອາຍຸ 35 ປີ ຜູ້ເປັນແມ່ເຖົ້າ. ເນື່ອງຈາກເສັ້ນທາງໃນເຂດດັ່ງກ່າວ ເປັນພູຄ້ອຍຊັນ, ຄົດໂຄ້ງ ແລະຈາກສະພາບລົດສິບລໍ້ ທີ່ຄາດວ່າ ມີບັນຫາໃນຂະນະທີ່ກຳລັງເຂົ້າເລກລົດ ຈຶ່ງເຮັດໃຫ້ລົດສິບລໍ້ເສຍຫຼັກໄປຕຳເອົາລົດຈັກທີ່ກຳລັງຂັບຂີ່ມາທັງຝ່າຍກົງກັນຂ້າມປະທະກັນໜ້າເຊິ່ງໜ້າຢ່າງແຮງ ແລ້ວຕົກລົງຫ້ວຍ ເຮັດໃຫ້ຜູ້ຂັບລົດໃຫຍ່ ແລະ ລົດຈັກພ້ອມດ້ວຍຜູ້ຊ້ອນທ້າຍ 3 ຄົນ ເສຍຊີວິດຄາທີ່; ສ່ວນນາງ ອາເລິ໋ຍ ແມ່ນບາດເຈັບສາຫັດ ແລະໄດ້ນຳສົ່ງໂຮງໝໍໃນເວລາຕໍ່ມາ.