ລົດບັນທຸກນ້ຳມັນຂວ້ຳເກີດໄຟໄໝ້ຢູ່ປາກິດສະຖານ ມີຜູ້ເສຍຊີວິດ 123 ຄົນ, ບາດເຈັບອີກນັບຮ້ອຍ
ອິສລາມາບັດ 25 ມິຖຸນາ: ເຈົ້າໜ້າທີ່ປາກິດສະຖານ ລາຍງານວ່າ: ມີຜູ້ເສຍຊີວິດຢ່າງໜ້ອຍ 123 ຄົນ ແລະ ບາດເຈັບອີກກວ່າ 100 ຄົນ ຂະນະພະຍາຍາມຍາດເອົານ້ຳມັນທີ່ໄຫລອອກມາ ພາຍຫລັງລົດບັນທຸກນ້ຳມັນຂວ້ຳ ແລະ ໄຟໄໝ້ ທາງພາກກາງຂອງປາກິດສະຖານ ໃນວັນທີ 25 ມິຖຸນານີ້.
ເຈົ້າໜ້າທີ່ລະດັບສູງໃນທ້ອງຖິ່ນໃຫ້ສຳພາດສະຖານີໂທລະພາບຂອງທາງການວ່າ: ມີຜູ້ເສຍຊີວິດກວ່າ 123 ຄົນ ແລະ ບາດເຈັບອີກນັບຮ້ອຍຄົນ ພາຍຫລັງລົດບັນທຸກນ້ຳມັນຂວ້ຳ ແລະ ນ້ຳມັນຮົ່ວໄຫລອອກມາຂະນະຄົນພາກັນເຂົ້າໄປໂຕ່ງເອົານ້ຳມັນ ແລະ ເກີດລະເບີດໄຟໄໝ້. ປັດຈຸບັນຍັງບໍ່ມີລາຍງານຢືນຢັນຈາກເຈົ້າໜ້າທີ່ເຖິງສາເຫດຂອງອຸປະຕິເຫດເທື່ອນີ້ ຫ່າງໄປປະມານ 670 ກິໂລແມັດທາງໃຕ້ຂອງນະຄອນຫລວງອິສລາມາບັດ. ກອງທັບປາກິດສະຖານຖະແຫລງວ່າ: ໄດ້ຮົ່ງເຮລິກົບແຕໄປອົບພະຍົບຜູ້ໄດ້ຮັບບາດເຈັບຕາມໂຮງໝໍແລ້ວ ໂດຍສະເພາະຜູ້ຖືກໄຟໄໝ້ອາການສາຫັດ, ທາງການລັດປັນຈາບສັ່ງໃຫ້ປິ່ນປົວຢ່າງສຸດຄວາມສາມາດ. ນາຍົກລັດຖະມົນຕີ ນາວາດ ຊາຣີບ ຖະແຫລງສະແດງຄວາມເສຍໃຈຢ່າງຍິ່ງຈາກໂສກນາດຕະກຳທີ່ມີຜູ້ເສຍຊີວິດຈຳນວນຫລາຍ, ປາກິດສະຖານມີຜູ້ເສຍຊີວິດຈາກອຸປະຕິເຫດຈະລາຈອນສູງ ເນື່ອງຈາກຖະໜົນບໍ່ດີ, ລົດເກົ່າ ແລະ ຂັບຂີ່ປະໝາດ.
