ສົກຮຽນໃໝ່ນີ້ສຶກສາເນັ້ນເຂັ້ມງວດມາດຕະການປ້ອງກັນໂຄວິດ-19
ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງ ສຶກສາທິການ ແລະ ກິລາ ໄດ້ຖະແຫລງ ຂ່າວຕໍ່ສື່ມວນຊົນ ໃນວັນທີ 26 ສິງຫານີ້ວ່າ: ສຳລັບສົກຮຽນໃໝ່ 2020-2021, ເຊິ່ງຈະໄຂຂຶ້ນໃນວັນທີ 1 ກັນຍາ ທີ່ຈະມາເຖິງນີ້ໃນຂອບເຂດທົ່ວປະເທດດັ່ງທຸກໆປີຜ່ານມາ. ແຕ່ປີນີ້ພວກເຮົາໄດ້ຮັບຜົນກະທົບ ຈາກການລະບາດຂອງພະຍາດໂຄວິດ-19 ເຮັດໃຫ້ຂະແໜງການສຶກສາ ແລະ ກິລາ ຕ້ອງໄດ້ເນັ້ນປະຕິບັດມາດຕະການປ້ອງການພະຍາດດັ່ງກ່າວໃຫ້ນັກຮຽນເຂົ້ມງວດກວ່າເກົ່າ, ເຖິງວ່າຈະມີຄວາມຫຍຸ້ງຍາກໃນການປະຕິບັດມາດຕະການຮັກສາໄລຍະຫ່າງ, ການນຳໃຊ້ຜ້າອັດປາກ-ອັດດັງ ກໍຄືເຈວລ້າງມືກໍອາດຈະຂາດເຂີນ, ສ່ວນນັກຮຽນທີ່ສຶກສາຢູ່ຕ່າງປະເທດບໍ່ໄດ້ກັບໄປສືບຕໍ່ຮຽນ, ທຶນການສຶກສາຂອງຫລາຍປະເທດຖືກໂຈະ, ນັກສຶກສາຈົບຮຽນໃໝ່ຍາກທີ່ຈະ ໄດ້ເຂົ້າສູ່ພາກແຮງງານ ແລະ ບັນຫາອື່ນໆ.
ແຕ່ເຖິງຢ່າງໃດກໍຕາມ ຂະແໜງການສຶກສາ ແລະ ກິລາ ກໍຈະພະຍາຍາມຊ່ວຍໃຫ້ໄດ້ຈັດຕັ້ງການຮຽນ-ການສອນໄດ້ເປັນປົກກະຕິ ທັງໃຫ້ຮັບ ປະກັນຄຸນນະພາບໃນສະພາບແວດລ້ອມໃໝ່ນີ້.
ສຳລັບຜູ້ບໍລິຫານການສຶກສາ ແລະ ຄູອາຈານ ຈະຕ້ອງໄດ້ທົບທວນຄືນ ກ່ຽວກັບຮູບແບບການຈັດຕັ້ງການຮຽນ-ການສອນ ຈະຕ້ອງປັບປ່ຽນຫຍັງແດ່ເພື່ອໃຫ້ກາຍເປັນຄວາມຊິນເຄີຍໃນການດຳລົງຊີວິດປະຈຳວັນແບບໃໝ່ (New Normal) ຈະນຳໃຊ້ເຕັກໂນໂລຊີເຂົ້າມາຊ່ວຍຄືແນວໃດ?, ຈະນຳໃຊ້ຊ່ອງໂທລະພາບສຶກສາ ແລະ ກິລາ ໃຫ້ເກີດປະໂຫຍດແນວໃດ?ແກ່ການພັດທະນາວິຊາຊີບຄູ, ກຸ່ມໂຮງຮຽນ ແລະ ກຸ່ມເປົ້າໝາຍຜູ້ຮຽນ ທີ່ເຂົ້າບໍ່ເຖິງອິນເຕິເນັດ, ພ້ອມນັ້ນ ກະຊວງສຶກສາທິການ ແລະ ກິລາ ຈະໄດ້ຈັດພິມ ແລະ ແຈກຢາຍປຶ້ມແບບຮຽນໃຫ້ພຽງພໍ ສຳລັບນັກຮຽນທີ່ຢູ່ເຂດຊົນນະບົດຫ່າງໄກສອກຫລີກ ເພື່ອ ຮັບປະກັນໃຫ້ນັກຮຽນກ່ອນໄວຮຽນ, ປະຖົມສຶກສາ ແລະ ມັດທະຍົມສຶກສາຕອນຕົ້ນ ຈະໄດ້ພຽງພໍ, ຖ້າຫາກມີເຫດການສຸກເສີນ ທີ່ບໍ່ຄາດຄິດເກີດຂຶ້ນໃນຕໍ່ໜ້າ. ສ່ວນພໍ່ແມ່ຜູ້ປົກຄອງ ໃນເຂດທີ່ບໍ່ສາມາດເຂົ້າເຖິງຜ້າອັດປາກອັດດັງ ກໍຂໍໃຫ້ຊ່ວຍລູກຫລານຂອງທ່ານ ໃນການຫຍິບຜ້າອັດປາກ-ອັດດັງ ໂດຍນຳໃຊ້ຜ້າສະອາດ ແລະ ວັດຖຸທີ່ສາມາດຫາໄດ້ໃນທ້ອງຖິ່ນ, ເພື່ອເປັນການຫລຸດຜ່ອນຄ່າໃຊ້ຈ່າຍຂອງຄອບຄົວ ແລະ ໃຫ້ມີສະຕິຕໍ່ສະພາບການປ່ຽນແປງຂອງດິນຟ້າອາກາດ, ເຊິ່ງອາດມີຄວາມສ່ຽງທີ່ຈະເກີດໄພອັນຕະລາຍ. ດັ່ງນັ້ນ, ຈຶ່ງຮຽກຮ້ອງໃຫ້ຜູ້ບໍລິຫານການສຶກສາ ແລະ ກິລາ ແຕ່ລະຂັ້ນ ແລະ ພໍ່ແມ່ຜູ້ປົກຄອງຈົ່ງຕິດຕາມແຈ້ງການພະຍາກອນອາກາດຢ່າງໃກ້ຊິດ ແລະ ໃຫ້ການແຈ້ງເຕືອນສະຖານການສຶກສາໃນຂອບເຂດຄວາມຮັບຜິດຊອບຂອງທ່ານຢ່າງຕັ້ງໜ້າ.
ພ້ອມກັນນີ້, ສຳລັບນັກຮຽນ-ນັກສຶກສາ ແລະ ພໍ່ແມ່ຜູ້ປົກຄອງທີ່ມີລູກຫລານ ກຳລັງສຶກສາຢູ່ຕ່າງປະເທດ ຈົ່ງຕິດຕາມແຈ້ງການມາດຕະການ ແລະ ຂ່າວສານຈາກສະ ຖານເອກອັກຄະລັດຖະທູດ ສປປ ລາວ ເປັນປົກກະຕິ ພ້ອມກັນປະຕິບັດລະບຽບການຂອງປະເທດເຈົ້າພາບ ແລະ ມາດຕະການເຂົ້າ-ອອກ ສປປ ລາວ ດ້ວຍຄວາມຮັບຜິດຊອບສູງ.
