ເຟສບຸກ ກຽມຮ້ອງຟ້ອງລັດຖະບານໄທ ຫລັງຈາກຖືກສັ່ງໃຫ້ປິດກຸ່ມທີ່ມີເນື້ອຫາກ່ຽວຂ້ອງກັບສະຖາບັນສູງສຸດຂອງຊາດ
ໂຄສົກຂອງເຟສບຸກລະບຸວ່າ: ກຽມດຳເນີນການທາງກົດໝາຍກັບລັດຖະບານໄທ, ຫລັງຈາກທີ່ເຟສບຸກຖືກສັ່ງໃຫ້ປິດກຸ່ມທີ່ມີເນື້ອຫາກ່ຽວຂ້ອງກັບສະຖາບັນມະຫາກະສັດ ເຊິ່ງມີສະມາຊິກຫລາຍກວ່າ 1 ລ້ານຄົນ. ລ້າສຸດທາງຜູ້ກໍ່ຕັ້ງກຸ່ມໄດ້ຕັ້ງກຸ່ມໃໝ່ຂຶ້ນແລ້ວ ໃນໄລຍະເວລາປະມານ 1 ວັນ ຂະນະນີ້ສະມາຊິກໃນກຸ່ມຫລາຍກວ່າ 5 ແສນຄົນແລ້ວ.
ສຳນັກຂ່າວ ຊີເອັນເອັນ (CNN) ລາຍງານວ່າ: ທາງເຟສບຸກກຳລັງພິຈາລະນາທີ່ຈະດຳເນີນການທາງກົດໝາຍກັບລັດຖະບານໄທ, ຫລັງຈາກທີ່ທາງລັດຖະບານໄທສັ່ງໃຫ້ເຟສບຸກຈຳກັດການເຂົ້າເຖິງກຸ່ມ “ຣໍຍັນລີດມາກເກັດເພຈ” ພາຍໃນປະເທດໄທ, ໂດຍກຸ່ມດັ່ງກ່າວມີເນື້ອຫາກ່ຽວຂ້ອງກັບສະຖາບັນມະຫາກະສັດ ເຊິ່ງເປັນສະຖາບັນສູງສຸດຂອງຊາດ. ທັງນີ້ໂຄສົກຂອງເຟສບຸກໄດ້ໃຫ້ສຳພາດກັບທາງສຳນັກຂ່າວ ຊີເອັນເອັນ CNN ວ່າ: ທີ່ຜ່ານມາເຟສບຸກໄດ້ຮັບແຮງກົດດັນຈາກທາງລັດຖະບານໄທມາໂດຍຕະຫລອດວ່າອາດຈະຖືກດຳເນີນຄະດີຫາກໄມ່ຈຳກັດການເຂົ້າເຖິງ ແລະ ການໂອ້ລົມເນື້ອຫາທາງການເມືອງບາງຢ່າງພາຍໃນປະເທດໄທ.
ພ້ອມນີ້, ສຳນັກຂ່າວຣອຍເຕີ ໄດ້ລາຍງານເພີ່ມເຕີມວ່າ: ທາງເຟສບຸກໄດ້ຮັບຄຳສັ່ງສານເມື່ອວັນທີ 10 ສິງຫາຜ່ານມາ ໃຫ້ຈຳກັດການເຂົ້າເຖິງກຸ່ມດັ່ງກ່າວທີ່ມີສະມາຊິກຫລາຍກວ່າ 1 ລ້ານຄົນ ບໍ່ໃຫ້ເຂົ້າເຖິງໄດ້ຈາກປະເທດໄທພາຍໃນ 15 ວັນ ນັບແຕ່ຄຳສັ່ງສານ, ຖ້າຫາກເຟສບຸກບໍ່ເຮັດຕາມຄຳສັ່ງສານດັ່ງກ່າວ ກໍຈະຖືກດຳເນີນຄະດີຕາມ ພລບ ຄອມພິວເຕີ ແລະ ທາງເຟສບຸກກໍໄດ້ເຮັດຕາມຄຳສັ່ງສານ ໂດຍການປິດການເຂົ້າເຖິງກຸ່ມດັ່ງກ່າວຈາກພາຍໃນປະເທດໄທກ່ອນທີ່ຈະຄົບກຳນົດເສັ້ນຕາຍ 15 ວັນດັ່ງກ່າວ.
ທາງດ້ານໂຄໂສກຂອງເຟສບຸກ ໄດ້ລະບຸວ່າ: ຄຳຂໍໃຫ້ປິດການເຂົ້າເຖິງເນື້ອຫາແບບນີ້ຂອງລັດຖະບານໄທ “ຖືວ່າຮຸນແຮງ ຂັດກັບກົດໝາຍສິດທິມະນຸດລະຫວ່າງປະເທດ ແລະ ສົ່ງຜົນກະທົບອັນສຳຄັນຕໍ່ຄວາມສາມາດໃນການສະແດງອອກຂອງປະຊາຊົນ” ແລະ ຍັງລະບຸເຕີ່ມວ່າ “ເຟສບຸກເຮັດວຽກຢ່າງເຕັມທີ່ເພື່ອປົກປ້ອງ ແລະ ປ້ອງກັນສິດທິຂອງຜູ້ໃຊ້ອິນເຕີເນັດທຸກຄົນ ແລະ ພ້ອມທີ່ຈະດຳເນີນການທາງກົດໝາຍຕໍ່ຂໍ້ຮຽກຮ້ອງດັ່ງກ່າວ”.
ລ້າສຸດທາງດ້ານ ທ້າວປະວິນ ຊັດຊະວານພົງພັນ ເຊິ່ງເປັນຜູ້ກໍ່ຕັ້ງກຸ່ມດັ່ງກ່າວຂຶ້ນ ແລະ ໄດ້ຕັ້ງກຸ່ມໃໝ່ໃນລັກສະນະດຽວກັນຂຶ້ນມາແລ້ວ ໂດຍໃນຊ່ວງໄລຍະບໍ່ຮອດ 24 ຊົ່ວໂມງ ນັບແຕ່ກຸ່ມໃໝ່ຖືກກໍ່ຕັ້ງຂຶ້ນມີສະມາຊິກຫລາຍກວ່າ 520.000 ຄົນແລ້ວ.
