Belarus ຈະເປັນປະເທດທຳອິດນຳເຂົ້າວັກຊີນຕ້ານໂຄວິດ-19 ຂອງຣັດເຊຍ

ສຳນັກຂ່າວສານ baomoi, ວັນທີ 24 ສິງຫານີ້ ໃຫ້ຮູ້ວ່າ: Belarus ຈະເປັນປະເທດທຳອິດນຳເຂົ້າວັກຊີນຂອງຣັດເຊຍ, ໂດຍການພັດທະນາຈາກສະຖາບັນ Gamaleya ຂອງຣັດເຊຍ.

ຫ້ອງການສຳນັກງານເລຂາຂອງປະທານາທິບໍດີ Belarus, Lukashenko ໃຫ້ຮູ້ວ່າ: ປະທານາທິບໍດີຣັດເຊຍ ແລະ ປະທານາທິບໍດີ Belarus, Alexander Lukashenkoໄດ້ ເຫັນດີນຳກັນວ່າ: ປະຊາຊົນ Belarus ຈະສະໝັກໃຈດ້ວຍຕົນເອງເຂົ້າຮ່ວມສັກວັກຊີນທົດລອງໄລຍະ 3. ສະນັ້ນ, Belarus ຈະເປັນປະເທດທຳອິດນຳເຂົ້າວັກຊີນຂອງຣັດເຊຍ.

ທ່ານ Kirill Dmitriev, ຫົວໜ້າ RDIF ໃຫ້ຮູ້ວ່າ: ຂະນະນີ້ກອງທຶນໄດ້ຮັບໃບສັ່ງຊື້ຈາກ 20 ປະເທດແລ້ວ, ທ່ານໃຫ້ຮູ້ເພິ່ມເຕີມວ່າ: ຣັດເຊຍໄດ້ເຮັດຂໍ້ຕົກລົງກັບ 5 ປະເທດທີ່ມີຄວາມສາມາດຜະລິດວັກຊີນໄດ້ 500 ລ້ານໂດສຕໍ່ປີແລ້ວ.

ວັນທີ 19 ສິງຫາ ແມັກຊິກໂກໄດ້ປຶກສາຫາລືກັບ ມົສໂກ ໃຫ້ຮູ້ວ່າ: ແມັກຊິກໂກ ມີຈຸດປະສົງຢາກອາສາສັກທົດລອງວັກຊີນຕ້ານໂຄວິດ-19 ໄລຍະ 3 ຂອງຣັດເຊຍ.

ທ່າທີດັ່ງກ່າວແມ່ນຄວາມພະຍາຍາມຂອງແມັກຊິກໂກ ເພື່ອແນໃສ່ຮັບປະກັນການຕອບສະໜອງວັກຊີນໃຫ້ທັນກັບເວລາ ເພື່ອຄວບຄຸມໂຄວິດ-19 ຢູ່ໃນປະເທດຂອງຕົນ.

ຂ່າວ: ລູກເມືອງພວນ.