TikTok ວາງແຜນໃຊ້ໄມ້ຕາຍກັບ ສະຫະລັດ

ແຫຼ່ງຂ່າວວັນທີ 24 ສິງຫານີ້, ຈາກສຳນັກຂ່າວ nld ໃຫ້ຮູ້ວ່າ: ວັນທີ 23 ສິງຫາ, ByteDance ເຈົ້າຂອງກຳມະສິດແອັບ TikTok ປະກາດວ່າ ພວກເຂົາຈະຍື່ນຟ້ອງລັດຖະບານສະຫະລັດໃນວັນທີ 25 ສິງຫານີ້ ເພື່ອປົກປ້ອງສິດຜົນປະໂຫຍດ ແລະ ສິດຂອງຕົນໃນຂະນະທີ່ກະກຽມແຜນການ ປິດການເຄື່ອນໄຫວທຸລະກິດຂອງຕົນໃນສະຫະລັດ.

ByteDance ປະກາດວ່າ: “ໃນຊຸມປີຜ່ານມານີ້, ພວກເຮົາໄດ້ພະຍາຍາມຕິດຕໍ່ພົວພັນກັບລັດຖະບານສະຫະລັດ ແລະ ຕອບສະໜອງບັນດາວິທີການແກ້ໄຂໃນຄວາມເປັນຫ່ວງຂອງພວກເຂົາ. ແຕ່ລັດຖະບານສະຫະລັດບໍ່ຍອມທຳຄວາມເຂົ້າໃຈກັບຄວາມເປັນຈິງ, ບໍ່ຍອມປະຕິບັດຕາມຂັ້ນຕອນຂອງຂະບວນການຍຸຕິທຳທີ່ຈຳເປັນ, ບໍ່ຍອມເຈລະຈາກັບພາກເອກກະຊົນ. ດັ່ງນັ້ນ, ເພື່ອຮັບປະກັນບໍ່ໃຫ້ລ່ວງລະເມີດທາງດ້ານກົດໝາຍ ຂອງບໍລິສັດ ນັບທັງຜຸ້ນຳໃຊ້ແອບຂອງພວກເຮົາຢ່າງມີຄວາມສະເໝີພາບ, ພວກເຮົາຂໍປະກາດວ່າ ຈະດຳເນີນການຮ້ອງຟ້ອງລັດຖະບານສະຫະລັດ ເພື່ອປົກປ້ອງສິດຜົນປະໂຫຍດຂອງຕົນ”.

ນັບແຕ່ປີ 2019 ເປັນຕົ້ນມາ, ລັດຖະບານສະຫະລັດໄດ້ກ່າວຫາ TikTok ວ່າເປັນໄພຂົ່ມຂູ່ຕໍ່ຄວາມໝັ້ນຄົງແຫ່ງຊາດຂອງສະຫະລັດ. ວັນທີ 6 ສິງຫາ ປະທານາທິບໍດີ ດໍໂນທຣຳ ໄດ້ລົງນາມຄຳສັ່ງຫ້າມຕິດຕໍ່ພົວພັນກັບ ByteDance ເພື່ອແກ້ໄຂອັນທີ່ເອີ້ນວ່າ “ສະຖານະການລະດັບຊາດ”, ຊຶ່ງມີຜົນສັກສິດພາຍໃນ 45 ວັນ. ວັນທີ 14 ສິງຫາ ທຣຳ ໄດ້ລົງນາມຄຳສັ່ງອີກສະບັບໜຶ່ງ ບັງຄັບໃຫ້ ByteDance ຕ້ອງຂາຍ TikTok ພາຍໃນ 90 ວັນ.

ໜັງສືພິມ New York Timesໄດ້ລົງຂ່າວໃນໜ້າໜັງສືພິມວັນທີ 7 ສິງຫາ ໂດຍອ້າງອີງຈາກອົງການສືບລັບສູນກາງ (CIA) ໃຫ້ຮູ້ວ່າ: ບໍ່ທັນມີຫຼັກຖານໃດໆ ວ່າຈີນມີສ່ວນກ່ຽວຂ້ອງກັບຂໍ້ມູນຂອງ TikTok ຫຼື ການນຳໃຊ້ແອັບດັ່ງກ່າວເຂົ້າໃນໂທລະສັບຂອງຜູ້ນຳໃຊ້.

ຂ່າວ: ລູກເມືອງພວນ.