ເກີດເຫດລະເບີດແຕກຕິດຕໍ່ກັນຢູ່ໃນ ຟີລິບປິນ ຫຼາຍຄົນບາດເຈັບ ແລະ ຕາຍ

ຂ່າວຈາກ vnnet ວັນທີ 24 ສິງຫາໃຫ້ຮູ້ວ່າ: ໄດ້ເກີດເຫດລະເບີດແຕກສອງຄັ້ງຕິດຕໍ່ກັນ ເຮັດໃຫ້ເມືອງ Jolo ໃນຟີລິບປິນ ສະໜັ່ນຫວັ່ນໄຫວ.

ເຈົ້າໜ້າທີ່ ຟີລິບປິນໃຫ້ຮູ້ວ່າ: ເຫດລະເບີດແຕກສອງຄັ້ງຕິດຕໍ່ກັນ, ຢ່າງໜ້ອຍມີຜູ້ເສຍຊີວິດ 9 ຄົນ ແລະ ອີກ 18 ຄົນຖືກບາດເຈັບ. ເຈົ້າໜ້າທີ່ໄດ້ສົ່ງກຳລັງໄປທີ່ບ່ອນເກີດເຫດ ເພື່ອຊ່ວຍກູ້ໄພຜູ້ທີ່ຖືກເຄາະຮ້າຍ ແລະ ປ້ອງກັນຄວາມສະຫງົບປອດໄພ ບໍ່ໃຫ້ເກີດເຫດແຕກຊໍ້າຂຶ້ນອີກ.

ໂຄສົກຂອງເຈົ້າໜ້າທີ່ຕຳຫຼວດ ຟີລິບປິນ Bernard Banac ໃຫ້ສຳພາດຕໍ່ໜັງສືພິມ Philstar ວ່າ: “ໃນຂະນະນີ້, ຈຳນວນຜູ້ທີ່ຖືກເຄາະຮ້າຍຍັງບໍ່ທັນຮູ້ຢ່າງຈະແຈ້ງ ແລະ ກຳລັງດຳເນີນການຊອກຫາຜູ້ກໍ່ເຫດຢູ່”.

ລາຍງານເບື້ອງຕົ້ນ, ໃຫ້ຮູ້ວ່າ: ມີຜູ້ຊາຍຄົນໜຶ່ງໄດ້ເອົາລົດຈັກບັນຈຸ ອຸປະກອນທາດລະເບີດໄປຈອດໄວ້ໃກ້ກັບລົດບັນທຸກຂອງທະຫານຄັນໜຶ່ງ ກ່ອນທີ່ຈະລະເບີດຂຶ້ນ ແລະ ເຫດລະເບີດຄັ້ງທີ່ສອງເກີດຂຶ້ນຢູ່ທີ່ ປໍ້ານໍ້າມັນແຫ່ງໜຶ່ງໃນຖະໜົນດຽວກັນກັບເຫດລະເບີດຄັ້ງທີໜຶ່ງ.

ຂ່າວ: ລູກເມືອງພວນ.