ຮອງເຈົ້າແຂວງສະຫວັນນະເຂດ ລົງຕິດຕາມກວດກາເບິ່ງຜົນສຳເລັດໂຄງການຕ້ານເຈື່ອນປ້ອງກັນຫົວງານຊົນລະປະທານບ້ານກ້າງປາ1 ແລະຄູປ້ອງກັນນໍ້າຖ້ວມ ເມືອງໄຊບູລີ
ວັນທີ 19 ສິງຫານີ້, ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ພ້ອມດ້ວຍພະແນກການທີ່ກ່ຽວຂ້ອງຈຳນວນໜຶ່ງຄື: ພະແນກກະສິກຳ-ປ່າໄມ້, ພະແນກການເງິນ, ພະແນກແຜນການ-ການລົງທຶນ, ພະແນກພະລັງງານ-ບໍ່ແຮ່, ພະແນກໂຍທາທິການ-ຂົນສົ່ງ ແລະ ພະແນກຊັບພະຍາກອນ ທຳມະຊາດ-ສິ່ງແວດລ້ອມແຂວງ ພ້ອມດ້ວຍອຳນາດການປົກຄອງ ເຈົ້າເມືອງໄຊບູລີ ໄດ້ລົງກວດກາເບິ່ງໂຄງການຕ້ານເຈື່ອນປ້ອງກັນຫົວງານຊົນລະປະທານ ທີ່ບ້ານກ້າງປາ 1 ແລະ ຄູປ້ອງກັນນໍ້າຖ້ວມດັ່ງກ່າວ ແລະ ໄດ້ຮັບລາຍງານຈາກຜູ້ອຳນວຍການບໍລິສັດຜູ້ຮັບເໝົາໃຫ້ຮູ້ວ່າ: ບໍລິສັດຂອງຕົນໄດ້ຮັບເໝົາກໍ່ສ້າງ 2 ໂຄງການພາຍໃນເມືອງໄຊບູລີຄື: ໂຄງການຕ້ານເຈື່ອນປ້ອງກັນຫົວງານຊົນລະປະທານບ້ານກ້າງປາ 1 ແລະຄູປ້ອງກັນນໍ້າຖ້ວມບ້ານດ້າງສະຫວັນຫາຫ້ວຍສີໄຄ ເຊິ່ງເປັນໂຄງການຟື້ນຟູຫຼັງນໍ້າຖ້ວມຈາກໄພພິບັດລະດູຝົນປີ 2019 ຜ່ານມາ. ໃນນີ້ ສຳລັບຄູກັນນໍ້າຖ້ວມແມ່ນມີ 2 ສັນຍາຄື: ແຕ່ບ້ານຕົ້ນແຫນຫາບ້າງບຶງເຊ ມີລວງຍາວ 660 ແມັດ, ໜ້າທາງກວ້າງ 5 ແມັດ, ມີມູນຄ່າ 1,3 ຕື້ກວ່າກີບ ແລະສັນຍາທີ 2 ເລີ່ມແຕ່ບ້ານບຶງເຊຫາບ້ານຫາດຊາຍສູງ ມີລວງຍາວ 1.210 ແມັດ, ມີມູນຄ່າ 800 ລ້ານກວ່າກີບ, ເຊິ່ງໄດ້ເລີ່ມລົງມືກໍ່ສ້າງມາແຕ່ຕົ້ນເດືອນພຶດສະພາ ແລະໄດ້ສຳເລັດໃນວັນທີ 10 ກໍລະກົດ ຜ່ານມານີ້ ໃຊ້ເວລາປະມານ 2 ເດືອນ. ສຳລັບໂຄງການສ້າງຕ້ານເຈື່ອນປ້ອງກັນລະບົບຫົວງານຊົນລະປະທານບ້ານກ້າງປາ 1 ເຊິ່ງເປັນຈັກສູບນໍ້າທີ່ຖືກຜົນກະທົບຮຸນແຮງຈາກໄພພິບັດ ຈຶ່ງມີການສ້ອມແປງ ແລະສ້າງຕ້ານເຈື່ອນ ລວມມີມູນຄ່າການກໍ່ສ້າງທັງໝົດ 2,9 ຕື້ກີບ ໄດ້ລົງມືຈັດຕັ້ງປະຕິບັດແຕ່ວັນທີ 25 ພຶດສະພາ ແລະໄດ້ສຳເລັດ 100% ໃນວັນທີ 25 ມິຖຸນາຜ່ານມານີ້, ໄດ້ກໍ່ສ້າງດ້ວຍຫີນລຽງຖົມດ້ວຍຊາຍ ແລະປູດ້ວຍຜ້າສຸວະເຕັກ, ຊັ້ນພື້ນຖານຮອງດ້ວຍຫີນພູຂະໜາດ 50-70 ແມັດ, ຄວາມໜາຂອງຕະຝັ່ງແມ່ນ 50 ຊັງຕີແມັດ, ມີຄູກັນນໍ້າຖ້ວມໜາສູງ 1 ແມັດ, ກວ້າງ 1 ແມັດ ເຊິ່ງການກໍ່ສ້າງໄດ້ສຳເລັດກ່ອນແຜນການ.
ຈາກນັ້ນ, ທ່ານຮອງເຈົ້າແຂວງ ຍັງໄດ້ໄປເລາະເບິ່ງລະບົບຄູກັນນໍ້າ ແລະຄອງຊົນລະປະທານຕາມຈຸດຕ່າງໆ ທີ່ເປ້ເພເສຍຫາຍໃນລະດູຝົນປີ 2019 ແລະໄດ້ຮັບການສ້ອມແປງສຳເລັດ ເພື່ອສຸມໃສ່ການຜະລິດນາແຊງຂອງປະຊາຊົນໃນສົກປີ 2020-2021 ກໍ່ຄືການຜະລິດສະບຽງອາຫານໃຫ້ໄດ້ຕາມຄາດໝາຍທີ່ວາງໄວ້.
