ກຸ່ມຕິດອາວຸດໂຈມຕີຕຳຫລວດອິນໂດເນເຊຍ ເຈົ້າໜ້າທີ່ ແລະ ຄົນຮ້າຍເສຍຊີວິດ

​ເມ​ດານ 25 ມິຖຸນາ: ​ເຈົ້າໜ້າ​ທີ່​ອິນ​ໂດ​ເນ​ເຊຍ​ກ່າວ​ວ່າ: ຜູ້​ຕ້ອງ​ສົງ​ໄສ​ສະມາຊິກ​ກຸ່ມ​ຕິດ​ອາວຸດ 2 ຄົນ​ກໍ່​ເຫດ​ໂຈມ​ຕີ​ສະຖານີ​ຕຳຫລວດ​ທ້ອງ​ຖິ່ນ ທາງ​ຕາ​ເວັນ​ຕົກ​ຂອງ​ປະ​ເທດ ​ເຮັດ​ໃຫ້​ເຈົ້າໜ້າ​ທີ່ 1 ຄົນ ​ແລະ ຄົນ​ຮ້າຍ 1 ຄົນ​ເສຍ​ຊີວິດ​ໃນ​ໄລຍະ​ເທສະ​ການ​ວັນ​ຢຸດ​ສຳຄັນ​ຂອງ​ຊາວ​ມຸສລິ​ມ.

​ໂຄສົກ​ສຳນັກງານ​ຕຳຫລວດ​ແຫ່ງ​ຊາດ​ລາຍ​ງານ​ວ່າ: ຜູ້​ຊາຍ​ສອງ​ຄົນ​ຈັບ​ມີ​ດຂະໜາດ​ໃຫຍ່​ບຸກ​ເຂົ້າມາສະ​ຖາ​ນີຕຳຫລວດ​ຢູ່​ເມືອງ​ເມ​ດານ ​ແຂວງ​ສຸ​ມາດຕາ​ເໜືອ ​ແລະ ​ແທງ​ເຈົ້າໜ້າ​ທີ່​ເສຍ​ຊີວິດ​ທີ່​ກຳລັງ​ປະຕິບັດ​ໜ້າ​ທີ່, ​ເຈົ້າໜ້າ​ທີ່​ຈຶ່ງ​ຍິງ​ຕອບ​ໂຕ້​ຜູ້​ກໍ່​ເຫດ​ທັງ​ສອງ ​ເຮັດ​ໃຫ້​ຄົນ​ໜຶ່ງ​ເສຍ​ຊີວິດ, ສ່ວນ​ອີກ​ຄົນ​ບາດ​ເຈັບ. ​ເຫດ​ໂຈມ​ຕີ​ເກີດ​ຂຶ້ນ​ໃນ​ໄລຍະ​ທີ່​ຊາວ​ອິນ​ໂດ​ເນ​ເຊຍ​ສ່ວນ​ຫລາຍ​ພາກັນ​ສະຫລອງ​ເທສະ​ການ​ວັນ​ຢຸດ​ອີ​ດິວຟິດຣີ ພາຍຫລັງ​ສິ້ນສຸດ​ການ​ຖື​ສິນ​ອົດ​ໃນ​ເດືອນ​ລໍ​ມາດ​ອນ. ຕຳຫລວດ​ຄາດ​ວ່າ: ຄົນ​ຮ້າຍ​ທັງ​ສອງ​ເປັນ​ສະມາຊິກ​ກຸ່ມ​ຫົວ​ຮຸນ​ແຮງ​ທີ່​ປະກາດ​ຈົງ​ຮັກ​ພັກດີ​ກັບ​ກຸ່ມ​ລັດ​ອິສລາມ (IS) ຢູ່​ຊີຣີ.