ນາຍົກລັດຖະມົນຕີຫວຽດນາມ ຫງວຽນຊວັນຟຸກ ຈະເຂົ້າຮ່ວມກອງປະຊຸມລະດັບສູງ ແມ່ນນໍ້າຂອງ- ລ້ານຊ້າງ ໃນວັນທີ 24 ສິງຫາ
ລາຍງານຂ່າວຈາກ zingnews, ວັນທີ 20 ສິງຫານີ້ ໃຫ້ຮູ້ວ່າ: ກອງປະຊຸມລະດັບສູງການຮ່ວມມືແມ່ນໍ້າຂອງ-ລ້ານຊ້າງ ຄັ້ງທີ 3 ຈະໄຂຂຶ້ນໃນວັນທີ 24 ສິງຫານີ້, ຊຶ່ງຈະມີຜູ້ນຳ 6 ປະເທດ: ມຽນມາ, ລາວ, ໄທ, ກຳປູເຈຍ, ຫວຽດນາມ ແລະ ຈີນເຂົ້າຮ່ວມ, ພາຍໃຕ້ການເປັນປະທານຮ່ວມຂອງລາວ ແລະ ຈີນ. ພາຍໃຕ້ຫົວຂໍ້: “ເພີ່ມທະວີການຮ່ວມມື ເພື່ອຄວາມວັດທະນາຖາວອນລວມ”.
ກອງປະຊຸມຈະສຸມໃສ່ຄົ້ນຄ້ວາຕີລາຄາສະພາບການຮ່ວມມືນັບແຕ່ກອງປະຊຸມສຸດຍອດແມ່ນໍ້າຂອງ-ແມ່ນໍ້າລ້ານຊ້າງຄັ້ງທີ 2 ເປັນຕົ້ນມາ ແລະ ປຶກສາຫາລືກ່ຽວກັບທິດທາງການເຄື່ອນໄຫວໃນຕໍ່ໜ້າ.
ລາຍງານຂ່າວຍັງໃຫ້ຮູ້ອີກວ່າ: ຄາດວ່າບັນດາຜູ້ນຳຂອງບັນດາປະເທດຈະປຶກສາຫາລືກັນກ່ຽວກັບບາງບັນຫາເຊັ່ນ: ການຮ່ວມມືທາງດ້ານການແພດ, ເພີ່ມທະວີຄວາມອາດສາມາດປ້ອງກັນພະຍາດ, ຮ່ວມມືການຟື້ນຟູ, ພັດທະນາເສດຖະກິດຫຼັງໂຄວິດ-19, ຄຸ້ມຄອງ ແລະ ນຳໃຊ້ຢ່າງຢັ້ງຢືນແມ່ນໍ້າຂອງ.
ນາຍົກລັດຖະມົນຕີຂອງຫວຽດນາມຈະມີບົດປາໄສຕໍ່ກອງປະຊຸມ.
ຂ່າວ: ລູກເມືອງພວນ.
