ຈີນພັດທະນາວັກຊິນພະຍາດໄຂ້ສະໝອງອັກເສບ ປ້ອງກັນໄດ້ເຖິງ 2 ໄວຣັສໃນເຂັມດຽວ
ວັນທີ 20 ສິງຫານີ້, ຄະນະນັກວິໄຈຈາກສະຖາບັນໄວຣັສວິທະຍາອູ່ຮັນ ສັງກັດສະຖາບັນບັນດິດວິທະຍາສາດຈີນ ປະກາດວ່າ: ສະຖາບັນພັດທະນາວັກຊິນພະຍາດໄຂ້ສະໝອງອັກເສບຊະນິດໃໝ່ ເຊິ່ງການທົດລອງໃນຫ້ອງປະຕິບັດການຊີ້ໃຫ້ເຫັນວ່າ: ສາມາດປ້ອງກັນພະຍາດທີ່ມີຍຸງເປັນພາຫະໄດ້ເຖິງ 2 ພະຍາດດ້ວຍວັກຊິນເຂັມດຽວ.
ນັກວິໄຈກ່າວວ່າ: ວັກຊິນດັ່ງກ່າວສາມາດປ້ອງກັນໄດ້ທັງໄວຣັສພະຍາດໄຂ້ສະໝອງອັກເສບ JEV ແລະ ໄວຣັສເວສໄນ (WNV) ວັກຊິນກ່ອນປະຕິກິລິຍາຕອບສະໜອງທາງພູມຄຸ້ມກັນທີ່ແຂງແຮງໃນໜູທົດລອງຢ່າງປອດໄພ ແລະ ມີປະສິດທິພາບໃນລະດັບສູງ.
ການສຶກສາສະບັບນີ້ໄດ້ຮັບການຕີພິມເມື່ອຕົ້ນເດືອນສິງຫາຜ່ານມາໃນ npj Vaccines ເຊິ່ງເປັນວາລະສານອອນລາຍທີ່ເຂົ້າເຖິງແບບເປີດຈາກແຟ້ມຂໍ້ມູນວາລະສານເນເຈີ ຣີເສິດ.
ໄວຣັສ JEV ເປັນສາເຫດສຳຄັນຂອງພະຍາດໄຂ້ສະໝອງອັກເສບຈາກເຊື້ອໄວຣັສໃນພາກພື້ນອາຊີ-ປາຊີຟິກ ເຊິ່ງສົ່ງຜົນໃຫ້ມີຜູ້ເປັນພະຍາດໄຂ້ສະໝອງອັກເສບ JEV ເກືອບ 68.000 ຄົນໃນແຕ່ລະປີ ໂດຍມີອັດຕາການເສຍຊີວິດສະເລ່ຍປະມານ 30% ເຖິງວ່າຜູ້ທີ່ລອດຊີວິດຈາກພະຍາດນີ້ມັກຕ້ອງທົນທຸກທໍລະມານຈາກຄວາມຜິດປົກກະຕິທາງລະບົບປະສາດຢ່າງຖາວອນເຊັ່ນ: ສະພາບຄວາມສາມາດຂອງສະໝອງບົກຜ່ອງ, ຄວາມບົກຜ່ອງທາງການເຄື່ອນໄຫວ ແລະ ຄວາມບົກຜ່ອງທາງພຶດຕິກຳ.
ປັດຈຸບັນຍັງບໍ່ມີຢາຕ້ານໄວຣັສ JEV ທີ່ມີປະສິດທິພາບ, ວັກຊິນຈຶ່ງເປັນຫົນທາງດຽວໃນການປ້ອງກັນການຕິດເຊື້ອ. ແຕ່ເຖິງຢ່າງໃດກໍຕາມ, ວັກຊິນໄວຣັສ JEV ທີ່ມີຢູ່ໃນປັດຈຸບັນ ຈຳເປັນຕ້ອງໄດ້ຮັບການສັກຊ້ຳອີກ ເພື່ອໃຫ້ມີການປ້ອງກັນທີ່ພຽງພໍ.
ສ່ວນໄວຣັສ WNV ເປັນພະຍາດທີ່ຕິດຕໍ່ສູ່ຄົນ ເຊິ່ງສ່ວນຫລາຍເກີດຈາກຍຸງກັດ. ນັກວິໄຈລະບຸວ່າ: ໄວຣັສຊະນິດນີ້ອາດກໍ່ໃຫ້ເກີດພະຍາດຮຸນແຮງໃນກຸ່ມຜູ້ອາຍຸສູງ ແລະ ຜູ້ທີ່ຮ່າງກາຍອ່ອນແອ ນັບແຕ່ໄວຣັສເລີ່ມປາກົດຢູ່ນິວຢອກເມື່ອປີ 1999 ກໍມີການລາຍງານການຄົ້ນພົບໄວຣັສໃນພາກພື້ນອື່ນໆອີກຫລາຍແຫ່ງ ລວມທັງອາຟຣິກາ, ເອີຣົບ ແລະ ອາຊີຕາເວັນຕົກ.
