ທຣຳ ຊວນຄົນອາເມລິກາ ຫ້າມໃຊ້ຢາງຕີນລົດກູ໊ດເຢຍ
ປະທານາທິບໍດີ ໂດນັລ ທຣຳ ຂອງອາເມລິກາ ຊວນຄົນອາເມລິກາຫ້າມໃຊ້ຢາງຕີນລົດຈາກບໍລິສັດ ກູ໊ດເຢຍ ແລະ ຂູ່ຈະສັ່ງປ່ຽນຢາງຕີນລົດລີມູຊີນປະຈຳຕຳແໜ່ງໄປໃຊ້ຢາງຕີນລົດຍີ່ຫໍ້ອື່ນແທນ.
ຄຳກ່າວຂອງທ່ານ ທຣຳ ມີຂຶ້ນຫລັງຈາກພະນັກງານຂອງບໍລິສັດກູ໊ດເຢຍໃນລັດແຄນຊັສສະແດງນະໂຍບາຍຂອງບໍລິສັດທີ່ບໍ່ອະນຸຍາດໃຫ້ພະນັກງານໃສ່ເສື້ອຜ້າທີ່ມີຂໍ້ຄວາມກ່ຽວກັບການເມືອງເຊັ່ນ: MAGA ເຊິ່ງເປັນສະໂລແກນຫາສຽງຂອງທ່ານ ທຣຳ ແຕ່ອະນຸຍາດໃຫ້ສະໜັບສະໜູນຄົນຜິວສີ (Black Lives Matter) ແລະ ກຸ່ມຄົນທີ່ມີຄວາມຫລາກຫລາຍທາງເພດ.
ຫລັງຈາກທ່ານ ທຣຳ ກ່າວອອກໄປ ສົ່ງຜົນໃຫ້ຫຸ້ນຂອງກູ໊ດເຢຍຫລຸດລົງ 6% ກ່ອນຈະດີດກັບຂຶ້ນມາເລັກໜ້ອຍ.
ບໍລິສັດກູ໊ດເຢຍຊີ້ແຈງວ່າ: ບໍລິສັດມີນະໂຍບາຍທີ່ຍຶດຖືມາດົນໃນການງົດເວັ້ນຈາກການກີດກັນ ຫລື ການລ່ວງລະເມີດໃນທຸກຮູບແບບ ໂດຍບໍລິສັດຂໍການຮ່ວມມືໃຫ້ພະນັກງານງົດເວັ້ນການສະແດງອອກໃນບ່ອນເຮັດວຽກກ່ຽວກັບການສະໜັບສະໜູນພັກການເມືອງ ຫລື ຜູ້ສະໝັກຄົນໃດ ລວມທັງການສະໜັບສະໜູນທີ່ຢູ່ນອກເໜືອຂອບເຂດບັນຫາຄວາມເທົ່າທຽມກັນ ແລະ ຄວາມຍຸຕິທຳທາງດ້ານເຊື້ອຊາດ.
