ແຮງງານລາວທີ່ຍັງຄ້າງຢູ່ໄທຕ້ອງໄດ້ເອົາໃຈໃສ່ແກ້ໄຂ

ກົມພັດທະນາສີມືແຮງງານ ແລະ ຈັດຫາງານ, ກະຊວງແຮງງານ ແລະ ສະຫວັດດີການສັງຄົມ ໄດ້ໃຫ້ສຳພາດຕໍ່ນັກຂ່າວໜັງສືພິມ ລາວພັດທະນາ ໃນວັນທີ 17 ສິງຫານີ້ວ່າ: ໃນປັດຈຸບັນແຮງງານລາວຍັງຕົກຢູ່ຕ່າງປະເທດທັງໝົດ 45.179 ຄົນ, ໃນນັ້ນຢູ່ໄທມີ 22.000 ຄົນ.

ນັບແຕ່ມີການລະບາດຂອງພະຍາດໂຄວິດ-19 ເປັນຕົ້ນມາເຊິ່ງເຫັນວ່າເປັນບັນຫາທີ່ຈະຕ້ອງໄດ້ເອົາໃຈໃສ່ແກ້ໄຂ ແລະ ການຊ່ວຍເຫລືອຈາກລັດຖະບານ ເພື່ອຊ່ວຍໃຫ້ຜູ້ອອກແຮງງານລາວທີ່ຍັງຕົກຄ້າງຢູ່ນັ້ນໄດ້ກັບມາປະກອບອາຊີບ, ທຳມາຫາກິນຢູ່ປະເທດ ແລະ ບ້ານເກີດເມືອງນອນຂອງຕົນໃນຜ່ານມາ ກະຊວງແຮງງານ ແລະ ສະຫວັດດີການສັງຄົມ ກໍໄດ້ຊີ້ນໍາໃຫ້ຜູ້ຊ່ວຍວຽກທາງດ້ານແຮງງານທີ່ປະຈໍາຢູ່ສະຖານເອກອັກຄະລັດຖະທູດແຫ່ງ ສປປ ລາວ ປະຈໍາບາງກອກ, ປະເທດໄທ ໃຫ້ເອົາໃຈໃສ່ຕິດຕາມສະພາບຂອງຜູ້ອອກແຮງງານລາວ ແລະ ປະສານງານກັບຂະແໜງການທີ່ກ່ຽວຂ້ອງຂອງໄທ ເພື່ອໃຫ້ການຊ່ວຍເຫລືອເຂົາເຈົ້າໃນກໍລະນີຕ່າງໆ, ພ້ອມນີ້, ກໍໄດ້ອອກແຈ້ງການໃຫ້ສູນບໍລິການຈັດຫາງານ ແລະ ບໍລິສັດຈັດຫາງານປະສານງານກັບຜູ້ໃຊ້ແຮງງານ ເພື່ອເກັບກໍາຈໍານວນແຮງງານທີ່ຍັງຄ້າງຢູ່ໄທໃຫ້ລາຍລະອຽດ. ພ້ອມທັງປະສານງານກັບສະຖານເອກອັກຄະລັດຖະທູດລາວ ປະຈໍາບາງກອກ, ເພື່ອອໍານວຍຄວາມສະດວກໃຫ້ຜູ້ອອກແຮງງານລາວທີ່ມີຈຸດປະສົງກັບຄືນປະເທດ.

ຄຽງຄູ່ກັນນັ້ນ ກະຊວງແຮງງານ ແລະ ສະຫວັດດີການສັງຄົມ ກໍໄດ້ປະສານສົມທົບກັບກະຊວງແຮງງານໄທ ກໍານົດກົນໄກທີ່ເໝາະສົມຮ່ວມກັນແກ້ໄຂຜູ້ອອກແຮງງານລາວທີ່ຍັງຕົກຄ້າງຢູ່ໄທ ເພື່ອໃຫ້ສາມາດສືບຕໍ່ເຮັດວຽກຢູ່ປະເທດໄທໄດ້ຢ່າງຖືກຕ້ອງຕາມກົດໝາຍ, ໂດຍຜູ້ອອກແຮງງານເຫລົ່ານັ້ນບໍ່ຈໍາເປັນຕ້ອງເດີນທາງກັບຄືນປະເທດ ເພື່ອສາມາດປະຢັດເວລາ, ຄ່າໃຊ້ຈ່າຍ ແລະ ຫລຸດຜ່ອນຄວາມສ່ຽງຈາກການຕິດເຊື້ອ ພະຍາດໂຄວິດ-19. ເຊິ່ງທັງສອງຝ່າຍຈະຈັດກອງປະຊຸມລະດັບວິຊາການທາງໄກ ໃນຕົ້ນເດືອນກັນຍາ 2020ນີ້ ເພື່ອກໍານົດການຈັດຕັ້ງປະຕິບັດຢ່າງລະອຽດກ່ອນກອງປະຊຸມລະດັບວິຊາການຂອງສອງຝ່າຍໂດຍກະຊວງແຮງງານ ແລະ ສະຫວັດດີການສັງຄົມ ຈະມີການປະຊຸມປຶກສາຫາລື ກັບກະຊວງທີ່ກ່ຽວຂ້ອງ ໂດຍສະເພາະກະຊວງການຕ່າງປະເທດ, ກະຊວງ ປກສ ແລະ ກະຊວງສາທາລະນະສຸກ ເພື່ອເປັນເອກະພາບຕໍ່ກັບກົນໄກໃນການຈັດຕັ້ງປະຕິບັດ ການແກ້ໄຂແຮງງານ ລາວທີ່ຍັງຕົກຄ້າງຢູ່ໄທເປັນຈຳນວນຫລາຍນັ້ນໃຫ້ປອດໄພ.