ພະແນກສາທາລະນະສຸກ ແຂວງໄຊສົມບູນ ສະຫລຸບວຽກງານ 6 ເດືອນຕົ້ນປີ
ກອງປະຊຸມສະຫລຸບຖອດຖອນບົດຮຽນການຈັດຕັ້ງປະຕິບັດວຽກງານສາທາລະນະສຸກ 6 ເດືອນຕົ້ນປີ 2020 ແລະ ວາງທິດທາງແຜນການຈຸດສຸມ 6 ເດືອນທ້າຍປີ ຂອງພະແນກສາທາລະນະສຸກ ແຂວງໄຊສົມບູນ ໄດ້ຈັດຂຶ້ນໃນວັນທີ 19 ສິງຫານີ້ ທີ່ຫ້ອງປະຊຸມຂອງພະແນກ, ໂດຍການເຂົ້າຮ່ວມເປັນປະທານ ຂອງທ່ານ ແດງ ປະທຸມທອງ ພ້ອມດ້ວຍຫ້ອງການສາທາລະນະສຸກ ທັງ 5 ເມືອງເຂົ້າຮ່ວມ.
ທ່ານ ດຣ ລີເຢີ ໄຊຍະຊ້າງ, ຮອງຫົວໜ້າພະແນກສາທາລະນະສຸກແຂວງ ກ່າວວ່າ: ຕະຫລອດໄລຍະ 6 ເດືອນຜ່ານມາ ຄະນະພັກ-ຄະນະນຳ ພະແນກສາທາລະນະສຸກແຂວງ ໄດ້ຖືເອົາວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ-ພະນັກງານແພດໝໍ ເປັນໜ້າທີ່ໃຈກາງ ໂດຍຕິດພັນກັບວຽກງານວິຊາສະເພາະດ້ານອື່ນໆ. ເປັນຕົ້ນການຈັດຕັ້ງປະຕິບັດຄາດ ໝາຍສູ້ຊົນບັນດາຕົວຊີ້ບອກຂອງຂະແໜງສາທາລະນະສຸກໃນໄລຍະ 6 ເດືອນຕົ້ນປີ ຊຶ່ງສາມາດບັນລຸຜົນສຳເລັດ ຕາມລະດັບຄາດໝາຍ ໃນນັ້ນ ອັດຕາປົກຄຸມປະກັນສຸຂະພາບ ແມ່ນສາມາດປົກຄຸມທົ່ວເຖິງ ທັງ 5 ເມືອງ ແລະ 89 ບ້ານ ໃນທົ່ວແຂວງໄຊສົມບູນ ຊຶ່ງສາມາດບັນລຸໄດ້ 100%, ອັດຕາຮັບຮອງ ແລະ ປະກາດເປັນບ້ານສາທາລະນະສຸກແບບຢ່າງ ສາມາດປະຕິບັດໄດ້ 85,4% ຊຶ່ງຄາດໝາຍທີ່ວາງໄວ້ແມ່ນ 86,4% ສົມທຽບໃສ່ 6 ເດືອນຕົ້ນປີ 2019 (83,4%) ແມ່ນເພີ່ມຂຶ້ນ 2,2%. ນອກນີ້ ກໍໄດ້ມີການເຄື່ອນໄຫວດ້ານອື່ນໆຕື່ມອີກ. ພ້ອມນີ້ ກໍໄດ້ມີການຝຶກອົບຮົມວຽກງານໂພຊະນາການຂັ້ນ ແຂວງ ແລະ ເມືອງ, ຈັດກອງປະຊຸມຄົບຄະນະກຳມະການດ້ານໂພຊະນາການຂັ້ນ ແຂວງ ປະຈຳປີ 2019 ທັງສຸມໃສ່ວຽກງານກັນພະຍາດ ແລະ ຄອບຄຸມພະຍາດຕິດຕໍ່, ວຽກງານສະກັດກັ້ນ ແລະ ຕ້ານເຊື້ອເຮັສໄອວີ-ເອດ ແລະ ພະຍາດຕິດຕໍ່ທາງເພດສຳພັນ, ວຽກງານຄວບຄຸມພະຍາດວັນນະໂລກ, ວຽກງານພັດທະນາຄຸນນະພາບ ແລະ ມາດຖານການບໍລິການສຸຂະພາບ ປິ່ນປົວ ແລະ ວຽກງານອື່ນໆຕື່ມອີກ. ເພື່ອສືບຕໍ່ພັດທະນາຂົງເຂດສາທາລະນະສຸກ ຂອງແຂວງໄຊສົມບູນ ໃຫ້ເຕີບໃຫຍ່ຂະຫຍາຍຕົວ ແລະ ພັດທະນາຂຶ້ນ ຢ່າງບໍ່ຢຸດຢັ້ງ.
