ສະຫະພາບເອີຣົບ ສະໜອງທຶນ 2 ລ້ານກວ່າເອີໂຣ ຊ່ວຍລາວຕ້ານການລະບາດໂຄວິດ-19
ໃນວັນທີ 18 ສິງຫານີ້, ສະຫະພາບເອີຣົບປະຈຳ ສປປ ລາວ ຮ່ວມກັບ ອົງການ ແພຣນ ປະຈຳລາວ, ສະມາຄົມສຸຂະພາບຊຸມຊົນ ແລະ ການມີສ່ວນ (CHIAS) ແລະ ສະມາຄົມພັດທະນາກະສິກຳ ແລະ ສິ່ງແວດລ້ອມແບບຢືນຢົງ (SAEDA) ໄດ້ເປີດດໂຄງການປ້ອງກັນ ແລະ ຫລຸດຜ່ອນຄວາມສ່ຽງພະຍາດໂຄວິດ-19 ໃນ ສປປ ລາວ ໂດຍສະເພາະຊຸມຊົນໃນເຂດຊົນນະບົດຫ່າງໄກສອກຫລີກ ໂດຍການສະໜອງທຶນຂອງສະຫະພາບເອີຣົບມູນຄ່າ 2,5 ລ້ານເອີໂຣ.
ທ່ານ ໄບຣອັນ ອຸປະທູດອີຢູປະຈຳລາວ ກ່າວວ່າ: ໂຄງການດັ່ງກ່າວ ເປັນສ່ວນໜຶ່ງໃນການສະໜັບສະໜູນລັດຖະບານລາວໃນການຕອບໂຕ້ການລະບາດຂອງພະຍາດໂຄວິດ-19 ແນໃສ່ຫລຸດ ຜ່ອນຄວາມສ່ຽງ, ຜົນກະທົບທາງເສດຖະກິດ-ສັງຄົມ ແລະ ສຸຂະພາບຂອງປະຊາຊົນລາວບັນດາເຜົ່າຈາກພະຍາດດັ່ງກ່າວ.
ປະທານຄະນະປະສານງານອົງການຈັດຕັ້ງທາງສັງຄົມລາວ ໄດ້ກ່າວວ່າ: ໂຄງການນີ້ຈະເລີ່ມຈັດຕັ້ງປະຕິບັດໃນເດືອນກັນຍາ 2020 ຫາເດືອນສິງຫາ 2030 ຢູ່ 10 ແຂວງ ໂດຍເນັ້ນໃສ່ໂຄສະນາເຜີຍແຜ່ການປ້ອງກັນ, ຫລຸດຜ່ອນຄວາມສ່ຽງ, ການປັບໂຕໃນຂັ້ນທ້ອງຖິ່ນ, ການສ້າງຄວາມເຂັ້ມແຂງໃນການວາງແຜນ ແລະ ຈັດຕັ້ງປະຕິບັດຂັ້ນບ້ານ, ເມືອງ ແລະ ແຂວງ, ຄາດວ່າປະຊາຊົນ ແລະ ແຮງງານທີ່ກັບມາຈາກປະເທດເພື່ອນບ້ານທີ່ອາໄສຢູ່ໃນກຸ່ມເປົ້າໝາຍຂອງໂຄງການຈະໄດ້ຜົນປະໂຫຍດ.
